Bo-Daniele baa rutoa
1Ka selemo sa boraro sa puso ea Jehoeakime, khosi ea Juda, Nebukadenesare, khosi ea Babilona, a futuhela Jerusalema, a e etsetsa thibella. 2Morena a neelana ka Jehoeakime, khosi ea Juda, matsohong a Nebukadenesare; a ba a neelana le ka thepa e 'ngoe ea Tempele ea Molimo. Thepa eo Nebukadenesare o ile a e isa naheng ea Babilona, a e bea ka tempeleng ea molimo oa hae, ka tlung ea polokelo ea matlotlo a molimo oa hae.
3Khosi ea laela Ashepenase, mookameli oa bahlanka ba khosi, ho khetha banna ba bang har'a bana ba Iseraele, ba mali a bokhosi le a bohosana. 4A re e be bahlankana ba se nang sepha, ba litjaka, ba rutiloeng bohlale bohle, ba nang le tsebo, ba likelello li chatsi, ba ka tsebang ho sebetsa ka tlung ea khosi. E be ba ka rutoang puo le lingoliloeng tsohle tsa Bakalatiea. 5Khosi ea laela hore ka letsatsi le leng le le leng ba fuoe lijo tse jeoang ke eona, le veine e nooang ke eona. Ba ne ba lokela ho rutoa ka lilemo tse tharo, ba nt'o qala ho sebeletsa khosi.
6Har'a bona ho ne ho e-na le banna ba morabe oa Juda, e leng Daniele le Hananiea, le Mishaele le Asariea. 7Mookameli oa bahlanka ba khosi a ba rea mabitso asele, a re Daniele ke Beleteshasare, Hananiea ke Shaderaka, Mishaele ke Meshake, Asariea ke Abedenego.
8Daniele a qetela ka pelong hore a ke ke a itšilafatsa ka lijo tse jeoang ke khosi, leha e le ka veine e nooang ke eona khosi. Ka baka leo, a kōpa mookameli oa bahlanka ba khosi hore a mo lumelle ho se itšilafatse ka lijo le ka lino tseo. 9Joale Molimo a etsa hore mookameli oa bahlanka ba khosi a hauhele Daniele, a mo utloele bohlōkō. 10Mookameli oa bahlanka ba khosi a re ho Daniele: “Ke tšaba mong'a ka, khosi, ea laetseng hore le fuoe seo le se jang le seo le se noang. Ha a ka bona lifahleho tsa lōna li motetse ho feta tsa bahlankana ba bang, thaka tsa lōna, a ka mpolaea ka baka la lōna.”
11Eaba Daniele o bua le molebeli eo mookameli oa bahlanka ba khosi, a neng a 'meile ho lebela Daniele le Hananiea, le Mishaele le Asariea, o re: 12“Ak'u leke bahlanka ba hao ka matsatsi a leshome feela, re feptjoe meroho feela, re noe metsi feela. 13Kamora' moo u bapise lifahleho tsa rōna le tsa bahlankana ba jang lijo tse jeoang ke khosi, u nt'o etsa ka bahlanka ba hao kamoo u bonang kateng.”
14Molebeli a amohela tlhahiso ena ea bona, 'me ka matsatsi a leshome a ba fepa joalo. 15Kamora' matsatsi a leshome ba ne ba talimeha ba khahleha, ba shahlile ho feta bahlankana bohle ba neng ba feptjoa lijo tse jeoang ke khosi. 16Eaba molebeli o tlosa lijo tsa bona tse hlabosang, le veine eo ba neng ba tšoanela ho e noa, o ba fepa meroho feela.
17Bahlankana bao ba bane Molimo a ba fa tsebo le kutloisiso ea mefuta eohle ea lingoliloeng le ea bohlale. Ha e le Daniele eena a ba le tsebo ea ho hlalosa lipono le litoro tsohle.
18Ha nako e neng e beiloe ke khosi e fetile, mookameli oa bahlanka ba khosi a ba bea kapele ho Nebukadenesare. 19Khosi ea buisana le bona, 'me har'a bona kaofela ha ea ka ea fumana le ea mong ea lekanang le Daniele le Hananiea, le Mishaele le Asariea. Ka baka leo, ba qala ho sebeletsa khosi. 20Litabeng tsohle tsa bohlale le kutloisiso, tseo khosi e neng e ba botsa tsona, e ile ea fumana hore ba feta haleshome linohe tsohle le balepi ba linaleli ba teng kahar'a 'muso oohle oa eona.
21Daniele a lula moo ho fihlela ka selemo sa pele sa puso ea khosi Siruse.
