Solomone o ikhahela ntlo
1Solomone a boela a nka lilemo tse leshome le metso e meraro a ntse a haha ntlo ea hae, ho fihlela a ba a e qeta kahohle-hohle.
2A haha le ntlo e bitsoang Moru oa Lebanone. Bolelele ba eona e ne e le limethara tse mashome a mane a metso e mene, bophara e le limethara tse mashome a mabeli a metso e 'meli, bophahamo e le limethara tse leshome le metso e meraro le halofo. E ne e e-na le mela e mene ea litšiea tsa kedare, 'me holim'a litšiea tseo ho beiloe maballo a kedare. 3E ne e ruletsoe ka mapolanka a kedare, a le hodim'a maballo a tšehelitsoeng ke litšiea. Maballo ana a ne a le mashome a mane a metso e mehlano, mola ka mong o e-na le maballo a leshome le metso e mehlano. 4Maboteng a mabeli a shebaneng, ho ne ho e-na le mela e meraro ea lifesetere leboteng le leng le leng. Lifesetere tseo li ne li tobane hantle. 5Likosene tsa mamati 'ohle, le tsa lifesetere, li ne li le lihuku li 'ne, 'me mela e meraro ea lifesetere e tobane hantle.
6A etsa lethule ka litšiea; bolelele ba lona e le limethara tse mashome a mabeli a metso e 'meli, bophara e le limethara tse leshome le metso e meraro le halofo.
7A etsetsa terone ea hae lethule, e leng lethule la linyeoe, moo a tla ahlōlela teng. Fatše ho ne ho kokoteletsoe mapolanka a kedare.
8Ntlo eo a neng a phela ho eona e ne e le ka lethuleng le leng, e hahiloe joaloka lethule la linyeoe. Solomone a hahela morali oa Faro, eo a neng a mo nyetse, ntlo e joaloka lethule lena.
9Ho tloha mothèong, ho ea fihla pheletsong ea lerako, le lethuleng le leholo, matlo ana 'ohle a ne a hahiloe ka majoe a betliloeng ka makhethe, ho ea ka litekanyetso tsa teng; a koetlisitsoeng kantle le kahare ka lichesele tse meno. 10Mothèo o ne o entsoe ka majoe a makhethe, a melèlèmahali; bolelele ba a mang e le limethara tse tharo le halofo, a mang e le limethara tse 'ne. 11Holim'a ao ho ne ho e-na le majoe a mang a betliloeng ka makhethe, ho ea ka litekanyetso tsa teng, ho bile ho e-na le lifate tsa kedare. 12Lebala le leholo la ntlo ea khosi, le lebala le kahare la Tempele, le lebala la monyako oa Tempele, kaofela a ne a pota-potiloe ke lerako la majoe, le nang le mela e meraro, 'me holim'a lona ho hlomiloe litšiea tsa lifate tsa kedare.
Ho latoa Hirame
13Khosi Solomone a rōma maqosa Tire, ho ea lata Hirame. 14Hirame e ne e le mora oa mosali oa mohlolohali oa morabe oa Nafthali. Ntat'ae e ne e le moahi oa Tire, e le sethuli sa lethose. Le eena Hirame o ne a hlalefile, a e-na le kutloisiso, le masene a ho etsa mesebetsi eohle e etsoang ka lethose. Eaba o tla ho khosi Solomone, 'me a etsa mosebetsi oohle oa khosi.
Litšiea tse peli tsa lethose
15Hirame a bōpa litšiea tse peli tsa lethose; bolelele ba e 'ngoe le e 'ngoe e le limethara tse robeli, botenya e le limethara tse ka bang hlano le halofo. 16Ka lethose le qhibilisitsoeng a bōpa likōtōla tse peli, tse tla beoa holim'a litšiea. Bolelele ba kōtōla e 'ngoe le e 'ngoe e ne e le limethara tse ka bang peli le halofo. 17Likōtōla tse kaholim'a litšiea tsa etsetsoa mekhabiso e 'meli, e lōhiloeng joaloka letlōoa, le meqhaka e lōhiloeng joaloka ketane. Kōtōla e 'ngoe le e 'ngoe ea etsetsoa mekhabiso e supileng. 18A boela a etsa mela e 'meli ea likharenate holim'a mokhabiso o mong le o mong o kang letlōoa; mela eo ea potoloha likōtōla tse holim'a litšiea, ho li khabisa.
