1 LIKHOSI 6

₁Ka selemo sa makholo a mane le mashome a robeli bana ba Iseraele ba tsoile Egepeta, ka khoeli ea e Motšeanong, e leng khoeli ea bobeli selemong sa bone Solomone a busa naha ea Iseraele, Solomone a qala ho haha Tempele ea Morena.

₂Bolelele ba Tempele eo khosi Solomone a neng a e hahela Morena e ne e le limethara tse mashome a mabeli a metso e supileng, bophara e le limethara tse robong, bophahamo e le limethara tse leshome le metso e meraro le halofo. ₃Bolelele ba lethule le kapele ho Tempele e ne e le limethara tse 'ne le halofo, bophara ba lona e le limethara tse robong, ho lekana le bophara ba Sehalalelo. ₄Tempele ena a e etsetsa lifesetere tse nang le lesira la mapolanka.

₅Kantle ho Tempele a haha likamore tse nang le lisolloro tse tharo, tse hlomathisitsoeng marakong a Tempele ho e pota-pota. ₆Bophara ba solloro e katlase-tlase e ne e le limethara tse ka bang peli le halofo, bophara ba e hare e le limethara tse ka bang tharo, 'me bophara ba e kaholimo-limo e le limethara tse ka bang 'ne. Bophara ba lerako la Tempele bo ne bo sesefala ha lerako le ntse le e-ea holimo, kaha le ne le siile likhetše tse tla tšehetsa lifate tsa solloro, hore li se ke tsa hahelloa lerakong la Tempele.

₇Tempele e ne e hahiloe ka majoe a ileng a betleloa moo a chekiloeng teng, e le hore ho se be lerata la noto, kapa la chesele, kapa la tšepe efe le efe le ka utloahalang ka Tempeleng ha e ntse e hahuoa.

₈Monyako oa solloro e katlase-tlase o ne o le ka letsohong le letōna la Tempele. Batho ba ne ba nyoloha ka mehato e itsoapang ho ea kena sollorong ea bobeli, 'me ba tsoe ho eo ea bobeli, ba e'o kena ho ea boraro. ₉Ha Solomone a se a qetile ho haha lerako la Tempele, a e fera ka lifate, a e rulela ka mapolanka a kedare. ₁₀Joale a hlōmathisa lisolloro, tsa hahelloa lerakong la Tempele, ho e pota-pota; bophahamo ba e 'ngoe le e 'ngoe ea lisolloro e le limethara tse ka bang tharo, 'me lisolloro tsa kopanngoa le lerako ka lifate tsa kedare.

₁₁Eaba lentsoe la Morena le fihla ho Solomone, le re: ₁₂“Ha e le mona u haha Tempele ena, tseba hore haeba u ka tsamaea ho ea ka litsela tsa ka, ua phethahatsa likahlōlo tsa ka, ua bōlōka melao ea ka, ua tsamaea ka eona, 'na ke tla phethahatsa tšepiso ea ka ho uena, eo ke neng ke e etsetse Davida, ntat'ao. ₁₃Ke tla phela har'a bana ba Iseraele, 'me nke ke ka furalla sechaba sa ka sa Iseraele.”

₁₄Eaba Solomone o haha Tempele, oa e qeta.

₁₅Ho tloha moralong oa Tempele, ho ea fihla marulelong a eona, mabota a manehoa mapolanka a kedare, 'me fatše ho Tempele teng ha kokotelloa mapolanka a sefate sa molutu. ₁₆Motšeo ho Tempele a haha motero ka mapolanka a kedare, a o haha ho tloha fatše ho ea fihla marulelong. Bophahamo ba oona e ne e le limethara tse robong, o sirelelitse Sehalalelo le Sehalalelo se halalelang ka ho fetisisa. ₁₇Bolelele ba Tempele, bo ka koano ho motero, e ne e le limethara tse leshome le metso e robeli. ₁₈Mapolanka a kedare, a maboteng a kahare, a ne a betliloe, ho entsoe lithōloa le lithunthung. Mabota a ne a koahetsoe ka kedare, ho se na lejoe le bonahalang.

