Davida o batleloa moroetsana
1Khosi Davida o ne a se a hōlile, e se e le mobu; leha a pupetsoa ka likobo o ne a sa futhumale. 2Ka baka leo, bahlanka ba hae ba re ho eena: “Mong'a rōna, khosi ea rōna, e seng u batleloe moroetsana ea tla u sebeletsa, a u hlokomele, a robale le uena, u tle u futhumale?”
3Eaba ba batla moroetsana e motle ho feta bohle naheng ea Iseraele; ba fumana Abishake oa Moshuneme, 'me ba mo isa ho khosi. 4Moroetsana eo o ne a le motle haholo. A hlokomela khosi, a e sebeletsa, empa khosi ea se ke ea kena likobong tsa hae.
Adoniea oa ipea
5Adoniea, mora oa Hagite, a ipolelisa, a re: “Ho tla rena 'na!” A iphumanela likariki tsa ntoa, le bahlabani ba palamang, le banna ba litaaso ba mashome a mahlano, ba mo etellang pele. 6Haesale e le eena, ntat'ae o ne a e-s'o ka a mo khalemela le ka mohla, a re: “U etselitse'ng tjee?” Etsoe Adoniea o ne a le motle haholo, a bile a hlahlama Abosalome.
7A etsa 'momori le Joabe, mora oa Seruea, le moprista Abiatare, 'me bao ba mo tlatsa. 8Empa bo-moprista Sadoke, le Benaea, mora oa Jehoeada, le moporofeta Nathane, le Shimei, le Rei, le mokhetho oa bahale ba Davida, bona ba se ke ba ananela morero ona oa Adoniea.
9Ka tsatsi le leng Adoniea a etsa mahlabelo ka linku, le ka lipholo, le ka manamane a nontšitsoeng, a li hlabela Fikanōha, haufi le Seliba sa Rogele. A mema bana babo bohle, e leng bara ba khosi, le banna bohle ba Juda, e leng matona a khosi. 10Empa a se ke a mema moporofeta Nathane, le Benaea, le bahlabani, le Solomone, ngoan'abo.
Leqheka la Nathane le Batesheba
11Nathane a re ho Batesheba, 'm'a Solomone: “Na ha u e-s'o utloe hore Adoniea, mora oa Hagite, e se e le eena khosi, empa Davida, mong'a rōna, a sa tsebe? 12Ka baka leo, ere ke u eletse, u tle u tsebe ho ipholosa, le ho pholosa mora oa hao, Solomone. 13Tsamaea, u ee ho khosi Davida, u fihle u re ho eena: ‘Mong'a ka, khosi ea ka, ha ke re u ne u hlapanyetse lekhabunyane la hao, ua re: “Ruri Solomone, mora oa hao, o tla ntlhahlama, a lule teroneng ea ka?” Joale ho tla joang hore ebe Adoniea ke khosi?’ 14Etlare u sa ntsane u bua le khosi ke kene ke u setse morao, ke fihle ke tiise lipolelo tsa hao.”
15Batesheba a ea ho khosi, ka kamoreng ea eona. Khosi e ne e se e hōlile haholo, 'me Abishake oa Moshuneme o ne a e sebeletsa. 16Batesheba a khumama, a isa hlompho ho khosi.
Khosi ea re ho eena: “U batla'ng?”
17Batesheba a re ho khosi: “Mong'a ka, uena u ne u hlapanyetse lekhabunyane la hao ka lebitso la Morena Molimo oa hao, ua re: ‘Ruri Solomone, mora oa hao, o tla ntlhahlama, 'me a lule teroneng ea ka.’ 18Joale ke mona khosi ke Adoniea, empa uena, mong'a ka, u sa tsebe letho. 19O entse mahlabelo ka lipholo, le ka manamane a nontšitsoeng, le ka linku. O bile o memile le bara bohle ba khosi, le moprista Abiatare, le Joabe, molaoli oa mabōtho, empa ha a ea mema mohlanka oa hao, Solomone. 20Joale mong'a ka, khosi ea ka, Baiseraele bohle ba shebile uena; ba emetse hore u ba bolelle hore na ke mang ea tla u hlahlama. 21Ho seng joalo, etlare ha mong'a ka, khosi ea ka, a se a shoele, ebe ho thoe rōna le mora oa ka Solomone, re mahlabaphieo!”
22Eare a sa ntsane a bua le khosi, moporofeta Nathane a kena. 23Ha bolelloa khosi, ha thoe: “Moporofeta Nathane ke enoa!” Hoba a kene kamoo khosi e leng kateng, a obama, a isa hlompho ho khosi.
24Eaba Nathane o re: “Mong'a ka, khosi ea ka, na u ne u re: ‘Adoniea o tla ntlhahlama, 'me a lule teroneng ea ka’? 25Kajeno o theohile, a ea etsa mahlabelo ka lipholo, le ka linku, le ka manamane a nontšitsoeng. O bile o memile bara bohle ba khosi, le balaoli ba mabōtho, le moprista Abiatare. Joale ba ntse ba e-ja, ba enoa le eena, ba hōoa, ba re: ‘Khosi Adoniea a ke a re phelele!’ 26Ha e le 'na, mohlanka oa hao, le moprista Sadoke, le Benaea, mora oa Jehoeada, le mohlanka oa hao Solomone, ha aa re mema. 27Na ntho ee e entsoe ke mong'a ka, khosi ea ka, empa u e-s'o tsebise bahlanka ba hao hore na ke mang ea tla u hlahlama, a lule teroneng?”
