Davida o tlotsoa hore e be khosi ea Iseraele
1Baiseraele bohle ba khōbōkanela Heborone, ho Davida, 'me ba re: “Bona, re mali a le mang. 2Mehleng ea ha Saule e ne e le khosi ea rōna, e ne e le uena ea etellang Baiseraele pele ha ba futuha. Morena Molimo oa hao, a na a re ho uena: ‘U tla lisa sechaba sa ka sa Baiseraele, 'me u tla ba khosi ea sechaba sa ka sa Baiseraele.’ ”
3Eaba baholo bohle ba Iseraele ba ea ho khosi e le Heborone. Davida a etsa selekane le bona moo Heborone, kapele ho Morena, 'me ba mo tlotsa hore e be khosi ea Iseraele, ho ea ka polelo ea Morena, eo a neng a e bolele ka Samuele.
Davida o hapa Sione
4Eaba Davida le Baiseraele bohle ba ea Jerusalema, e neng e bitsoa Jebuse, e leng moo Bajebuse, baahi ba naha eo, ba neng ba ahile teng. 5Baahi ba Jebuse ba re ho Davida: “U ke ke ua kena mona!” Leha ho le joalo, Davida a hapa qhobosheane ea Sione, e leng eona Motse oa Davida.
6Davida a re: “Mang kapa mang ea tla bolaea Mojebuse pele, e tla ba molaoli e moholo.” Joabe, mora oa Seruea, a tlōla pele, 'me ea e-ba eena molaoli.
7Davida a aha qhobosheaneng eo; ka baka leo, ba e bitsa Motse oa Davida. 8A haha motse o pota-potileng qhobosheane eo ho tloha Milo. Joabe eena a tsosa morako 'ohle a motse. 9Davida a 'na a tsoela pele ho matlafala, hobane Morena oa mabōtho o ne a e-na le eena.
Bahale ba Davida
10Bana ke bona baokameli ba bahale ba Davida, ba neng ba mo tšehelitse 'musong oa hae, 'moho le Baiseraele bohle, hore e be khosi, ho ea ka polelo ea Morena, eo a neng a e bue mabapa le Iseraele. 11Palo ea bahale ba Davida ke ena: Jashobame oa Mohakemoni e ne e le eena mookameli oa balaoli. Ke eena ea neng a fekefe banna ba makholo a mararo ka lerumo, a ba bolaea ka nako e le 'ngoe. 12O ne a hlahlangoa ke Eleasare, mora oa Dodo, oa morabe oa Ahohi, e le e mong oa bahale ba bararo. 13O ne a e-na le Davida ha a le Pasa-Damime, moo Bafilesita ba neng ba theile thekō ea ntoa teng, tšimong ea harese. Bahlabani ba baleha Bafilesita. 14Eleasare le bahlabani ba hae ba ikema har'a tšimo, ba e hapa, ba bolaea Bafilesita, 'me Morena a ba tlisetsa tlhōlo e kholo.
15Ba bararo ba baokameli ba mashome a mararo ba theohela ho Davida lefikeng, ka lehaheng la Adulame. Lebōtho la Bafilesita le ne le hlomme ka khohlong ea Refaime. 16Davida o ne a le ka qhobosheaneng, ha lebōtho la Bafilesita lona le ne le le Betlelehema. 17Davida a utloa a nyoriloe, 'me a re: “Eka motho a ka mpha metsi a tsoang selibeng sa Betlelehema, se pel'a khoro ea motse!” 18Joale bahale ba bararo ba phunyeletsa mabōtho a Bafilesita, ba ea kha metsi selibeng sa Betlelehema se pel'a khoro ea motse. Ba e-kha metsi ao, ba a isa ho Davida. Empa Davida a hana ho a noa, a a qhalla fatše e le nyehelo ho Morena, 19a re: “Molimo oa ka a nthuse ke se ke ka etsa ntho ena. Na nka noa mali a banna bao ba ileng ba ipea kotsing?” Ba ne ba ile ba ipea kotsing ka ho ea kha metsi, ka baka leo, a se ke a a noa.