₁₉Motšeo-tšeo ho Tempele a haha Sehalalelo, kamoo ho tla bōlōkoa areka ea selekane sa Morena kateng. ₂₀Bolelele ba Sehalalelo sena e ne e le limethara tse robong, bophara e le limethara tse robong, bophahamo e le limethara tse robong, 'me se manehiloe khauta e hloekileng. Le aletare ea mapolanka a kedare a e maneha khauta. ₂₁Solomone a maneha bokahare ba Tempele ka khauta e hloekileng; monyakong o kenang ka Sehalalelong se halalelang ka ho fetisisa, se neng se manehiloe khauta le sona, a etsa lesira ka liketane tsa khauta. ₂₂Bokahare bohle ba Tempele a bo maneha khauta ho fihlela mobota 'ohle a koahelehile. Le aletare eohle, e neng e le pel'a Sehalalelo, a e maneha khauta.

₂₃Ka Sehalalelong a etsa likerubime tse peli ka sefate sa mohloaare, bophahamo ba kerubime ka 'ngoe bo feta-feta limethara tse 'ne. ₂₄Bolelele ba lepheo ka leng la kerubime ea pele bo ne bo feta-feta limethara tse peli, 'me bolelele ba ho tloha ntlheng ea lepheo le leng ho isa ntlheng ea lepheo le leng bo feta-feta limethara tse 'ne. ₂₅Le bolelele ba kerubime ea bobeli bo ne bo feta-feta limethara tse 'ne. Likerubime tsena tse peli li ne li lekana ka boholo, li tšoana le ka sebōpeho. ₂₆Bophahamo ba kerubime e 'ngoe le e 'ngoe bo ne bo feta-feta limethara tse 'ne. ₂₇Likerubime tsena a li bea bohareng ba Sehalalelo se halalelang ka ho fetisisa, mapheo a tsona a thathaletse, hoo ntlha ea lepheo la kerubime e 'ngoe e neng e thetsitse lebota le leng, le ntlha ea lepheo la kerubime ea bobeli e thetsitse lebota le leng, 'me lintlha tsa mapheo a mang li kopane bohareng ba Sehalalelo se halalelang ka ho fetisisa. ₂₈Likerubime tsena a li maneha khauta.

₂₉Maboteng 'ohle a Tempele le a Sehalalelo, ho a pota-pota, a betla litšoantšo tsa likerubime, le tsa lifate tsa lipalema, le tsa lithunthung. ₃₀Fatše ho Tempele le ho Sehalalelo a maneha khauta.

₃₁Monyako oa Sehalalelo oa etsetsoa mamati a mabeli ka sefate sa mohloaare; likosene li ne li entse lihuku tse hlano. ₃₂Mamati a mabeli oa le 'ona a ne a entsoe ka sefate sa mohloaare; holim'a 'ona Solomone a betla litšoantšo tsa likerubime, le tsa lifate tsa lipalema, le tsa lithunthung. Holim'a mamati ao, le holim'a litšoantšo tsa likerubime le tsa lifate tsa lipalema, a maneha khauta. ₃₃Lemati la monyako oa Tempele le lona a le etsetsa likosene tsa sefate sa mohloaare tse mahlakore a mane. ₃₄Mamati ao a mabeli a ne a entsoe ka sefate sa molutu; le leng le le leng le e-na le likarolo tse peli, tse menahanang ha le buloa. ₃₅Holim'a 'ona Solomone a betla litšoantšo tsa likerubime, le tsa lipalema, le tsa lithunthung, 'me litšoantšo tseo a li maneha khauta.

₃₆Solomone a etsa seotloana se kahare ka mela e meraro ea majoe a betliloeng, le ka mola o le mong oa litšiea tsa kedare.

₃₇Mothèo oa Tempele o ne o ile oa raloa ka selemo sa bone sa puso ea Solomone, ka khoeli ea Motšeanong. ₃₈Ka selemo sa leshome le motso o mong, ka khoeli ea Pulungoana, e leng khoeli ea borobeli, Tempele ea phethoa kahohle-hohle, ho ea ka moralo oa eona. Solomone o ne a qete lilemo tse supileng a ntse a haha Tempele.