Papiso ea lintsu le morara
1Lentsoe la Morena la fihla ho 'na, la re: 2“Uena ngoan'a motho, etsa selōtho, 'me u phetele ba ntlo ea Iseraele papiso. 3U re ho bona: ‘Morena Molimo o bua tjena:
“ ‘Ntsu e kholo, e mapheo a maholo,
a malelele, a thathaletseng,
a masiba a mangata, a mebala-bala,
ea fihla naheng ea Lebanone,
ea lula kaleng la kedare,
kaleng le holimo-limo.
4Ea qōtha lehlahla le le holimo-limo,
ea ea le lona naheng ea bahoebi
ea le hloma
kahar'a motse oa bahoebi.
5“ ‘Ntsu ea nka le peō ea naha eo,
ea ea e jala mobung oa selokoe,
ea e uta pel'a metsi a noesetsang,
ea e hloma sa lekala la moluoane.
6Peō ea mela, ea e-ba fate sa morara,
morara oa kakachelana,
o thathaletseng;
makala a oona
a melela holimo, ho ntsu,
metso ea oona ea melela tlase,
ea e-ba morara, makala a mela,
a thathalla, a melisa le mahaba.
7“ ‘Ho n'o e-na le ntsu
e 'ngoe hape e kholo,
e mapheo a maholo,
a masiba a mangata;
morara oa lebisa
metso ea oona ho ntsu eo,
le makala a oona a lebisoa ho eona,
hore e o noesetse
ka metsi a mangata
ho feta kamoo o noesetsoang kateng.
8Morara o n'o s'o hlonngoe
mobung oa selokoe,
o hlonngoe pel'a metsi,
metsi a noesetsang,
hore o tl'o melise makala a oona,
o a melise, a bèhè le litholoana,
e be morara oa bohlokoa,
o motle-motle.’
9“E-re ho bona Morena Molimo o bua tjena:
“ ‘Morara o joalo na o ka atleha?
Ha o tl'o fōthōloa ka metso,
thōloana tsa oona
li hlōhōroe, li omelle?
Mahaba a oona 'ohle a tla omella!
Ho o fōthōla ka metso
ho tla ba bobebe,
ha ho hloke matla
kapa letšoele la batho.
10Ha o hlongoa sethopo
na o tla atleha?
Ha o tl'o omella, e be lehohoroana,
ha moea oa bochabela
o fokela ho oona?
O tla omellela moo
o lemiloeng teng.’ ”
Papiso ea hlalosoa
11Lentsoe la Morena la fihla ho 'na hape, la re: 12“Botsa sechaba sena sa bafetoheli, u re: ‘Na ha le tsebe se boleloang ke ntho tsee? Bonang mona, khosi ea Babilona e ile ea fihla Jerusalema, ea thōpa khosi ea Jerusalema le mahosana a eona, bohle ea ba isa Babilona. 13E nkile khosana e 'ngoe ea mali, ea etsa selekane le eona, ea ba ea e hlapantša. E nkile le bahlabani ba naha eo, 14hore 'muso oo o tl'o fokole, o sitoe ho e tsohela matla, o tsitse ka ho boloka selekane se ntse se le joalo. 15Empa khosana e ile ea fetohela khosi ea Babilona, ea rōmela maqōsa a eona Egepeta, ea kōpa hore e thusoe ka lipere le ka bahlabani ba bangata. Na khosana eo e tla atleha? Na ea etsang tse tjee a ka phonyoha? Na a ka senya selekane eaba oa lopoloha?
16“ ‘Kea hlapanya, ho rialo Morena Molimo; ruri o tla shoela Babilona, e leng moo khosi e ileng ea 'mea hore e be khosi e phelang teng, eona khosi eo a nyelisitseng kano eo a ileng a e etsa le eona, a senya le selekane sa khosi eo. 17Esita le Faro, ka lebōtlo la hae le matla, le ka sechaba sa hae se sengata, ha a ka ke a mo thusa ka letho ntoeng, ha sechaba sa Babilona se haha marako a thibella le liqhoboseane hore se tle se bolaee batho ba bangata. 18O nyelisitse kano ka ho senya selekane seo a neng a se hlapanyelitse, a etsa lintho tsena tsohle; kahoo a ke ke a phonyoha.
19“ ‘Ka baka leo, Morena Molimo o bua tjena: Kea hlapanya, ruri ke tla mo otlela kano ea ka eo a e nyelisitseng, le selekane sa ka seo a se sentseng. 20Ke tla mo chehela leraba le tla mo tšoasa, ke mo ise Babilona, 'me hona moo ka mo ahlōlele ho se tšepahale ha hae ka ho mphetohela. 21Baphaphathehi ba hae bohle le mabōtho a hae 'ohle, batho kaofela ba tla bolaoa ka sabole, masalla a bona a qhalanyetsoe hohle lefatšeng, 'me le tla tseba hore ke 'na Morena ea buileng joalo.’ ”
Molimo o etsa tšepiso
22“ ‘Morena Molimo o bua tjena:
“ ‘Le 'na ke tla khaola
kala le holimo-limo,
le holimo-limo la fate sa kedare,
ke le hlome,
ke qōthe lehlahla
kaleng le holimo-limo,
ke le hlome holim'a thaba e telele.
23Ke tla le hloma thabeng,
thabeng e phahameng ea Iseraele;
le tla mela makala,
le bèhè litholoana,
le hōle, e be sefate
se khahlehang sa kedare.
Nonyana tsohle
li tla hahela makaleng a sona,
li lule moriting oa makala a sona.
24Fate tsohle tsa naha li tla tseba.
li tsebe hore ke 'na Morena.
Fate tse telele kea li liha,
tsa likakachelana tsona
ke li hōlise;
tse talana ke li omeletse,
tse omeletseng ebe lia tlōkōma.
“ ‘Na Morena, ke buile,
'me ke tla etsa joalo.’ ”
