Lefu la Saule le bara ba hae
1Bafilesita ba loantša Baiseraele. Banna ba Iseraele ba ba baleha, ba oa mofela holim'a thaba ea Gileboa. 2Bafilesita ba bea Saule le bara ba hae merebele, ba bolaea Jonathane, le Abinadabe, le Malekishuoa, bara ba Saule. 3Ntoa ea imela Saule. Banna ba liqha ba fula Saule ka metsu, 'me a tsoa kotsi e mpe.
4Eaba Saule o re ho mojari oa lihlomo tsa hae: “Nka sabole ea hao, u ntlhabe, esere maqai ana a fihla a nqetela, 'me ka tlontloloha.”
Empa mojari oa lihlomo tsa hae a hana, hobane o ne a tšohile haholo. Ka baka leo, Saule a nka sabole ea hae, a itihela holim'a eona. 5Ha mojari oa lihlomo tsa hae a bona hore Saule o shoele, le eena a itihela holim'a sabole ea hae, a shoa. 6Saule a shoa hammoho le bara ba hae ba bararo, le ba lelapa la hae bohle.
7Ha Baiseraele bohle ba neng ba le ka khohlong ba bona hore bahlabani baa baleha, le hore Saule le bara ba hae ba se ba bolailoe, ba siea metse ea bona, ba baleha. Eaba Bafilesita baa tla, ba ikhahela ho eona.
8Ka le hlahlamang, ha Bafilesita ba tlil'o hlōbōlisa ba bolailoeng, ba fumana Saule le bara ba hae ba bolaetsoe thabeng ea Gileboa. 9Ha ba se ba hlōbōlisitse Saule, ba nka hlooho ea hae, le seaparo sa hae sa ntoa, ba rōmela maqosa hohle naheng ea Bafilesita ho phatlalatsa taba ena e thabisang ho melimo ea bona ea bohata, le ho sechaba sohle. 10Ba bea seaparo sa Saule sa ntoa ka tempeleng ea melimo ea bona ea bohata, hlooho ea hae eona ba e fanyeha ka tempeleng ea Dagone.
11Ha baahi bohle ba Jabeshe-Gileade ba utloa seo Bafilesita ba se entseng Saule, 12banna bohle ba bahale ba phalla, ba nka setōpō sa Saule, le litōpō tsa bara ba hae, ba li isa Jabeshe. Ba epela masapo a bona tlas'a sefate sa eike se Jabeshe, 'me ba itima lijo ka matsatsi a supileng.
13Eaba Saule o shoa ka baka la litšito tsa hae, tseo a ileng a siteloa Morena ka tsona, e leng ho se bōlōke litaelo tsa Morena, le ho batla likeletso ho mathuela. 14O ne a sa ka a botsa Morena, 'me ka baka leo, Morena o ile a 'molaea, 'muso oa hae a o nea Davida, mora oa Jese.
