ESAEA 20

₁Ka selemo seo molaoli e moholo a neng a tle Ashedode ka sona, a rōmiloe ke Saregone, khosi ea Asiria, molaoli eo a futuhela Ashedode, 'me a e hapa. ₂Ka eona nako eo Morena a bua ho Esaea, mora oa Amose, a re ho eena: “Hlōbōla lesela le mahoashe leo u le apereng, u rōle le meqathatso maotong a hao.” Esaea a etsa joalo, a tsamaea a hlōbōtse, a sa roala letho maotong.

₃Eaba Morena o re: “Joalokaha Esaea, mohlanka oa ka, a ile a tsamaea ka lilemo tse tharo a hlōbōtse, a sa roala letho maotong, hoo e le pontšo le sesupo se etsetsoang Egepeta le Kushe; ₄ka mokhoa o joalo khosi ea Asiria e tla thōpa batho ba Egepeta le ba Kushe, bana le maqheku, eba thōpe ba hlōbōtse, ba sa roala letho maotong, libono li le kantle, e le ho hlabisa Baegepeta lihlong. ₅Ba neng ba tšepile Kushe, 'me ba ithorisa ka Egepeta ba tla tšaba, ba hlajoe ke lihlong. ₆Mohlang oo, sechaba se ahileng lebōpong lena, se tla re: ‘Bonang se hlahetseng bao re neng re ba tšepile, bao re bileng ra phallela ho bona ho ea kōpa thuso, hore re namoleloe matsohong a khosi ea Asiria! Joale rōna re ka phonyoha joang?’ ”