LIPESALEMA 95

₁Tloong,

a re etsetseng Morena mehoo,

re mo etsetse mehoo ea thabo,

lefika le re pholosang

re le etsetse litlatse.

₂A re itlhahiseng kapele ho eena,

re itlhahise ka teboho,

re mo rokeng ka mehoo ea thabo.

₃Morena ke Molimo e moholo,

ke khosi e kholo,

e phahametseng melimo eohle.

₄Likhohlo tsohle tsa lefatše

li matsohong a hae,

le tsona litlhōrō tsa lithaba

ke tsa hae.

₅Leoatle ke la hae,

ke eena ea le entseng;

lefatše o le bōpile

ka liatla tsa hae.

₆Tloong,

a re itiheleng maotong a hae,

re itihele ka hlompho,

re oeng ka mangoele

kapele ho Morena,

Morena, 'Mōpi oa rōna.

₇Ke eena Molimo oa rōna,

re sechaba se lisoang ke eena,

re mohlape o matsohong a hae.

Kajeno ha le utloa lentsoe la hae,

₈se thatafatseng lipelo tsa lōna

joaloka mohl'a Meriba,

joaloka mohl'a Masa, lehoatateng;

₉moo bo-ntat'a lōna

ba ileng ba nteka teng,

ba 'nonya

leha ba ne ba bone liketso tsa ka.

₁₀Ka halefela molōko oo

ka lilemo tse mashome a mane,

ka ba ka re:

“Ke sechaba se pelo li khelohileng,

ha se tsebe litsela tsa ka.”

₁₁Eaba ke hlapanya ke halefile, ke re:

“Ba ke ke ba ba ba kena,

ba kena phomolong ea ka.”