Gideone o hapa likhosi tsa Bamidiane
1Banna ba morabe oa Efraime ba re ho Gideone: “Ke eng ee, eo u re entseng eona, ha u sa ka ua re mema ha u futuhela Bamidiane?” Eaba ba mo nyatsa haholo ka taba ena.
2Gideone a re ho bona: “Seo ke se entseng hase letho ha se bapisoa le seo lōna le se entseng. Na se senyenyane, seo ba morabe oa Efraime ba se entseng, ha se seholo ho feta seo ba morabe oa Abiesere ba se entseng? 3Molimo o neelane ka mahosana a Bamidiane, e leng Orebe le Sebe, matsohong a lōna. 'Na ke entse eng e ka bapisoang le seo le se entseng?” Hoba a bue tjena, khalefo ea bona ea kokobela.
4Eaba Gideone le bahlabani ba makholo a mararo ba neng ba e-na le eena ba tšela nōka ea Jorodane, ba khathetse, empa ba ntse ba phalalisa Bamidiane. 5A re ho banna ba Sukote: “A le ke le fe bahlabani bana ba tsamaeang le 'na bohobe, hobane ba khathetse; 'na ke sa ntse ke phalalisa Seba le Salemuna, likhosi tsa Bamidiane.”
6Empa mahosana a Sukote a re: “Na u se u tšoere Seba le Salemuna, hoo re ka fang bahlabani ba hao bohobe?”
7Eaba Gideone o re: “Ho lokile he, ha Morena a se a neelane ka Seba le Salemuna matsohong a ka, lōna ke tla le shapa ka meutloa le ka leōka la lehoatata.”
8Eaba o nyolohela Penuele, 'me le ho ba Penuele a bua joalokaha a ile a bua ho ba Sukote. Banna ba Penuele le bona ba mo araba joalokaha banna ba Sukote ba ile ba mo araba. 9Gideone a re ho banna ba Penuele: “Ha ke khutlela ho lōna ke ntse ke phela, ke tla heletsa tora ena.”
10Bo-Seba le Salemuna ba ne ba le Karakore, ba e-na le mabōtho a bona, ao e neng e ka ba banna ba likete tse leshome le metso e mehlano. E ne e le bona feela ba neng ba ile ba sala lebōthong la lichaba tsa bochabela. Bahlabani ba neng ba ile ba bolaoa e ne e le likete tse lekholo le mashome a mabeli. 11Gideone a nyoloha ka tsela e sebelisoang ke ba phelang litenteng, ka bochabela ho Noba le Jogeboha, a tsometsa lebōtho leo, a le bolaea. 12Bo-Seba le Salemuna ba baleha, empa Gideone a ba phalalisa. A tšoara likhosi tseo tse peli tsa Bamidiane, e leng Seba le Salemuna, 'me lebōtho lohle la phasaphasa.
13Joale Gideone, mora oa Jōoashe, a khutla ntoeng ka tsela ea Lekhalo la Herese. 14A tšoara mohlankana oa Sukote, a 'motsa lipotso. Mohlanka eo a ngolla Gideone mabitso a mahosana le a baholo ba Sukote, 'me ea e-ba banna ba mashome a supileng a metso e supileng. 15Gideone a fihla ho banna ba Sukote, a re ho bona: “Bonang bo-Seba le Salemuna, bao le ileng la 'nyelisa ka bona, la re: ‘Na bo-Seba le Salemuna u se u ba tšoere, hoo re ka fang banna ba hao, ba khathetseng, bohobe?’ ” 16Gideone a nka baholo ba motse, a nka le meutloa le leōka la lehoatata, 'me ka tsena a shapa banna ba Sukote. 17A heletsa tora ea Penuele, a bolaea banna ba motse oo oa Penuele.
18Joale Gideone a re ho Seba le ho Salemuna: “Banna bao le ba bolaetseng Tabore ba hokae?”