19Likōtōla tse holim'a litšiea tse lethuleng li ne li tšoana le likhahla, bolelele ba tsona e le limethara tse ka bang peli. 20Kōtōla e 'ngoe le e 'ngoe e holim'a tšiea, e ne e khabisitsoe ka likharenate tse makholo a mabeli, li entse mela e 'meli, e potolohang mpeng ea kōtōla e 'ngoe le e 'ngoe.
21Hirame a hloma litšiea lethuleng la Tempele. Tšiea e ka letsohong le letona a e bitsa Jakine, e ka letsohong le letšehali a e bitsa Boase. 22Likōtōla tse holim'a litšiea tsa etsetsoa mekhabiso e tšoanang le likhahla, 'me eaba joale mosebetsi oa ho etsa litšiea o phethehile.
Tanka ea lethose
23Joale Hirame a etsa tanka e chitja ka lethose le qhibilisitsoeng. Botebo ba eona e ne e le limethara tse ka bang peli le halofo, bolelele ba boahlamo ba eona e le limethara tse 'ne le halofo, bolelele ba ho e pota-pota e le limethara tse ka bang leshome le metso e meraro le halofo. 24Katlase ho molomo oa eona, ho o pota-pota, ho ne ho e-na le lithōloa tse mela e 'meli, tse bopeletsoeng le tanka ha e etsoa, halofo e 'ngoe le e 'ngoe ea methara e e-na le lithōloa tse leshome.
25Tanka e ne e eme holim'a mekokotlo ea lipholo tse leshome le metso e 'meli; tse tharo li talimile leboea, tse tharo li talimile bophirimela, tse tharo li talimile boroa, tse tharo li talimile bochabela. Tanka e ne e beiloe holim'a mekokotlo ea tsona, li furallane. 26Morumo oa tanka e ne e le limilemethara tse mashome a supileng a metso e mehlano, molomo oa eona o ahlame joaloka oa komiki, o e-na le lithunthung tsa likhahla. E ne e tšèla lilethara tse ka bang mashome a mane a likete.
Kariki ea lethose
27Hirame a etsa likariki tse leshome tsa lethose; bolelele ba kariki ka 'ngoe e le limethara tse ka bang peli, bophara e le limethara tse ka bang peli, bophahamo e le methara le halofo. 28Likariki li ne li entsoe ka mokhoa ona: Mahlakoreng li ne li e-na le mamatjana a fapiloeng ka likosene. 29Mamatjana ana a fapiloeng ka likosene a ne a khabisitsoe ka litšoantšo tsa litau, le tsa lipholo, le tsa likerubime; le likosene li ne li khabisitsoe joalo. Likoseneng tse kaholimo le tse katlase ho litšoantšo tsa litau le tsa lipholo, ho ne ho e-na le mekhabiso e folletsoeng. 30Kariki e 'ngoe le e 'ngoe e ne e e-na le mabili a mane a lethose, le liase tsa lethose. Huku e 'ngoe le e 'ngoe ea lihuku tse 'ne, e ne e e-na le setšehetso sa lethose, se tšehetsang sekotlolo. Litšehetso li ne li khabisitsoe ka meqhaka e folletsoeng. 31Molomo oa sekotlolo o ne o le mochitja, 'me bophahamo ba oona ho tloha kahare e le lisenthimethara tse mashome a mane a metso e mehlano, le lisenthimethara tse leshome le metso e robeli ho ea tlase ho kariki. Ho ne ho betliloe litšoantšo ho se pota-pota. 32Kariki e ne e e-na le mabili a mane, bophahamo ba 'ona e le lisenthimethara tse mashome a tšeletseng a metso e tšeletseng, a le katlas'a mamatjana, liase tsa 'ona li kopane katlase. 33Mabili a ne a entsoe joaloka mabili a kariki. Liase tsa 'ona, le linafo tsa 'ona, le mabanta a 'ona, le lipèkè tsa 'ona, li ne li entsoe ka lethose.
