Molimo ke khosi le moahlōli oa lefatše
1Binelang Morena sefela se secha,
lōna ba lefatše lohle
le ke le binele Morena.
2Binelang Morena,
bokang lebitso la hae,
ka letsatsi le letsatsi phatlalatsang,
le phatlalatse tsa ho pholosa ha hae.
3Bolelang tsa tlōtla ea hae
har'a lichaba,
le limakatso tsa hae
har'a merabe eohle.
4Morena o moholo,
o lokeloa ke thoriso e kholo,
o tšabeha ho feta melimo eohle.
5Melimo eohle ea balichaba
ke mafeela-felane,
athe Morena
ke eena ea entseng maholimo.
6O eteletsoe pele
ke tlōtla le botlotlehi,
matla le khanya
li Sehalalelong sa hae.
7Thōhōletsang Morena,
lōna lichaba tsa mefuta-futa,
thōhōletsang
tlōtla le matla a Morena.
8Thōhōletsang tlōtla
e lokelang lebitso la Morena,
tloong mabaleng a hae,
le mo nyehelle.
9Khumamelang Morena
le khabile ka tse halalelang,
lefatše lohle le thōthōmele,
le thōthōmele kapele ho eena.
10E-reng ho balichaba:
“Morena ke khosi,
o tiisitse lefatše,
le ke ke la sisinyeha;
o ahlōla lichaba ka ho loka.”
11Maholimo a ke a thabe,
lefatše le nyakalle,
leoatle le hoase
le tsohle tse ka ho lona.
12Naha e nyakalle
le tsohle tse ho eona,
lifate tsa meru li etse litlatse
13kapele ho Morena, hobane oa tla,
o tlil'o ahlōla lefatše.
O tla ahlōla lefatše ka toka,
le lichaba ka 'nete ea hae.
