PESALEME YA 45

₁Taba tse monate di bela pelong ya ka; ke re, ke qapela morena; leleme la ka a le ke le be jwaloka lesiba la mongodi ya masene!

₂Ka botle o fetisa bana ba batho, mosa o tsholoha melomong ya hao; ka baka leo, Modimo o o hlohonolofaditse ka ho sa feleng. ₃O mohale! o itlamelle sabole ya hao lehlakoreng la hao; ke hlopheho ya hao le kganya ya hao! ₄Kganyeng ya hao o hlwelle koloing ya hao ya hlolo, o lwanele nnete le molemo le ho loka; letsoho le letona la hao le ke le o rute diketso tse makatsang! ₅Metsu ya hao e ntjhotjho; ditjhaba di tla wela pela maoto a hao; o tla hlaba pelo tsa bao e leng dira ho morena.

₆Terone ya hao ke terone ya Modimo; e tiile ka ho sa feleng; lere la borena ba hao ke lere la ho loka! ₇O rata ho loka, mme o hloile bokgopo. Ka baka leo, Modimo, Modimo wa hao, o o tlotsitse ka ole ya nyakallo ho fetisa balekane ba hao. ₈Mirra le aloe le kasia di arubetsa diaparo tsa hao; o thabiswa ke modumo wa diharepa matlung a borena a kgabisitsweng ka manaka a ditlou. ₉Baradi ba marena ba hara ba ratwang ke wena; mofumahadi wa hao o letsohong la hao le letona, a hlophehile ka kgauta ya Ofire.

₁₀Mamela, moradi wa ka, o lemohe, o sekehe ditsebe! Lebala setjhaba sa heno le ntlo ya ntatao! ₁₁Morena o lakatsa botle ba hao; erekaha e le morena wa hao, o mo utlwe. ₁₂Moradi wa Tire o tla o nyehela, ba baholo hara setjhaba ba o ananele.

₁₃Kahare ho ntlo, moradi wa morena o dutse bokgabaneng feela; seaparo sa hae ke lesela le homilweng ka kgauta. ₁₄O iswa ho morena hodima diphate tse mebalabala; thaka tsa hae tsa barwetsana di tla ho wena kamora hae, ₁₅di tliswa ka thabo le nyakallo, di kena tlung ya morena.

₁₆Ditulong tsa bontatao ho tla dula bara ba hao, o tla ba bea mahosana lefatsheng lohle. ₁₇Ke tla hopodisa lebitso la hao melokong yohle e tlang ho tla; ka baka leo, ditjhaba di tla o rorisa kamehla, ka ho sa feleng.