Bonngoe ba 'mele
1Joale 'na, ke le motšoaruoa ka baka la Morena, ke le rapela hore le phele ka mokhoa o tšoanelang pitso eo le bitsitsoeng ka eona: 2ka boikokobetso bohle, le bonolo, le boiphapanyo, le ka ho mamellana ka lerato. 3Le thahaselle ho bōlōka bonngoe ba Moea ka ho tlamahana ka khotso. 4'Mele o mong le Moea o mong, joalokaha ho e-na le tšepo e le 'ngoe eo le e bitselitsoeng. 5Morena o mong, tumelo e 'ngoe, kolobetso e 'ngoe. 6Molimo eo e leng Ntat'a rōna bohle o mong, o okametse bohle, o sebetsa ka bohle, o kahar'a bohle.
7Empa e mong le e mong oa rōna o neiloe mohau ho ea kamoo Kreste a mo lekanyelitseng mpho ea hae kateng. 8Ke ka baka leo ho thoeng:
“O ile a nyolohela holimo,
a thōpile batšoaruoa;
a nea batho lineo.”
9Joale ho re “o ile a nyolohela” ke ho re'ng, haese ho bolela hore o ile a qala ka ho theohela tlase-tlase lefatšeng? 10Ea ileng a theohela tlase, ke eena ea nyolohetseng holimo-limo ho maholimo 'ohle, hore tsohle li tlale boeena. 11Ke eena ea ileng “a nea” ba bang ho ba baapostola, ba bang baporofeta, ba bang baboleli ba molaetsa o molemo, ba bang balisa, ba bang baruti, 12hore ba lokisetse balumeli tšebeletso ea Molimo, 'mele oa Kreste o tle o matlafale. 13Ka mokhoa ona bohle re tla fihlela bonngoe ba tumelo le ba ho tseba Mora oa Molimo; re tle re be batho ba phethehileng ha re lekanngoa le boleng bo tletseng ba Kreste.
14Ka hona ha re sa tla hlola re e-ba masea a tsokoletsoang koana le koana, a fefoloang ke moea ofe le ofe oa lithuto tsa batho ba mano, ba khelosang ka maqiti a bona. 15Empa ha re bolela 'nete ka lerato, re tla hōla ka mekhoa eohle, ho ba ba Kreste, eo e leng hlooho. 16'Mele oohle o kopanngoa ke eena, o tlamahanngoa manonyeletsong 'ohle ao o nang le 'ona. Ha setho ka seng se sebetsa kamoo se lokelang kateng, 'mele oa hōla, o imatlafatsa ka lerato.
Bophelo ba khale le bo bocha
17Ka lebitso la Morena ke le bolella sena, 'me kea se tiisa, ke re: Le se hlole le phela joaloka bahedene, ba tsamaisoang ke maikutlo a bona a lefeela. 18Likelello tsa bona li fifetse, ba fapohile bophelo ba Molimo, ka baka la bothoto ba bona, le ka baka la bothata ba lipelo tsa bona. 19Kahobane ba shoele moea, ba ineeletse bokhopo, tsohle tse litšila ba li tsoetse pelo.
20Empa lōna ha lea ka la ithuta Kreste ka tsela e joalo, 21haeba ruri le utloile tsa hae, 'me le rutiloe 'nete kamoo e leng kateng ho Jesu. 22Tlohelang metsamao ea lōna ea pele, le felise botho ba lōna ba khale, bo senyehileng ka baka la litakatso tse thetsang. 23Le lokela ho nchafala likelellong le moeeng, 24'me le apare botho bo bocha, bo bōpiloeng ka ho tšoana le Molimo ka ho loka le ka khalalelo ea 'nete.
Melao ea bophelo bo bocha
25Ka baka leo, tlohelang leshano, motho ka mong a bue 'nete le oa habo, hobane re litho tsa 'mele o le mong. 26Ha le halefile le se ke la etsa sebe; letsatsi le se ke la le likella le ntse le halefile. 27Le se ke la fa Diabolosi monyetla. 28Ea utsoang a se hlole a utsoa, a mpe a tšoare ka thata, a sebeletse tse molemo ka matsoho a hae, a tle a tsebe ho fa ea hlokang.
29Mahlapa a se ke a tsoa melomong ea lōna, ho mpe ho tsoe lipolelo tse molemo, tse ka thusang ho matlafatsa ba li utloang, le ho ba tlisetsa lehlohonolo. 30Le se ke la soabisa Moea o Halalelang oa Molimo, oo ka oona le tšoaetsoeng letsatsi la topollo. 31Felisang bosoele bohle, le bohale, le khalefo, le lerata, le bonyefoli, le bobe bohle. 32Rekolohelanang, le hauhelane, le tšoarelane, joalokaha le Molimo a le tšoaretse ka Kreste.
