ESAEA 43

₁Empa joale, ke sena

seo Morena a se bolelang,

eena ea u bōpileng, uena Jakobo,

eena ea u entseng, uena Iseraele:

“U se ke ua tšaba,

hobane ke u lopolotse;

ke u bitsitse ka lebitso,

ke u bitsitse, u oa ka.

₂Ha u tšela har'a maliba

ke tla ba le uena;

ha u tšela linōka

ha li ka ke tsa u nka.

Ha u tsamaea har'a mollo

ha u ka ke ua cha,

malakabe ha a ka ke a u chesa.

₃Ke 'na Morena Molimo oa hao,

Ea Halalelang oa Iseraele,

Mopholosi oa hao;

ke fana ka Egepeta

hore ke u lopolle,

ke fana ka Kushe le Seba

bakeng sa hao.

₄Kaha u bile ntho'a bohlokoa,

o hlompheha mahlong a ka,

hobane ke u rata,

ke tla fana ka batho

bakeng sa hao,

ke fane ka lichaba

bakeng sa bophelo ba hao.

₅U se ke ua tšaba,

hobane ke na le uena;

litlōhōlō tsa hao

ke tla li lata bochabela,

ke u bokelle u e-tsoa bophirimela.

₆Ho batho ba ka leboea ke tla re:

‘Neelanang ka bona!’

Ho ba ka boroa ke re:

‘Le se ke la hana ka bona!’

Khutlisang bara ba ka

ba e-tsoa hōle,

le barali ba ka

ba lipheletsong tsa lefatše,

₇e leng bohle ba ipitsang

ka lebitso la ka,

bao ke ba bōpileng hore ba ntlotlise,

bao ke ba bōpileng

ka ba ka ba etsa.”

₈Tlisang ba foufetseng

empa ba e-na le mahlo,

bao e leng lithōlō

empa ba e-na le litsèbè.

₉Machaba 'ohle

a phutheha hammoho,

lichaba le tsona lia khōbōkana;

ke mang har'a tsona

ea boletseng tsee,

a b'a re bolella tsa khale-khale?

A ba ke ba tlise

lipaki tsa bona mona,

li tle li pake hore ba nepile,

e le hore li ba utloe,

li re: “Ke 'nete!”

₁₀“Uena Iseraele, u paki ea ka,”

ho rialo Morena,

“u mohlanka oa ka

eo ke mo khethileng,

u tle u tsebe, u lumele ho 'na,

'me u utloisise

hore ke 'na Molimo.

Ha ho molimo

o bopiloeng pele ho 'na,

kapa ha e-ba le o mong

kamorao ho 'na.

₁₁“'Na, 'na ke inotši, ke Morena.

kantle ho 'na ha ho Mopholosi.

₁₂Ke 'na ea senotseng,

ka pholosa, ka phatlalatsa,

ke 'na, e seng molimo o mong osele

o har'a lōna.

Lōna le paki tsa ka

hore ke 'na Molimo,”

ho rialo Morena.

₁₃“E, haesale ke le eena

ho tloha mehleng ea khale,

ha ho ea ka pholosang

se ka seatleng sa ka.

Seo ke se etsang

se ka etsolloa ke mang?”

₁₄Morena, Mopholosi oa hao,

Ea Halalelang oa Iseraele,

o bua tjena:

“Ka baka la lōna

ke tla otla Babilona,

babalehi bohle ba Bakalatiea

ke ba theole,

ke ba theole ba balehele likepeng,

likepeng tseo

ba neng ba ikhantša ka tsona.

₁₅Ke 'na Morena,

Ea Halalelang oa lōna,

'Mopi oa Iseraele, Khosi ea lōna.”

₁₆Morena o bua tjena,

eena ea phuntseng tsela leoatleng,

a seha 'mila

har'a metsi a befileng;

₁₇ea ntšitseng lipere

le kariki tsa ntoa,

a ntša mabōtho

le mekhahlelo ea 'ona,

mabōtho a rapalla moo,

a rapallela ruri,

a felisoa seka lebone le tingoa:

₁₈“Lebalang tsa khale-khale,

tse fetileng le se ke la li nahana.

₁₉Bonang, ke etsa ntho e ncha!

Ke ena e mela, na ha le e bone?

Ke phunya tsela har'a lehoatata,

le linōka naheng e omeletseng.

₂₀Phoofolo tse hlaha

lia ntlhompha,

liphokojoe le limpshe

lia nthorisa,

hobane liliba

ke li cheka lehoatateng,

linōka li phalle

naheng e omeletseng,

ho nyorolla chaba sa ka,

bakhethoa ba ka.

₂₁Sechaba seo ke ipōpetseng sona,

se tla ntumisa ka lithoko.”

₂₂“Empa ha ua ipiletsa ho 'na,

uena Jakobo,

ha ua ikhathatsa ka 'na,

uena Iseraele.

₂₃Ha ua ntlisetsa

konyana tsa secheso,

leha e le ho ntlhompha

ka mahlabelo a hao.

Ha kea ka ka u imetsa

ka ho batla nyehelo tsa lijo,

kapa ka u khathatsa

ka ho u kōpa mokubetso.

₂₄Ha ua ka ua nthekela

hlaka le monko o monate,

kapa ua nthabisa

ka mafura a mahlabelo a hao.

Empa u nkimelitse ka libe tsa hao,

ua ntena ka makhopo a hao.

₂₅'Na, 'na ke inotši,

ke hlakola litšito tsa hao,

ke li hlakola ka baka la ka,

ha ke sa hlola ke hopola

libe tsa hao.

₂₆“Ak'u nkhopotse tse fetileng,

re phehisane khang ka tsona;

bolela kamoo u hlokang

molato kateng.

₂₇Ntat'ao-moholo o ne a etse sebe,

babuelli ba hao ba mphetohela,

₂₈kahoo ke tla tlontlolla

baokameli ba tempele ea hao,

Jakobo eena ke mo abele timelo,

Iseraele eena a nyelisehe.”