PHALLO 20

₁Eaba Molimo o bua mantsoe ana 'ohle, o re:

₂“Ke 'na Morena Molimo oa hao, ea u ntšitseng naheng ea Egepeta, moo u neng u le lekhoba teng.

₃“U se ke ua ba le melimo e meng kantle ho 'na.

₄“U se ke ua iketsetsa setšoantšo se betliloeng, leha e le setšoantšo sefe kapa sefe sa ntho e holimo, leholimong; kapa e tlase, lefatšeng; kapa e metsing, katlase ho lefatše. ₅U se ke ua li khumamela, 'me u se ke ua li sebeletsa, hobane 'na Morena Molimo oa hao, ke Molimo ea boulelang, ea otlang bana ka baka la bokhopo ba bo-ntat'a bona, ho isa molōkong oa boraro le oa bone, oa ba ntlhoileng. ₆Empa ba nthatang, ba bōlōkang melao ea ka, ke ba hauhela ho isa melōkong e sekete.

₇“U se ke ua tlaela ka lebitso la Morena Molimo oa hao, hobane Morena a ke ke a tlohela ho otla ea tlaelang ka lebitso la hae.

₈“Hlokomela letsatsi la Sabatha, u le halaletse. ₉U ka sebetsa ka matsatsi a tšeletseng, 'me ua etsa mosebetsi oa hao kaofela, ₁₀empa letsatsi la bosupa ke Sabatha sa Morena Molimo oa hao. Ka letsatsi lena u se ke ua etsa mosebetsi ofe kapa ofe, uena, kapa mora oa hao, kapa morali oa hao, kapa mohlanka oa hao, kapa lekhabunyane la hao, kapa liphoofolo tsa hao, kapa mojaki ea ha hao. ₁₁Ka matsatsi a tšeletseng Morena o ile a etsa leholimo, le lefatše, le leoatle, le lintho tsohle tse ho tsona, 'me a phomola ka letsatsi la bosupa; ka baka lena Morena o ile a hlohonolofatsa letsatsi la Sabatha, a le halaletsa.

₁₂“Hlompha ntat'ao le 'm'ao, e le hore u tle u phele halalele naheng eo Morena Molimo oa hao, a u neang eona.

₁₃“U se ke ua bolaea.

₁₄“U se ke ua feba.

₁₅“U se ke ua utsoa.

₁₆“U se ke ua etseletsa motho e mong.

₁₇“U se ke ua lakatsa hore ntlo ea motho e mong e be ea hao. U se ke ua lakatsa mosali oa hae, kapa mohlanka oa hae, kapa lekhabunyane la hae, kapa pholo ea hae, kapa tonki ea hae, kapa ntho e 'ngoe le e 'ngoe eo e leng ea motho e mong.”

₁₈Sechaba sohle se ne se utloa lialuma, le molumo oa lenaka; se bona mahalima le thaba e fōqōhang mosi, 'me sa thōthōmela, sa emella hōle. ₁₉Eaba se re ho Moshe: “Uena bua le rōna, 'me re tla mamela. Molimo eena a se ke a mpa a bua le rōna, esere ra shoa.”

₂₀Eaba Moshe o re ho sechaba: “Se tšabeng, hobane Molimo o tlile ho le leka, e le hore le tle le mo tšabe, le se ke la etsa sebe.”

₂₁Sechaba sa emella hōle, 'me Moshe a atamela lerung le letšo, moo Molimo a neng a le teng.

₂₂Morena a re ho Moshe: “U tle u bue tjena ho bana ba Iseraele: ‘Le bone hore ke buile le lōna ke le maholimong. ₂₃Le se ke la ba le melimo e meng kantle ho 'na; le se ke la iketsetsa melimo ea silefera, kapa melimo ea khauta.

₂₄“ ‘U tla nketsetsa aletare e bōpiloeng ka mobu, 'me holim'a eona u etsetse mahlabelo a licheso, le mahlabelo a hao a teboho, e leng linku tsa hao, le likhomo tsa hao. Libakeng tsohle tseo ke li khethileng, hore u nkhumamelle ho tsona, ke tla tla ho uena, ke u hlohonolofatse. ₂₅Ha u nketsetsa aletare ka majoe, u se ke ua e haha ka majoe a betliloeng, hobane ho a betla ke ho e silafatsa. ₂₆U se ke ua hloella aletareng ea ka ka mehato, e le hore bofeela ba hao bo se ke ba apohela ho eona.’ ”