Solomone o hlomamisoa bokhosing
28Khosi Davida a araba, a re: “Mpitsetseng Batesheba!” Batesheba a kena kamoo khosi e leng kateng, a ema kapele ho eona.
29Khosi ea hlapanya, ea re: “Ka Morena ea phelang, ea mpholositseng litsietsing tsohle tsa ka, 30ruri, joalokaha ke ile ka u hlapanyetsa ka lebitso la Morena Molimo oa Iseraele, ka re: ‘Ruri Solomone, mora oa hao, o tla ntlhahlama, a lule teroneng ea ka,’ ke tla fela ke phethahatse kano ena hona kajeno lena.”
31Batesheba a koqama, a obama, a isa hlompho ho khosi, a re: “Mong'a ka, khosi Davida, a ke a re phelele!”
32Eaba khosi Davida o re: “Mpitsetseng moprista Sadoke, le moporofeta Nathane, le Benaea, mora oa Jehoeada!” Ha ba fihla kapele ho khosi, 33khosi ea re ho bona: “Tsamaeang le bahlanka ba mong'a lōna, le qhanehele mora oa ka, Solomone, 'meile oa ka, le theohele le eena Gihone. 34Moprista Sadoke, le moporofeta Nathane, ba mo tlotsetse hona teng, e be khosi ea Baiseraele. Joale le letse lenaka, le hōoe, le re: ‘Khosi Solomone a ke a re phelele!’ 35Ebe joale le nyoloha le mo setse morao, a tle, a tl'o lula teroneng ea ka, e be khosi sebakeng sa ka. Ke eena eo ke mo laetseng hore e be 'musi oa sechaba sa Iseraele le sa Juda.”
36Benaea, mora oa Jehoeada, a araba khosi, a re: “A ho ke ho be joalo! Morena Molimo oa mong'a ka, khosi ea ka, le eena a tiise taba eo! 37Joalokaha Morena a 'nile a ba le mong'a ka, khosi, a ke a be le Solomone, 'me a hōlise 'muso oa hae le ho feta oa mong'a ka, khosi Davida.”
38Bo-moprista Sadoke, le moporofeta Nathane, le Benaea, mora oa Jehoeada, le Bakerete, le Bapelete, ba theoha, ba qhanehela Solomone 'meile oa khosi Davida, ba mo isa Gihone. 39Moprista Sadoke a nka lenaka la ole ka Tenteng, a tlotsa Solomone. Ba letsa lenaka, 'me sechaba sohle sa hōoa, sa re: “Khosi Solomone a ke a re phelele!” 40Sechaba sohle sa nyoloha se mo setse morao, se ntse se letsa makolilo, se thabile haholo hoo litlatse tsa sona li bileng tsa sisinya lefatše.
Adoniea o kenoa ke letsoalo
41Hoba bo-Adoniea, le bamemuoa bohle ba neng ba e-na le eena, ba qete ho ja, ba utloa litlatse. Ha Joabe a utloa molumo oa lenaka, a re: “Lerata le motseng lee, ke la'ng?”
42Eare a sa ntsane a bua, ha fihla Jonathane, mora oa moprista Abiatare. Adoniea a re ho eena: “Atamela koano! Kea tseba hoba u mohale, 'me u re tliselitse litaba tse monate.”
43Jonathane a araba Adoniea, a re: “Ha ho joalo! Mong'a rōna, khosi Davida, o beile Solomone hore e be khosi. 44Khosi e ile ea laela bo-moprista Sadoke, le moporofeta Nathane, le Benaea, mora oa Jehoeada, le Bakerete, le Bapelete, hore ba tsamaee le eena. Ba ile ba mo qhanehela 'meile oa khosi. 45Hoba bo-moprista Sadoke le moporofeta Nathane ba mo tlotsetse Gihone, ba nyoloha ka litlatse, 'me motse oohle oa li amohela. Ke lona lerata leo le le utloang. 46Solomone o se a bile a lutse teroneng. 47Esita le matona a khosi a ile a ea ho ea lebohela mong'a 'ona, khosi Davida, a re: ‘Molimo oa hao a ke a tumise lebitso la Solomone le ho feta la hao, 'me a hōlise 'muso oa hae le ho feta oa hao.’ Khosi ea obama e ntse e le liphateng, 48eaba e re: ‘Ho bokoe Morena Molimo oa Iseraele, eo ka letsatsi lena a beileng e mong oa bara ba ka teroneng, ke sa ntse ke phela.’ ”
49Bamemuoa bohle ba neng a e-na le Adoniea ba tšoha, ba ema, 'me motho ka mong a ea ka tselana ea hae. 50Ka baka la ho tšaba Solomone, Adoniea le eena a tsamaea, a fihla a itšoarella manakeng a aletare. 51Ha bolelloa Solomone, ha thoe: “Adoniea o tšohile khosi Solomone, o bile o itšoareletse manakeng a aletare, o re: ‘Kajeno khosi Solomone a ke a ntlhapanyetse hore a ke ke a bolaea mohlanka oa hae ka sabole.’ ”
52Solomone a re: “Haeba a ka tšepahala, ha ho qōba ea moriri oa hae e tla oela fatše, empa haeba a ka fumanoa a le khopo, o tla bolaoa.” 53Khosi Solomone a rōmela maqosa ho ea mo tlosa aletareng. Adoniea a fihla a obamela khosi Solomone. Eaba Solomone o re ho eena: “E-ea ha hao!”