Tsena li ile tsa etsoa ke bahale bana ba bararo.
20Abishai, ngoan'abo Joabe, e ne e le eena mookameli oa ba mashome a mararo. Ke eena ea neng a fekefe ba makholo a mararo ka lerumo, a ba bolaea, 'me lebitso la hae la tuma har'a ba mashome a mararo. 21A tuma ho feta bahlabani ba mashome a mararo, ea e-ba molaoli oa bona. Empa a se ke a tuma joaloka balaoli ba bararo ba pele.
22Benaea, mora oa Jehoeada, ea neng a e-tsoa Kabeseele, e ne e le monna ea tumileng ka liketso tsa bokoankoetla. A bolaea bahale ba babeli ba Moabe, ba bohale joaloka tau. A ba a bolaea le tau e neng e le ka lemeneng, mohla lehloa le leng le khethehile. 23A bolaea monna oa Moegepeta, oa seqhobane, eo bolelele ba hae bo neng bo feta limethara tse peli. Moegepeta eo o ne a tšoere lerumo le lekaalo ka mofeng oa mochine o ohlang, empa Benaea a ea ho eena a tšoere molamu; a hlōtha lerumo letsohong la Moegepeta, a 'molaea ka lerumo leo la hae. 24Tsena ke tsona liketso tsa Benaea, mora oa Jehoeada, tse ileng tsa mo tumisa har'a ba mashome a mararo. 25O ne a tumile ho feta ba mashome a mararo, empa a sa tuma joaloka balaoli ba bararo ba pele. Davida a mo etsa mookameli oa balebeli ba hae.
26Bahale ba bang ba Davida e ne e le bana: Asaele, ngoan'abo Joabe, le Elehanane, mora oa Dodo oa Betlelehema, 27le Shamote oa Harode, le Helese oa Mopelone, 28le Ira mora oa Ikeshe oa Tekōoa, le Abiesere oa Anatote, 29le Sibekai oa Husha, le Ilai oa Ahohi, 30le Maharai oa Netofa, le Helede, mora oa Baana oa Netofa, 31le Itai mora oa Ribai oa Gibea, oa ba morabe oa Benjamine, le Benaea oa Piratone, 32le Hurai oa melatsoaneng ea Gaasha, le Abiele oa Areba, 33le Asemafete oa Bahurime, le Eleaheba oa Shaalebone, 34le bara ba Hasheme oa Gisone, le Jonathane mora oa Shage oa Harare, 35le Ahiame, mora oa Sakara oa Harare, le Elefale, mora oa Ure, 36le Hefere oa Mekera, le Ahiea oa Mopelone, 37le Hesero oa Karamele, le Naarai, mora oa Esebai, 38le Joele, ngoan'abo Nathane, le Mibehare, mora oa Hageri, 39le Seleke oa Moamone, le Naharai oa Berota, mojari oa lihlomo tsa Joabe, mora oa Seruea, 40le Ira oa Jethero, le Garebe oa Jethero, 41le Uriea oa Mohete, le Sabada, mora oa Akalai, 42le Adina, mora oa Shisa oa morabe oa Rubene, eo e neng e le molaoli oa ba morabe oa Rubene, le ba mashome a mararo ba neng ba e-na le eena, 43le Hanane, mora oa Maaka, le Joshafate oa Miteni, 44le Usiea oa Ashetarote, le Shama, le Jeiele, bara ba Hotame oa Arōoere, 45le Jediaele, mora oa Shimeri, le Joha oa Tise, e leng ngoan'abo, 46le Eleele oa Mohafa, le Jeribai, le Joshafeea, bara ba Elenaama, le Jitema oa Moabe, 47le Eleele, le Obede, le Jaasiele oa Mesobaea.
