Gideone o hlōla Bamidiane
1Jerubaale, e leng Gideone, le sechaba sohle sa hae, ba tsoha e sa le hoseng, ba hloma pel'a seliba sa Harode. Liahelo tsa Bamidiane li ne li le ka leboea ho bona, ka khohlong, pel'a leralla la More.
2Morena a re ho Gideone: “Batho bao u nang le bona ba bangata haholo, hoo nke keng ka neelana ka Bamidiane matsohong a bona, esere Baiseraele ba ikhōhōmōsetsa 'na, ba re: ‘Ke rōna ba ipholositseng.’ 3Ka baka leo, bolella sechaba sohle, u re: ‘Mang kapa mang ea tšabang, ea thōthōmelang, a hle a khutle, a tlohe thabeng ea Gileade e sa le hoseng.’ ” Sechaba se ileng sa khutla ea e-ba likete tse mashome a mabeli a metso e 'meli, 'me ha sala likete tse leshome feela.
4Eaba Morena o re ho Gideone: “Sechaba se sa le sengata. Se theolele metsing, 'me ke tla u khethela sona hona moo. Eo ke tla re ho uena: ‘Enoa o tla ea le uena,’ o tla ea le uena, 'me ofe kapa ofe eo ke tla re ho uena: ‘Enoa a ke ke a ea le uena,’ eo a ke ke a ea.”
5Gideone a theolela sechaba metsing, 'me Morena a re ho eena: “Mang kapa mang ea qaphang metsi ka leleme la hae, joaloka ntja ha e qapha metsi, eo u tla mo emisa ka lehlakoreng le leng. Ka mokhoa o joalo, mang kapa mang ea khumamang ka mangoele ha a e-noa, le eena u mo emise ka lehlakoreng lesele.” 6Palo ea ba ileng ba qapha metsi a le liatleng tsa bona ea e-ba makholo a mararo, empa ba bang bohle bona ba khumama ka mangoele, ba noa metsi.
7Eaba Morena o re ho Gideone: “Ke tla le namolela ka banna ba makholo a mararo, ba ileng ba qapha metsi, ke neelane ka Bamidiane matsohong a hao. E-re batho ba bang bohle ba tsamaee, e mong le e mong a ikele ha hae.” 8Ba nka lijo tsa sechaba, le manaka a bona. E mong le e mong oa banna bohle ba Baiseraele a rōmeloa tenteng ea hae, empa banna ba makholo a mararo bona ba sala. Liahelo tsa Bamidiane li ne li le tlas'a bona, ka khohlong.
9Ka bona bosiu boo Morena a re ho Gideone: “Tsoha, u theohele liahelong tsa Bamidiane, hobane ke neelane ka tsona matsohong a hao. 10Haeba u tšaba ho theoha u le mong, theohela teng le Pura, mohlanka oa hao. 11Teng u tla utloa tseo ba li buang. Kamora' moo u tla matlafala, 'me u be le sebete sa ho futuhela liahelo tsa bona.” Eaba bo-Gideone le Pura, mohlanka oa hae, ba theohela karolong e kathōko-thōko ea liahelo tseo bahlabani ba neng ba le ho tsona.
12Bamidiane, le Baamaleke, le lichaba tsa bochabela, ba ne ba hoaramane ka khohlong joaloka boieane ba litsie. Likamele tsa bona li ne li ke ke tsa baloa, li le kaa ka lehlabathe le lebōpong la leoatle ka bongata.
13Ha Gideone a fihla a utloa monna e mong a phetela molekane oa hae toro eo a e lorileng, a re: “Mamela, ke lorile toro, 'me ka bona kuku e entsoeng ka phofo ea harese e thetehela kahar'a liahelo tsa Bamidiane. Ea fihla tenteng, ea e thula, eaba tente ea oa, ea phethoha, e putlama fatše.”
14Molekane oa hae a araba, a re: “Toro ena ha e bolele letho, haese sabole ea Gideone, mora oa Jōoashe, monna oa Moiseraele. Molimo o neelane ka Bamidiane le lebōtho lohle matsohong a hae.”
15Ha Gideone a se a utloile tsa toro le tlhaloso ea eona, a khumama, a nt'o khutlela liahelong tsa Baiseraele. A fihla, a re: “Tsohang, hobane Morena o neelane ka lebōtho la Bamidiane matsohong a lōna.”
Bamidiane ba futuheloa ka tsometso
16Gideone a arola bahlabani ba makholo a mararo lihlopha tse tharo. A nea monna e mong le e mong lenaka, le mopotjoana o se nang letho, haese serumōla feela kahar'a oona. 17Eaba Gideone o re ho bona: “Ntalimeng, 'me le nketsise. Bonang mona, e tle ere ha ke fihla kathōko-thōko ho liahelo, le nketsise. 18Ha 'na le bohle bao ke nang le bona re letsa manaka, le lōna le tle le letse manaka ka mahlakoreng 'ohle a liahelo, 'me le re: ‘Ka Morena le ka Gideone!’ ”
19Ka mokhoa o joalo Gideone le banna ba nang le eena ba fihla thekōng e kathōko-thōko ea liahelo har'a mpa ea bosiu, ha ho kena balebeli ba bosiu. Ba letsa manaka, ba pshatla mepotjoana e matsohong a bona. 20Banna ba lihlopheng tsena tse tharo ba letsa manaka, ba pshatla mepotjoana, ba nka lirumōla ka matsoho a matšehali, ka a matona ba nka manaka ao ba tla a letsa, ba hōoa, ba re: “Ka sabole ea Morena le ea Gideone!” 21Monna e mong le e mong a ema thekōng ea hae ho pota-pota liahelo. Mabōtho 'ohle a ba lireng a ne a matha, a hōoeletsa, a ntse a baleha.
22Ha Baiseraele ba letsa manaka a makholo a mararo, Morena a etsa hore Bamidiane ba hlabane ka lisabole, har'a lebōtho lohle la bona. Lebōtho leo la baleha, la ea fihla Bete-Shita, nq'a Serera, le ho ea fihla moeling oa Abele-Mehola, pel'a Tabate. 23Baiseraele ba morabe oa Nafthali, le ba morabe oa Ashere, le ba morabe oohle oa Manase, ba hlabeloa mokhosi, 'me ba phalalisa Bamidiane.
24Eaba Gideone o rōmela maqosa naheng eohle ea Efraime e maralla, o re: “Theohang, le futuhele Bamidiane. Le ba thibele maliboho a Jorodane, ho ea fihla Bete-Bara.” Banna bohle ba morabe oa Efraime ba phutheha, 'me ba thiba maliboho a Jorodane, ho ea fihla Bete-Bara. 25Ba tšoara mahosana a mabeli a Bamidiane, e leng Orebe le Seba. Ba bolaela Orebe lefikeng le Orebe, Seba eena ba 'molaela setlhōtlelong sa Seba. Ba phalalisa Bamidiane, 'me hlooho ea Orebe le hlooho ea Seba ba li isa ho Gideone a le mose ho Jorodane.
