Toro ea Nebukadenesare
1Ka selemo sa bobeli sa puso ea hae, Nebukadenesare a lora toro e ileng ea mo tšoenya moeeng, bosiu a hlobaele. 2Eaba khosi e laela hore e bitsetsoe linohe, le balepi ba linaleli, le baloi, le Bakalatiea, hore ba tl'o e hlalosetsa toro eo e e lorileng. Ba fela ba tla, ba fihla ba ema kapele ho khosi.
3Khosi ea re ho bona: “Ke lorile toro, 'me moea oa ka o hlorela ho tseba seo e se bolelang.”
4Bakalatiea ba araba khosi ka Searame, ba re: “A khosi e ke e re phelele! Phetela bahlanka ba hao toro ena, 'me re tla e hlalosa.”
5Khosi ea araba Bakalatiea, ea re: “Morero oa ka o tiileng ke ona: Haeba le ke ke la mpolella toro ena ea ka, la ba la ntlhalosetsa eona, ke tla le tsekolla, matlo a lōna a fetoloe masupi. 6Empa ha le ka mpolella toro ena, la ba la ntlhalosetsa eona, teng ke tla le nea limpho le meputso le tlōtla e kholo. Ka baka leo, mpolelleng toro ena, le be le ntlhalosetse eona.”
7Bakalatiea ba araba hape, ba re: “Khosi a e ke e bolelle bahlanka ba eona toro ena, 'me re tla e hlalosa.”
8Khosi ea araba, ea re: “Ho pepenene ho 'na hore le rata ho ipha nako, hobane le tseba morero oa ka o tiileng. 9Haeba le sa mpolelle toro ena, ke tla le ahlōla ka kahlōlo e tšoanang. Le rerile ho nthetsa ka leshano le ka bolotsana, le tšepile hore ha nako e ntse e feta boemo ba litaba bo tla fetoha. Ka baka lena, mpolelleng toro ena, ke tle ke tsebe hore le ka ntlhalosetsa eona.”
10Bakalatiea ba araba khosi, ba re: “Ha ho motho le ea mong mona lefatšeng ea ka bolellang khosi seo e ratang ho se tseba! Ka baka leo, ha ho khosi, leha e ka ba e kholo kapa e matla, e kileng ea botsa senohe, kapa molepi oa linaleli, kapa Mokalatiea ofe le ofe lintho tse tjena. 11Seo khosi e se batlang se thata haholo, 'me ha ho motho ea ka se bolellang khosi, haese melimo feela, e sa pheleng le batho.”
12Ka baka leo, khalefo ea khosi ea tlōkōma, 'me khosi ea laela hore bahlalefi bohle ba Babilona ba bolaoe. 13Eaba ho phatlalatsoa taelo ea hore bahlalefi ba bolaoe, 'me batho ba ea batla Daniele le metsoalle ea hae hore ba tl'o bolaoa.
Molimo o senolela Daniele toro
14Eaba Daniele o araba ka bohlale le ka kelello, o bua le Arioke, molaoli oa balebeli ba khosi, ea neng a tsoile ho ea bolaea bahlalefi ba Babilona. 15A re ho Arioke, molaoli oa balebeli ba khosi: “Ke ka baka la'ng ha khosi e entse taelo e sehlōhō hakana-kana?” Arioke a hlalosetsa Daniele.
16Eaba Daniele o kena kamoo khosi e leng kateng, o kōpa hore e mo fe nako, a tle a tsebe ho hlalosetsa khosi toro ena.
17Joale Daniele a khutlela lapeng ha hae, 'me taba ena a e tsebisa metsoalle ea hae bo-Hananiea le Mishaele le Asariea. 18A re ba rapele Molimo ea leholimong hore a ba hauhele, a ba hlalosetse sephiri sena, e le hore eena, le metsoalle ea hae, le bahlalefi ba Babilona, ba tle ba se ke ba bolaoa.
19Hona bosiung boo Daniele a senoleloa sephiri sena ka pono. Eaba Daniele o rorisa Molimo ea leholimong.
20Daniele a bua, a re:
“Ho bokoe lebitso la Molimo,
le bokoe kamehla,
hobane bohlale ke ba hae,
le matla ke a hae.
21Linako le mehla
li fetoloa ke eena,
o liha likhosi a b'a li hlomamise;
bahlalefi ba hlalefisoa ke eena,
ba nang le kutloisiso
a ba abele tsebo.
22Liphiri li senoloa ke eena,
tse mafifing le tsona oa li tseba,
leaho la leseli le fumanoa ho eena.
23Uena Molimo
oa baholo-holo ba heso,
kea u leboha, ke bile kea u tlōtla,
uena ea 'neileng bohlale le matla,
ua ntšenolela
seo re se kōpileng ho uena,
ua re senolela
seo khosi e se batlang.”
Daniele o hlalosa toro ea khosi
24Eaba Daniele o ea ho Arioke, eo khosi e neng e mo laetse ho bolaea bahlalefi ba Babilona, o re: “U se ke ua bolaea bahlalefi ba Babilona. Nkise kapele ho khosi, 'me ke tla e hlalosetsa toro eo ea eona.”
25Arioke a isa Daniele kapele ho khosi hang-hang, a re: “Ke fumane e mong har'a Bajuda ba thōpiloeng, ea tla hlalosetsa khosi toro ea eona.”
26Khosi ea botsa Daniele ea neng a bitsoa Beleteshasare, ea re: “Na u ka mpolella toro eo ke e lorileng, ua ba ua e hlalosa?”
