Tšebeliso ea makhoba
1“Ena ke melao eo u tla e bea kapele ho Baiseraele:
2“Ha u reka lekhoba leo e leng Moheberu, le tla u sebeletsa ka lilemo tse tšeletseng, 'me ka selemo sa bosupa le tla lokoloha le sa lefe letho. 3Haeba le ile la tla ho uena le le inotši, le tla tloha le le inotši; athe haeba le tlile le mosali, mosali eo oa lona o tla tsamaea le lona. 4Haeba mong'a lona a le nyalisitse, 'me mosali eo a le tsoalla bara kapa barali, mosali eo le bana bao e tla ba ba mong'a lona, 'me lona le tla itsamaela le le inotši.
5“Empa haeba lekhoba le bolla, le re: ‘Ke rata mong'a ka, le mosali oa ka, le bana ba ka, 'me ha ke rate ho lokoloha,’ 6mong'a lona o tla le isa moo ho rapeloang Molimo teng, 'me a le atametse pel'a monyako, kapa pel'a kosene; joale mong'a lona o tla le phunya tsebe ka elese, 'me lekhoba lena le tla mo sebeletsa ho fihlela le e-shoa.
7“Ha motho a rekisa morali oa hae hore e be lekhoba, morali eo a ke ke a lokoloha joaloka lekhoba la monna. 8Haeba le sa khahle mong'a lona, e leng eena ea ikhethetseng lona, o tla lumela hore le lopolloe, empa a ke ke a ba le matla a ho le rekisa ho balichaba, hobane o le thetsitse. 9Ha a le nyalisa mora oa hae o tla le etsetsa moetlo o etsetsoang baroetsana. 10Haeba a nyala mosali e mong, a se ke a le sekisetsa ka lijo, kapa ka liaparo, kapa ka litokelo tsa lona tsa lenyalo. 11Ha a sa le etsetse letho la tsena tse tharo, le tla itsamaela feela, le sa lefa chelete.”
Polao ea motho
12“Ea otlang motho, 'me motho eo a e-shoa, ruri o tla bolaoa. 13Ha a ne a sa mo lalla, a mpa a 'molaile e se ka morero, ke tla u khethela moo a tla balehela teng. 14Empa ha e mong a tsohela motho e mong matla ka boomo, 'me a 'molaea ka bolotsana, leha a ka balehela aletareng ea ka, u tla mo tlosa, a e'o bolaoa.
15“Ea otlang ntat'ae kapa 'm'ae, ruri o tla bolaoa.
16“Motho ea utsoang motho e mong, ebang oa mo rekisa; kapa o fumanoa a sa le matsohong a hae, ruri eo o tla bolaoa.
17“Ea rohakang ntat'ae kapa 'm'ae, ruri o tla bolaoa.”
Melao ho ba khantšang likhōka
18“Ha banna ba phehisana khang, 'me e mong a otla e mong ka lejoe kapa ka setebele, eba eo ha a shoe, o robala liphateng tsa hae feela; 19haeba a ka tsoha, 'me a tsamaea kantle, a ikokotlela ka molamu oa hae, ea mo otlileng a ke ke a fumanoa a le molato, feela o tla lefella nako eo a e lutseng a sa etse letho, a be a mo oke ho fihlela a fola.
20“Haeba motho a otla lekhoba la monna, kapa la mosali ka molamu, 'me le shoela matsohong a hae, ruri lekhoba leo le tla phetetsoa. 21Empa ha le ka phela letsatsi kapa a mabeli, le ke ke la phetetsoa, hobane lekhoba leo ke chelete ea hae.
22“Haeba banna ba loana, 'me ba thula mosali oa moimana, eba mosali eo oa senyeheloa, feela a sa tsoe kotsi, ba mo thutseng ba tla lefisoa ke baahloli ho ea kamoo monna oa mosali eo a ka bolelang kateng. 23Empa haeba ho hlaha kotsi, ho tla lefeletsoa bophelo ka bophelo; 24leihlo ka leihlo, leino ka leino, letsoho ka letsoho, leoto ka leoto; 25ho chesoa ka ho chesoa, leqeba ka leqeba, moupa ka moupa.
26“Haeba motho a otla lekhoba la hae la monna kapa la mosali, leihlong, 'me a qhinyetsa leihlo leo, o tšoanetse ho lokolla lekhoba, e le tefo bakeng sa leihlo la lona. 27Haeba motho a khōrōla leino la lekhoba la hae la monna, kapa leino la lekhoba la hae la mosali, o tla lokolla lekhoba leo, e le tefo bakeng sa leino la lona.”
Melao ea boikarabelo ba beng ba lintho
28“Haeba pholo e hlaba monna kapa mosali, 'me eba oa shoa, ruri pholo eo e tla tlepetsoa ka majoe; nama ea eona e ke ke ea jeoa, 'me mong'a eona ha a na molato. 29Empa ha pholo eo e tloaetse ho hlaba batho, 'me mong'a eona a se a 'nile a hlokomelisoa, feela a sa e lise, joale e hlaba monna kapa mosali, e 'molaea, pholo eo e tla tlepetsoa ka majoe, 'me le mong'a eona o tlo bolaoa. 30Haeba a lefisoa ho pholosa bophelo ba hae, a lefe chelete eohle eo ho thoeng a e lefe. 31Haeba pholo ena e hlaba moshanyana, kapa e hlaba ngoanana, ho tla lateloa kahlolo ena. 32Haeba pholo ena e hlaba lekhoba la monna kapa e hlaba lekhoba la mosali, mong'a eona o tla lefa mong'a lekhoba silefera e etsang boima ba likeramo tse makholo a mararo le mashome a mane a metso e mehlano, 'me pholo eona e tlepetsoe ka majoe.
33“Ha motho a koaholla sekoti, kapa ha motho a cheka sekoti, 'me a sa se koahele, eba khomo kapa tonki e oela ka ho sona, 34mong'a sekoti sena o tla lefa. O tla lefa mong'a phoofolo eo ka chelete, 'me phoofolo e shoeleng e be ea hae.
35“Haeba pholo ea motho e mong e hlaba pholo ea e mong osele, 'me pholo eo e e-shoa, ba tla rekisa pholo e phelang, ba arolelane chelete ea eona, 'me e shoeleng ba e khèkhèthè. 36Kapa haeba ho tsejoa hore pholo eo e tloaetse ho hlaba tse ling, 'me mong'a eona a sa ka a e lisa, o tla lefa pholo e shoeleng ka pholo e phelang, 'me pholo e shoeleng e be ea hae.”