Ba araba, ba re: “Ba ne ba tšoana le uena, e mong le e mong oa bona eka ngoana oa khosi.”
19A re ho bona: “Bao e ne e le bana beso, ba tsoetsoeng ke 'mè. Ke hlapanya ka Morena ea phelang, hore hoja la se ke la ba bolaea, le 'na ke ne nke ke ka le bolaea.” 20A re ho Jetere, letsibolo la hae: “Ema, u ba bolaee!” Empa mohlanka a se ke a tsomula sabole ea hae, hobane o ne a tšaba, kaha a ne a sa le monyenyane.
21Joale bo-Seba le Salemuna ba re ho Gideone: “A ho eme uena ka sebele, u re bolaee, hobane uena u na le matla a bonna.” Gideone a ema, a bolaea bo-Seba le Salemuna; a nka mekhabiso e neng e le melaleng ea likamele tsa bona.
Liketso tse ling tsa Gideone le lefu la hae
22Joale banna ba Iseraele ba re ho Gideone: “Re buse, uena le mora oa hao, le setlōhōlō sa hao, hobane u re namoletse matsohong a Bamidiane.”
23Eaba Gideone o re ho bona: “Nke ke ka le busa, le eena mora oa ka a ke ke a le busa; Morena ke eena ea tla le busa.” 24Gideone a boela a re ho bona: “Ke etsa kōpo ho lōna ea ho re e mong le e mong oa lōna a ke a 'nee masale ao a a hapileng.” Lira tsa bona li ne li e-na le masale a entsoeng ka khauta, hobane e ne e le Baishemaele.
25Ba araba, ba re: “Re tla u nea 'ona re sa khanane.” Ba ala kobo fatše, monna e mong le e mong a akhela masale ao a a hapileng holim'a eona. 26Boima ba masale ao Gideone a neng a ile a a kōpa ea e-ba likilo tse ka bang mashome a mabeli, ntle ho likharetsana, le mekhabiso, le liaparo tse entsoeng ka lesela le perese, tse neng li aparoa ke likhosi tsa Midiane; le kantle ho liketane tse neng li le melaleng ea likamele tsa bona. 27Ka tsena eaba Gideone o etsa setipe seo a ileng a se bea kahar'a motse oa hae oa Ofera. Baiseraele bohle ba koenehela Morena ba khumamela setipe seo, 'me sa fetoha leraba ho Gideone le ho ba lelapa la hae.
28Bamidiane ba kokobetsoa joalo, kapele ho bana ba Iseraele, ba se ke ba hlola ba tsosa mohlahla. Mehleng eo ea Gideone naha ea e-ba le khotso ka lilemo tse mashome a mane.
Abimeleke, mora oa Gideone
29Jerubaale, e leng Gideone, mora oa Jōoashe, a boela ha hae, a lula teng. 30Gideone a ba le bara ba mashome a supileng, ba tsoetsoeng ke eena, hobane o ne a nyetse basali ba bangata. 31Mosali oa hae oa lefielo, ea neng a phela Shekeme, le eena a mo tsoalla mora, 'me a mo rea lebitso la Abimeleke. 32Gideone, mora oa Jōoashe, a shoa a se a tsofetse haholo, 'me a epeloa lebitleng la ntat'ae Jōoashe, sebakeng sa Ofera ea Baabiesere.
33Eare hang-hang hoba Gideone a shoe, bana ba Iseraele ba koenehela Morena hape, ba sebeletsa bo-Baale, ba iketsetsa Baale-Berite hore e be molimo oa bona. 34Bana ba Iseraele ba se ke ba hlola ba sa hopola Morena Molimo oa bona, ea neng a ile a ba namolela matsohong a lira tsohle tsa bona, tse neng li ba pota-potile. 35Lelapa la Jerubaale, e leng Gideone, ba se ke ba hlola ba le bontša teboho ea letho, bakeng sa molemo oohle oo Gideone a ileng a o etsetsa Baiseraele.