27Daniele a araba khosi e ntse e utloa, a re: “Sephiri seo khosi e ratang ho se tseba se ke ke sa hlalosoa ke bahlalefi, balepi ba linaleli, baloi kapa linohe. 28Empa ho na le Molimo leholimong ea senolang liphiri. Ke eena ea tsebisang khosi Nebukadenesare tse tlang ho etsahala mehleng e tlang. Toro ea hao le lipono tseo u li boneng ha u ntse u robetse liphateng tsa hao, ke tsena:
29“Uena khosi, ha u ntse u robetse liphateng tsa hao, u ile ua nahana tse tlang ho etsahala hamorao, 'me ea senolang liphiri a u tsebisa tse tlang ho etsahala. 30Ha e le 'na ke senoletsoe sephiri sena, e seng hobane ke le bohlale ho feta batho ba bang ba phelang, empa e le hore uena khosi, u tle u tsebe tlhaloso ea toro ena, u utloisise le tseo u 'nileng ua li nahana.
31“Uena khosi, eitse ha u sheba, ua bona setšoantšo sa setonanahali. Setšoantšohali sena se neng se eme kapele ho uena se ne se phatsima ka mokhoa o fahlang, sebōpeho sa sona se tšabeha. 32Hlooho ea setšoantšo sena e ne e le ea khauta e hloekisitsoeng, sefuba sa sona le matsoho a sona e le tsa silefera, mpa le lirōpe tsa sona e le tsa lethose. 33Meomo ea sona e ne e le ea tšepe, maoto a sona a entsoe ka tšepe le ka letsopa. 34Ha u ntse u se shebile joalo, lejoe le ile la khephoha, empa le sa khepholoe ke motho, la otla maoto a setšoantšo a entsoeng ka tšepe le ka letsopa, la a thuakanya. 35Eaba tšepe, le letsopa, le lethose, le silefera, le khauta, le tsona lia thuakana, li tšoana le 'mōkō o seotlong ha ho pōloa e le hlabula. Moea oa li fefola, tsa nyamella ruri. Lejoe le ileng la thuakanya setšoantšo la fetoha thabahali e ileng ea bonahala lefatšeng lohle.
36“Ena ke eona toro; joale re tla e hlalosetsa khosi. 37Uena khosi, u khosi ea likhosi, hobane Molimo ea leholimong o u neile 'muso le bolaoli le matla le tlōtla. 38O u neile matla a ho busa batho bohle moo ba phelang teng, le libatana tsa naha, le linonyana tse fōfang; o u entse 'musi oa tsena kaofela. Hlooho ena ea khauta ke uena.
39“ 'Muso oa hao o tla hlahlangoa ke 'muso o mong, o fokolang ho feta ona oa hao, ho nt'o tla oa boraro, e leng oa lethose, o tla busa lefatše lohle. 40'Muso oa bone o tla ba matla joaloka tšepe. Kaha tšepe e thuakanya, e silakanye lintho tsohle, le oona o tla thuakanya, o silakanye joalokaha tšepe e thuakanya lintho tsohle. 41Joalokaha u bone ho entsoe maoto le menoana ka letsopa le ka tšepe, le 'muso oo o tla arohana joalo; o tla 'ne o be le matla a kang a tšepe, joalokaha u bone tšepe e kopantsoe le letsopa le bonolo. 42Joalokaha menoana ea maoto e ne e entsoe ka tšepe le ka letsopa, le 'muso oo o tla ba le matla, o be o be le bofokoli. 43Joalokaha u bone tšepe e kopantsoe le letsopa le bonolo, likhosi le tsona li tla leka ho ikopanya ka ho nyallana, empa li ke ke tsa kopana, joalokaha tšepe e ke ke ea kopana le letsopa.
44“Mehleng ea likhosi tseo, Molimo ea leholimong o tla thea 'muso o ke keng oa hlola o felisoa, o ke keng oa hlōloa ke lichaba tse ling. 'Muso oo o tla thuakanya, o timetse mebuso e meng eohle, empa oona o tla hlola kamehla eohle. 45Joalokaha u bone hore lejoe le ile la khephoha thabeng, le sa khepholoe ke motho, 'me la thuakanya tšepe, le lethose, le letsopa, le silefera, le khauta, Molimo e moholo le eena o tsebisa khosi se tla etsahala mehleng e tlang. Toro ena ke 'nete, le tlhaloso ea eona ke ea 'nete.”
Khosi e putsa Daniele
46Eaba khosi Nebukadenesare o itihela fatše ka sefahleho, o khumamela Daniele, o laela hore a etsetsoe nyehelo, a chesetsoe le mokubetso o monko o monate. 47Khosi ea re ho Daniele: “Kannete Molimo oa lōna ke Molimo oa melimo, ke Morena oa likhosi, ke mosenoli oa liphiri, hobane ke mona u tsebile ho senola sephiri sena.”
48Khosi ea bea Daniele litulong tse phahameng, ea mo etsetsa le limpho tse ngata, tse kholo, ea mo etsa 'musi oa naha eohle ea Babilona, le mookameli oa bahlalefi bohle ba Babilona. 49Ho ea ka kōpo ea Daniele, khosi ea bea bo-Shaderaka le Meshake le Abedenego hore e be batsamaisi ba puso ea naha ea Babilona, Daniele eena ea e-ba monna oa lekhotla la khosi.
