ESAEA 42

₁“Bonang, Mohlanka oa ka

eo ke mo khethileng, ke eo,

mokhethoa oa ka ea nkhahlang;

ke theoletse Moea oa ka,

ka o theolela holim'a hae,

o tla tlisetsa lichaba toka.

₂Ha a ka ke a hōoeletsa

kapa a phahamisa lentsoe,

kapa a peroha har'a literata.

₃Ha a ka ke a roba

lehlaka le tenyetsehile,

ha a ka ke a tima lebone,

a le tima le taitsa.

O tla ahlōla bohle ka botšepehi.

₄Ha a ka ke a thekesela

kapa a nyahama pelo,

ho fihlela a tsitsisa toka lefatšeng.

Lihlekehleke li tla itšepela molao,

li itšepele molao oa hae.”

₅Morena Molimo o bua tjena,

eena ea bōpileng maholimo

a ba a a ala,

ea phutholotseng lefatše

le tsohle tse ho lona,

ea neang baahi ba lona

moea o ba phelisang,

le bophelo ho bohle

ba phelang ho lona:

₆“'Na Morena, ke u bitsitse

hobane ke lokile;

ke tla u utla ka letsoho,

ke u boloke,

ka uena

ke etse selekane le balichaba,

ka uena

ke tlisetse balichaba leseli.

₇U tla tutubolla mahlo a lifofu,

u lokolle batšoaruoa,

u ba lokolle lichankaneng,

u lokolle ba lutseng,

lefifing la chankana.

₈“Ke 'na Morena,

lena ke lona lebitso la ka!

Nke ke be ka nea e mong

tlōtla ea ka,

kapa melimo ea bohata

tlotliso ea ka.

₉Bonang, tsa pele li se li fetile,

joale ke le bolella tse ncha;

ke le phatlalletsa tsona

li e-s'o etsahale.”

₁₀Binelang Morena sefela se secha,

mo tlotliseng

ho tloha pheletsong tsa lefatše,

lōna ba sesisang likepe leoatleng,

le libopuoa tsohle

tse phelang leoatleng,

lōna lihlekehleke,

le bohle ba phelang ho tsona.

₁₁Lehoatata le metse ea lona

le ke le hōoe,

metsana ea Bakedare e nyakalle.

Baahi ba Sela ba bine ka thabo,

ba hōoe

ba le litlhōrōng tsa lithaba.

₁₂Ba ke ba tlotlise Morena,

ba phatlalatse

thoriso ea hae lihlekehlekeng.

₁₃Morena o tla futuha

joaloka mohale ea matla,

joaloka mohlabani

o tla tsosa cheseho ea hae;

o tla hōoa,

a hlabe mokhosi oa ntoa,

lira tsa hae le tsona a li ripitle.

₁₄“Ke khale ke khutsitse,

ke thōtse, ke itšoere,

empa joaloka mosali

ea bohlōkōng ba pelehi

ke tla hōoeletsa ke bipetsane,

ke feheloa.

₁₅Ke tla thua lithaba le maralla,

ke omeletse limela tsohle,

limela tsohle tse ho 'ona,

linōka ke tla li fetola,

ke li fetole lihlekehleke,

matša le 'ona ke a pshese.

₁₆Ke tla tsamaisa lifofu

ka tsela eo li sa e tsebeng,

ke li tataise

tseleng eo li sa e tloaelang;

lefifi ke tla le fetola leseli

kapele ho tsona,

ke batalatse baka tse makukuno.

Tsena ke ntho tseo ke tla li etsa,

'me ha nka ke ka tlohela ho li etsa.

₁₇Empa ba tšepang

melimo ea bohata,

ba reng ho eona:

‘Le melimo ea rōna,’

ba tla khutlisoa

ba hlabiloe ke lihlong.”

₁₈“Mamelang, lōna bo-tsèbètutu!

Talimang le bone, lōna lifofu!

₁₉Sefofu ke mang

haese mohlanka oa ka,

kapa ea tsèbètutu

joaloka morōmuoa oa ka?

Ke mang ea foufetseng

joaloka ea ikabetseng 'na,

ea foufetseng

joaloka mohlanka oa Morena?

₂₀U bone ntho tse ngata,

empa ha u li ele hloko;

tsèbè tsa hao li lethoethoe,

empa ha u utloe letho.”

₂₁Ho khahlile Morena

ka baka la ho loka ha hae,

hore Molao oa hae o be moholo,

o tlōtlehe.

₂₂Empa chaba sena se senyelitsoe,

sa utsoetsoa,

batho bohle ba oetse ka mameneng,

ba patiloe lichankaneng;

batho bohle ba fetohile lelobelo,

ha ho le ea mong ea ba pholosang,

ba senyelitsoe,

ha ho ea reng: “Ba buseletseng!”

₂₃Ke mang oa lōna

ea tla mamela tsee,

eo ho tloha joale

a tla li sekehela tsebe?

₂₄Ea neelaneng ka Jakobo

hore e be lelobelo ke mang?

Ea neelaneng ka Iseraele

ho basenyi ba hae ke mang?

Na hase Morena

eo re mo sitetsoeng?

Ha baa ka ba rata

ho tsamaea ka tsela tsa hae,

ha baa ka ba rata

ho mamela Molao oa hae.

₂₅Kahoo o hlatsitse khalefo ea hae,

a e hlatsetsa holim'a bona,

a hlatsa le bohale ba ntoa,

a bo hlatsetsa holim'a bona.

Khalefo ea ba aparela

ka malakabe,

empa ba se ke ba utloisisa letho,

ea ba tlabola,

empa ba se ke ba e natsa.