Naha e ileng ea abeloa morabe oa Manase
1Lōtho la abela morabe oa Manase naha, hobane e ne e le letsibolo la Josefa. Ha e le Makiri, letsibolo la Manase, ntat'a Gileade, o ile a abeloa naha ea Gileade, le ea Bashane, hobane e ne e le mahlabani. 2Naha e abiloeng ka lōtho ea e-ba karolo e 'ngoe ea bana ba morabe oa Manase, ho ea ka malapa abo bona; le ea bana ba Abiesere, le ea bana ba Heleke, le ea bana ba Aserele, le ea bana ba Shekeme, le ea bana ba Hefere, le ea bana ba Shemida. Bana e ne e le bana ba batona ba Manase, mora oa Josefa, ho ea ka malapa abo bona.
3Empa Selofehade, mora oa Hefere, mora oa Gileade, mora oa Makiri, mora oa Manase, eena o ne a se na bara, haese barali feela. Mabitso a barali bao e ne e le Mahla, le Nōoa, le Hogela, le Mileka, le Tiresa. 4Barali bana ba tla kapele ho moprista Eleasare, le kapele ho Joshua mora oa Nune, le kapele ho mahosana, ba re: “Morena o laetse Moshe hore a re nee lefa lefeng la likhaitseli tsa rōna.” Ka baka leo, ka taelo ea Morena, Joshua a ba abela lefa lefeng la bana babo ntat'a bona. 5Manase o ile a fumana likarolo tse leshome, ntle ho naha ea Gileade le ea Bashane, e kamose oane ho Jorodane, 6hobane barali ba Manase ba ile ba fumana lefa lefeng la bana ba hae. Naha ea Gileade eona e ile ea e-ba ea bara ba bang ba Manase.
7Moeli oa naha ea Manase o ne o tloha Ashere ho ea fihla Mikemetate, ka bochabela ho Shekeme, ebe o thinyetsa ka letsohong le letona ho leba naheng ea baahi ba Ene-Tapua. 8Naha ea Tapua e ne e le ea Manase, athe motse oa Tapua o neng o le moeling oa Manase, oona e ne e le oa bana ba Efraime. 9Moeli oa theosa ho ea fihla molatsoaneng oa Kana. Metse e ka boroa ho molatsoana oo, e har'a metse ea Manase, eona e ne e le ea Efraime. Moeli oa naha ea Manase o ne o le ka leboea ho molatsoana oo, o il'o fella leoatleng. 10Ka boroa e ne e le ha Efraime, ka leboea e le ha Manase, leoatle e le moeli oa bona. Ka leboea moeli o ne a fihla Ashere, ka bochabela o fihla ha Isakare.
11Naheng ea Isakare le ea Ashere, Manase o ile a abeloa Bete-Sheane le metsana ea eona, le Jibeleame le metsana ea eona, le baahi ba Dore le metsana ea eona, le baahi ba Ene-Dore le metsana ea eona, le baahi ba Taanake le metsana ea eona, le baahi ba Megido le metsana ea eona, le litereke tse tharo tse maralla.
12Leha ho le joalo, bana ba Manase ba ile ba sitoa ho leleka baahi ba metse eo, 'me Bakanana le bona ba ikemisetsa ho lula naheng eo. 13Eare ha bana ba Iseraele ba se ba matlafetse, ba fetola Bakanana makhoba. Empa ha baa ka ba ba leleka ho hang.
Boipelaetso ba morabe oa Josefa
14Bana ba Josefa ba bua ho Joshua, ba re: “Ke ka baka la'ng ha u re file seabo se le seng le karolo e le 'ngoe feela e le lefa la rōna, empa u bona hore re sechaba se seholo, 'me ho fihlela joale Morena a 'nile a re hlohonolofatsa?”
15Eaba Joshua o re ho bona: “Haeba le le sechaba se seholo, nyolohelang morung mane, 'me le hleke lifate naheng ea Baperise, le ea Barefaime, hobane sebaka sena sa naha e maralla se senyenyane bakeng sa lōna.”
16Bana ba Josefa ba re: “Naha e maralla ha ea re lekana. Bakanana bohle ba ahileng naheng e khohlong, le ba ahileng Bete-Sheane le metsaneng ea eona, le ba ahileng khohlong ea Jeserele ba na le likariki tsa ntoa, tse entsoeng ka tšepe.”
17Eaba Joshua o bua le ba ntlo ea Josefa, e leng ba ntlo ea Efraime, le ba ntlo ea Manase, o re: “Le sechaba se seholo, se matla haholo; le ke ke la fumana seabo se le seng feela. 18Naha e maralla e tla ba ea lōna, hobane leha e tletse meru le tla e hleka, e be ea lōna ho ea fihla meeling ea eona. Leha Bakanana ba e-na le likariki tsa ntoa, tse entsoeng ka tšepe, 'me ba le matla, le tla ba leleka.”
