Davida o bala sechaba
1Khalefo ea Morena ea boela ea tlōkōmela Baiseraele, 'me Morena a hlohlelletsa Davida hore a tšoenye sechaba, ka ho mo laela, a re: “Tsamaea, u e'o bala sechaba sa Iseraele le sa Juda.”
2Khosi Davida a bua le Joabe, le balaoli ba lebōtho ba neng ba e-na le eena, a re: “Tsamaeang har'a merabe eohle ea Iseraele, ho tloha Dane ho ea fihla Beeresheba, le bale sechaba, ke tle ke tsebe hore na palo ea sona e kae.”
3Joabe a re ho khosi: “Eka Morena Molimo oa hao, a ka atisa sechaba sa Iseraele halekholo, leha se se se ntse se le sengata tjena, 'me uena ua phela hore u be u se bone. Feela ke ka baka la'ng ha mong'a ka, khosi ea ka, a thabisoa ke ntho ee?”
4Empa khosi ea se ke ea mamela bo-Joabe le balaoli ba mabōtho. Eaba he baa tsamaea, ba tloha ho khosi, ba ea bala sechaba sa Baiseraele.
5Ba tšela Jorodane, ba fihla ba hloma ka boroa ho Arōoere, e leng motse o kahar'a khohlo e lebaneng le Gade, ho ea fihla Jasere. 6Ba fetela Gileade le Kadeshe, naheng ea Bahete, ba nt'o fetela Dane, ba potoloha ho ea fihla Sidone. 7Ba fihla qhobosheaneng ea Tire, le metseng eohle ea Bahife le ea Bakanana. Ba fetela Beeresheba, naheng e ka boroa ea Juda.
8Ba tsamaea le naha eohle, 'me kamora' likhoeli tse robong le matsatsi a mashome a mabeli, ba khutlela Jerusalema.
9Joabe a nea khosi palo ea sechaba se baliloeng. Sechabeng sa Baiseraele ho ne ho e-na le banna ba bahlabani ba likete tse makholo a robeli, ba neng ba tšoara sabole; athe ho sa Juda teng ho ne ho e-na le bahlabani ba likete tse makholo a mahlano.
10Hoba Davida a bale sechaba, letsoalo la hae la mo ja, eaba o re ho Morena: “Ke u sitetsoe haholo ka seo ke se entseng. Empa joale kea u rapela, Morena: Ak'u hlakole bokhopo bona ba mohlanka oa hao, hobane ke sebelitse ka bothoto bo boholo.”
11Ka la hosasane ha Davida a tsoha, Morena a bua ho moporofeta Gade, senōhe sa Davida, a re: 12“E-ea ho Davida, u fihle u re ho eena: ‘Morena o re: Lintho ke tsena tse tharo: Ikhethele e le 'ngoe ea tsona, eo ke tla u otla ka eona.’ ”
13Gade a fihla ho Davida; hoba a 'molelle a 'motsa, a re: “U ikhethela eng linthong tsee tse tharo: Sekoboto ka lilemo tse supileng naheng ea hao; ho baleha u phalalisoa ke lira tsa hao ka khoeli tse tharo; kapa seoa ka matsatsi a mararo naheng ee ea hao? Inahane, 'me u mpolelle karabo eo ke tla e isetsa ea nthōmileng.”
14Davida a re ho Gade: “Ke tlaletsoe haholo! Ho e-na le ho oela liatleng tsa motho, re ka mpa ra oela liatleng tsa Morena, hobane mohau oa hae o moholo.”
15Joale Morena a rōmela seoa naheng ea Iseraele, sa qala ha bosiu bo e-sa, 'me sa khaotsa ka letsatsi le beiloeng. Ho tloha Dane, ho ea fihla Beeresheba, seoa seo sa bolaea Baiseraele ba likete tse mashome a supileng. 16Eitse ha lengeloi le otlollela letsoho holim'a Jerusalema ho e timetsa, Morena a hauha ha a nahana koluoa eo, 'me a re ho lengeloi le neng le timetsa batho: “Ho lekane! Khaotsa!” Lengeloi leo la Morena le ne le le seotlong sa Arauna oa Mojebuse.
17Eitse ha Davida a bona lengeloi la Morena le timetsang sechaba, a re ho Morena: “Ke 'na ea sitiloeng, ke 'na ea entseng bobe; joale linku tsee tsona li entse'ng? Kea rapela: Mpe u otle 'na le ba lelapa leso.”
Sehlabelo sa tefelo ea libe
18Ka lona letsatsi leo Gade a fihla ho Davida, a re ho eena: “Nyolohela seotlong sa Arauna oa Mojebuse, u hahele Morena aletare hona teng.” 19Davida a ema, a tsamaea joalokaha Morena a ne a mo laetse ka Gade. 20Ha Arauna a betsetsa mahlo tlase, a bona khosi le bahlanka ba eona ba e-tla ho eena. Arauna a atamela, 'me a itihela fatše ka sefahleho ho isa hlompho.
21Arauna a re: “Ke ka lebaka la'ng ha mong'a ka, khosi ea ka, a etetse mohlanka oa hae?”
Davida a re: “Ke tlil'o reka seotlo sena ho uena, e le hore ke tle ke hahele Morena aletare ho sona, seoa se tle se khaotse sechabeng.”
22Eaba Arauna o re ho Davida: “Mong'a ka, khosi ea ka, a ka se nka, 'me a nyehela ka seo a bonang se lokela. Lipholo tsa sehlabelo sa secheso ke tsena; lilei tsena le lijoko tsena e tla ba patsi. 23Mong'a ka, khosi ea ka, mohlanka oa hao o u nea tsena tsohle.” Arauna a boela a re ho khosi: “Morena Molimo oa hao, a ke a amohele nyehelo ea hao.”
24Empa khosi ea re ho Arauna: “Che, ke tla reka lintho tsena ho uena ka theko ea tsona. Nke ke ka etsetsa Morena Molimo oa ka, nyehelo ea secheso ka lintho tseo ke sa li rekang.”
Davida a reka seotlo seo le lipholo tseo ka lichelete tsa silefera tse etsang boima ba likeramo tse makholo a tšeletseng. 25Davida a hahela Morena aletare hona moo, a nyehela ka linyehelo tsa secheso le tsa teboho. Eaba Morena o hauhela sechaba, 'me seoa sa khaotsa naheng ea Iseraele.