34E 'ngoe le e 'ngoe ea lihuku tse 'ne tsa kariki e ne e e-na le setšehetso, 'me litšehetso tsena li bōpeletsoe 'moho le kariki. 35Kaholimo ho kariki ho ne ho e-na le lebanta le lechitja, bophahamo ba lona e le lisenthimethara tse mashome a mabeli a metso e 'meli; ho bile ho e-na le litšehetso. Litšehetso le mamatjana li ne li bōpeletsoe 'moho le kariki. 36Mamatjaneng le litšehetsong ho ne ho betliloe litšoantšo tsa likerubime, le tsa litau, le tsa lifate tsa lipalema, hohle moo sebaka se neng se le teng, 'me ha pota-potisoa le mekhabiso e folletsoeng. 37Hirame a etsa likariki tseo tse leshome ka oona mokhoa ona, 'me kaofela li ne li lekana ka boholo, li tšoana le ka sebōpeho.
38Joale Hirame a etsa likotlolo tse leshome tsa lethose. Sekotlolo ka seng se ne se tšèla lilethara tse ka bang makholo a robeli; bolelele ba boahlamo ba sona e le limethara tse ka bang peli. E 'ngoe le e 'ngoe ea likariki tse leshome e ne e e-na le sekotlolo sa eona. 39A bea likariki tse hlano ka lehlakoreng le letona la Tempele, le tse ling tse hlano ka lehlakoreng le letšehali la Tempele. Tanka eona a e bea ka boroa bo ka bochabela ho Tempele.
Kakaretso ea mekhabiso ea Tempele
(2 Lik. 4:11 – 5:1)
40Hirame o bōpa lipitsa, a etsa le likharafu, le likotlolo, eaba o qeta mosebetsi oohle oa Tempele ea Morena, oo a neng a o etsetsa khosi Solomone. 41E ne e le lintho tsena: litšiea tse peli, le likōtōla tse peli tse neng li le holim'a litšiea; matlōoa a mabeli a koahelang likōtōla tse peli, tse neng li le holim'a litšiea; 42likharenate tse makholo a mane tsa lethose tse khabisitseng matlōoa a mabeli. Letlōoa ka leng le ne le e-na le mela e 'meli ea likharenate, mola ka mong o e-na le likharenate tse makholo a mabeli, tse khabisang likōtōla tse peli tse neng li le holim'a litšiea; 43likariki tse leshome le likotlolo tse leshome, tse holim'a tsona; 44tanka e le 'ngoe le lipholo tse leshome le metso e 'meli, tse neng li e jere, 45le lipitsa, le likharafu, le likotlolo.
Lintho tsena tsohle tsa Tempele ea Morena, tseo Hirame a ileng a li etsetsa khosi Solomone, li ne li entsoe ka lethose le halimang. 46Khosi ea etsetsa lintho tsena phuleng ea Jorodane, sethulelong se pakeng tsa Sukote le Saretane. 47Lintho tsena tsohle Solomone a se ke a li bea sekaleng, hobane li ne li le ngata haholo; le boima ba lethose bo ne bo sa tsejoe.
48Solomone a etsa thepa eohle ea Tempele ea Morena: aletare ea khauta, le tafole ea khauta, moo ho neng ho beoa bohobe bo halalelang, 49le liluloana tsa mabone tsa khauta e hloekileng, tse beiloeng kapele ho Sehalalelo; tse hlano tsa liluloana li le ka letsohong le letona, tse hlano ka ho le letšehali; le lipalesa, le mabone, le matlao a khauta; 50le likotlolo, le litima-mabone, le matlao, le likhaba, le lipitsana tsa mokubetso tsa khauta e hloekileng, le lihōkelo tsa khauta tsa mamati a Sehalalelo se halalelang ka ho fetisisa, le tsa mamati a ntlo, e leng Tempele.
51Eaba mosebetsi oohle, oo khosi Solomone a neng a o etsetsa Tempele ea Morena, oa phethoa. Joale Solomone a kenya lintho tsohle tseo ntat'ae Davida a neng a li abetse Morena: silefera, le khauta, le lijana, 'me tsena a li bea har'a matlotlo a Tempele ea Morena.
