JOSHUA 18

₁Sechaba sohle sa bana ba Iseraele sa phuthehela Shilo, 'me sa hloma Tente ea Morena hona moo, hobane se ne se se se hapile naha eo. ₂Har'a bana ba Iseraele ho ne ho setse merabe e supileng, e neng e e-s'o ka e abeloa lefa la eona.

₃Eaba Joshua o re ho bana ba Iseraele: “Le tla lika-lika ho le hokae ho ea, le ea hapa naha eo Morena Molimo oa bo-ntat'a lōna, a le neileng eona? ₄Nkhetheleng banna ba bararo morabeng o mong le o mong. Ke tla ba rōma, 'me ba tla ea, ba lekōle naha eo, ba bone hore na e ka aroloa joang hore e be lefa la merabe eo, ebe joale ba khutlela ho 'na. ₅Naha eo le e arōle likarolo tse supileng. Moeli oa morabe oa Juda o tla 'ne o be ka boroa, 'me moeli oa morabe oa Josefa o 'ne o be ka leboea. ₆Naha ena le e arole likarolo tse supileng, ebe le ntlisetsa seo le se ngotseng, 'me ke tla le etsetsa lōtho mona, kapele ho Morena Molimo oa lōna. ₇Balevi bona ha ba na lefa mona har'a lōna, hobane ho ba baprista ba Morena ke lona lefa la bona. Gade, le Rubene, le karolo e 'ngoe ea morabe oa Manase, bona ba se ba fumane lefa la bona ka bochabela, mose oane ho Jorodane, e leng lefa leo Moshe, mohlanka oa Morena, a neng a ba nee lona.”

₈Banna bao ba ema, ba tsamaea. Joshua a laela bao ba eang ho lekōla naha, a re: “E-eang, le lekōle naha eo, le ngole likarolo tsa eona, le nt'o khutlela ho 'na. 'Na ke tla le laolela eona ka lōtho mona Shilo, kapele ho Morena.”

₉Banna bao ba tloha, ba lekōla naha, ba e ngolisa bukeng ho ea ka metse ea eona, ba e arola likarolo tse supileng, joale ba khutlela ho Joshua liahelong tsa Shilo. ₁₀Joshua a ba abela eona ka lōtho, a le Shilo, kapele ho Morena. Joshua a arolela bana ba Iseraele naha eo, ho ea ka merabe ea bona.

₁₁Ba morabe oa Benjamine, ho ea ka malapa abo bona, lōtho la ba abela naha e pakeng tsa bana ba Juda le bana ba Josefa.

₁₂Ka lehlakoreng le ka leboea moeli oa bona o ne o tloha nōkeng ea Jorodane, o nyolosetsa lehlakoreng la Jeriko le ka leboea, o nyolose har'a naha e maralla, ka bophirimela, o e'o fella lehoatateng la Bete-Afene. ₁₃Ho tloha moo moeli o ne o feta lehlakoreng le ka boroa ho Lōse, e leng Bethele, ebe o theohela Atarote-Adare, pel'a thaba e ka boroa ho Bete-Horone e tlase.

₁₄Moeli oa sehoa, oa pota lehlakoreng le ka bophirimela, oa leba boroa, ho tloha thabeng e talimaneng le Bete-Horone ka boroa, oa ea fella Kiriate-Baale, e leng Kiriate-Jearime, motse oa bana ba Juda. Ena e ne e le karolo e ka bophirimela.

₁₅Ka boroa moeli o ne o tloha qetheng ea Kiriate-Jearime, ebe o leba bophirimela, o e'o fihla selibeng sa Nefetoa. ₁₆Joale moeli o theohele qetheng ea thaba e malebana le khohlo ea Mora oa Hinome, e ka leboea ho khohlo ea Refaime. Ho tloha moo o theohele khohlong ea Hinome, lehlakoreng le ka boroa ho Bajebuse, o be o theohele Selibeng sa Rogele. ₁₇Moeli oa sehoa ka leboea, oa ea fella Ene-Shemeshe le Gelelote e malebana le moepa oa Adumime. Ho tloha moo moeli oa theohela Lefikeng la Bohane, mora oa Rubene. ₁₈Oa ikhohla ka phula, oa leba leboea ho Araba, oa nt'o theohela ka phuleng. ₁₉Moeli oa boela oa fetela lehlakoreng le ka leboea ho Bete-Hogola, oa ea fella koung e ka leboea ho Leoatle la Letsoai, ka lehlakoreng le ka boroa ho Jorodane. Ona ke moeli o ka boroa.

₂₀Ka bochabela moeli e ne e le Jorodane. Ena ke eona naha ea morabe oa bana ba Benjamine, le meeli ea eona, ho ea ka malapa abo bona.

₂₁Metse ea morabe oa bana ba Benjamine, ho ea ka malapa abo bona, e ne e le ena: Jeriko, le Bete-Hogola, le Emeke-Kesise, ₂₂le Bete-Araba, le Semaraime, le Bethele, ₂₃le Afime, le Para, le Ofera, ₂₄le Kefare-Amoni, le Ofeni, le Geba. Ke metse e leshome le metso e 'meli.

₂₅Metsana ea eona ke ena: Gibeone, le Rama, le Beerote, ₂₆le Misepa, le Kefira, le Mosa, ₂₇le Rekeme, le Jirepeele, le Tarala, ₂₈le Sela, le Elefe, le Jebuse, e leng Jerusalema, le Gibeata, le Kiriate. Kaofela ha eona ke metse e leshome le metso e mene le metsana ea eona. Ena ke eona naha ea morabe oa bana ba Benjamine, ho ea ka malapa abo bona.