Babilona ea ripitloa
1Bona ke boporofeta malebana le lehoatata le pel'a Leoatle:
Joaloka litsokotsane
tse ferellang naheng ea Boroa,
ea futuhang o tla hlaha
a e-tsoa lehoatateng,
a hlahe a e-tsoa naheng,
naheng ea matšabeho.
2Ke bontšitsoe pono e tšosang:
Moeki oa èka,
motimetsi oa timetsa.
Futuha uena Elame!
Thibella uena Media!
Matšabeho 'ohle ke tla a felisa!
3Theka la ka le opa habōhlōko,
ke tšoeroe ke mahlaba
sa mosali a kena tlung,
ke kotlobane
hoo ke sitoang ho utloa,
ke tšohile
hoo ke sitoang ho bona.
4Pelo ea ka ea uba,
ke thōthōmela ke tšabo,
shoalane eo ke e hlolohetsoeng
e nkenyelitse letsoalo.
5Lijo li se li lokile,
meseme e se e aliloe,
hoa jeoa, ho bile hoa nooa.
Emang lōna mahosana,
thèbe tsa lōna le li tlotse ka ole.
6Morena o itse ho 'na:
“Tsamaea u e'o bea seboholi,
se tle se bēhe seo se se bonang.
7Ha se bona bapalami
ba lipere ka bobeli,
se bona bapalami
ba litonki le ba likamele,
se ke se be seli, se be seli haholo.”
8Seboholi sa hlaba mokhosi, sa re:
“Mong'a ka, ke qeta letsatsi
ke eme holim'a tora,
masiu a ntšèlla ke ntse ke lebetse.”
9Bonang, ho tla bapalami
ba lipere ka bobeli!
Seboholi sa boela sa bua, sa re:
“Babilona e oele! Babilona e oele!
Tšoantšo tsa melimo ea bohata,
melimo e betliloeng,
li bjaramane, li hasantsoe fatše!”
10Oho, chaba sa ka
se ripitliloeng seotlong,
joaloka koro,
ke le bolella seo ke se utloileng,
ke se utloa ho Moren'a mabōtho,
Molimo oa Iseraele.
Molimo o otla Duma
11Bona ke boporofeta malebana le Duma:
Ke hōoeletsoa ke motho a le Seire, o re:
“Seboholi,
ekaba bosiu bo tla sa neng?
Seboholi,
ekaba bosiu bo tla sa neng?”
12Seboholi sa araba, sa re:
“Tsatsi le tla chaba,
ho boele ho phirime.
Ha le rata ho botsa, botsang!
Le boele le khutle
le tl'o botsa hape!”
Molimo o tla otla Arabia
13Bona ke boporofeta malebana le Arabia:
Lōna mekoloko ea batsamai,
batsamai ba Badedane,
robaletsang matsoatlareng a Arabia.
14Lōna baahi ba naha ea Tema,
tlisang metsi ho ba nyoriloeng;
tlisang lijo ho baphaphathehi.
15Ba balehile sabole
e ntšitsoe selateng,
ba baleha liqha le malakabe a ntoa.
16Morena o buile tjena ho 'na: “Etlare ho e-s'o fete selemo, ho ea kamoo mohlanka a balang lilemo kateng, botlotlehi ba Kedare bo be bo felile. 17Masalla a bo-rametsu, e leng bahale ba Kedare, a tla ba 'maloana.” Morena Molimo oa Iseraele, o boletse joalo.
