Motho ea etsang sebe o tla shoa
1Lentsoe la Morena la fihla ho 'na hape, la re: 2“Lōna batho le bolela'ng ka maele aa, ha le bua ka naha ea Iseraele, le re;
“ ‘Bo-ntat'a ba jele morara o bolila,
joale meno a bana aa thela’?
3“Kea le hlapanyetsa, ho rialo Morena Molimo, le ke ke la hlola le sebelisa maele ana naheng ea Iseraele. 4Bonang mona, motho e mong le e mong ke oa ka; ntat'a le eena mora, bobeli ba bona ke ba ka. Motho ea etsang sebe o tla shoa!
5“Empa ha motho a lokile,
a etsa ho lokileng, ho nepahetseng;
6a sa jele bakeng tsa borapeli,
bakeng tse lithabeng,
a e-s'o rapele
melingoana ea Iseraele;
a e-s'o silafatse
mosali oa monna e mong,
kapa a robala le mosali
ea nang le lehatlelo;
7motho ea e-s'o ka a hatella motho,
ea buselelitseng moalimi,
a 'museletsa peeletso ea hae,
ea e-s'o tlatlape motho,
a mo tlatlapa ka mahahapa,
empa a fepa ba lapileng,
a ba fepa lijo tsa hae,
ba hlōbōtseng le bona a ba apesa;
8ea sa alimaneng
hore a fumane phaello,
kapa hona ho inkela tsoala e ngata;
ea hanang ho etsa bokhopo,
ea ahlōlelang batho a se na leeme;
9ea mamelang litaelo tsa ka,
melao ea ka a e boloka ka botšepehi;
ea joalo o lokile,
ke eena ea tla phela,
ho rialo Morena Molimo.
10“Empa ha motho eo a e-na le mora oa senokoane, ea tšollang mali, 'me a etsa e 'ngoe ea tsena, 11le hoja ntat'ae eena a e-s'o ka a li etsa:
“A jela bakeng tsa borapeli,
bakeng tse lithabeng,
a silafatsa mosali oa monna e mong;
12a hatella mafutsana le bahloki,
a tlatlapa motho ka mahahapa,
a sa buseletse moalimi
a 'museletsa peeletso ea hae,
a rapela melingoana ea bohata,
a etsa lintho tse manyala;
13a alimana hore a fumane phaello,
a bile a inkela tsoala e ngata.
“Na ea tjee o tla phela? Che, ha a ka ke a ba a phela! Kaha o entse lintho tsena tsohle tse manyala o tla fela a shoe, 'me ebe ke eena ea ipolaileng.
14“Empa ha monna enoa a e-na le mora ea bonang libe tsohle tseo ntat'ae e li etsang, 'me leha a li bona eena a sa li etse:
15“A sa jele bakeng tsa borapeli,
bakeng tse lithabeng,
a e-s'o rapele
melingoana ea Iseraele,
a e'so silafatse
mosali oa monna e mong;
16a e-s'o ka a hatella motho,
a e-s'o batle peeletso ho moalimi,
a e-s'o tlatlape motho,
a mo tlatlapa ka mahahapa,
empa a fepa ba lapileng,
a ba fepa lijo tsa hae,
ba hlōbōtseng le bona a ba apesa;
17ea hanang ho etsa bokhopo,
ea sa alimaneng
hore a fumane phaello,
kapa hona ho inkela tsoala e ngata;
ea joalo o mamela litaelo tsa ka,
le melao ea ka oa e boloka.
“A ke ke a shoa ka baka la bokhopo ba ntat'ae; ruri o tla phela. 18Ha e le ntat'ae eena o tla shoa ka baka la bokhopo ba hae, hobane a hateletse ngoan'abo, a mo tlatlapa ka mahahapa, a ba a etsa tse mpe har'a sechaba sa habo.
19“Empa lōna lea botsa, le re: ‘Ke hobane'ng ha mora a sa jarisoe bokhopo ba ntat'ae?’ Ha mora a entse ho lokileng, ho nepahetseng, a bolokile litaelo tsa ka, a li phethile, ruri o tla phela. 20Motho ea etsang sebe ke eena ea tla shoa. Mora a ke ke a jarisoa bokhopo ba ntat'ae, le ntat'ae a ke ke a jarisoa bokhopo ba mora oa hae. Ho loka ha ea lokileng e tla ba ha hae, bokhopo ba ea khopo le bona e be ba hae.
21“Empa ha ea khopo a furalla libe tsa hae tsohle, tseo a li entseng, 'me a boloka melao ea ka eohle, a etsa ho lokileng, ho nepahetseng, ruri o tla phela, a ke ke a shoa. 22Litšito tsa hae tsohle, tseo a li entseng, a ke ke a hlola a sa li hopotsoa. O tla phela ka baka la liketso tsa hae tse lokileng. 23Na 'na ke thabela lefu la ea khopo, ho e-na le hore a furalle litsela tsa hae, 'me a phele? ho rialo Morena Molimo.
24“Empa ha motho ea lokileng a furalla ho loka ha hae, 'me a etsa bokhopo, a etsa lintho tse manyala, tse etsoang ke motho ea khopo, na motho eo o tla phela? Lintho tsohle tse lokileng tseo a li entseng ha li sa tla boleloa. O tla shoa ka baka la litšito tsa hae, tseo a sitiloeng ka tsona, le ka baka la libe tsa hae, tseo a li entseng.
25“Feela lōna le re: ‘Tsela ea Morena ha ea loka.’ Utloang, lōna ba ntlo ea Iseraele: Na tsela ea ka ha ea loka? Na hase litsela tsa lōna tse sa lokang? 26Ha motho ea lokileng a furalla ho loka ha hae, 'me a etsa bokhopo, o tla shoela ho bona; o tla shoa ka baka la bokhopo boo a bo entseng. 27Empa ha motho ea khopo a furalla bokhopo ba hae, boo a bo entseng, 'me a etsa ho lokileng, ho nepahetseng, a ke ke a shoa. 28Kaha a lemoha litšito tsa hae tsohle, tseo a li entseng, 'me a li furalla, ruri o tla phela, a ke ke a shoa. 29Feela ba ntlo ea Iseraele ba re: ‘Tsela ea Morena ha ea loka.’ Lōna ba ntlo ea Iseraele, na tsela tsa ka ha lia loka? Na hase litsela tsa lōna tse sa lokang?
30“Ka baka leo, lōna ba ntlo ea Iseraele, ke tla ahlōla motho ka mong ho ea ka litsela tsa hae, ho rialo Morena Molimo. Bakang, le furalle litšito tsa lōna tsohle; kahoo bokhopo bo ke ke ba le timetsa. 31Furallang litšito tsa lōna tsohle tseo le sitiloeng ka tsona, le be le pelo e ncha le moea o mocha. Ke hobane'ng ha le rata ho shoa, lōna ba ntlo ea Iseraele? 32Bakang, 'me le phele, hobane ha ho eo ke thabelang lefu la hae, ho rialo Morena Molimo.
