PESALEME YA 38

₁Jehova, o se ke wa ntaya kgalefong ya hao, o se ke wa nkotla bohaleng ba hao. ₂Hobane metsu ya hao e kene ho nna, letsoho la hao le hlile le nkimetse. ₃Kgalefo ya hao ha e a ka ya siya letho le phelang nameng ya ka, sebe sa ka se tlositse pholoho yohle masapong a ka. ₄Hobane makgopo a ka a phahamile ho feta hlooho ya ka, a nkimela ka boima ba wona jwaloka phahlo e thata. ₅Maqeba a ka a nkga, a tswa boladu, ka ketso ya bohlanya ba ka. ₆Ke kobame, ke manahane hampe; ke ntse ke tsamaya ka bofifi tsatsi lohle; ₇hobane mollo o tuka maleng a ka, ha ho sa le letho le pholohileng nameng ya ka. ₈Ke feletswe ke matla, ke robehile hampe, ke dumaela ka baka la ho hlora ha pelo ya ka ...

₉Morena, dithato tsa ka kaofela di pela hao, masisapelo a ka ha a pateha ho wena. ₁₀Pelo ya ka e a opa, matla a ka a ntlohela, le lona lesedi la mahlo a ka ha le sa le yo ho nna. ₁₁Metswalle ya ka le banabeso ba emetse thoko, ha ba bona leqeba la ka, le beso ba emetse hole. ₁₂Ba batlang bophelo ba ka ba tjheha maraba a bona, ba batlang tshenyeho ya ka ba bolela tsa ho senya, ba loha mano tsatsi lohle. ₁₃Empa nna, ke tshwana le ya thibaneng ditsebe, ke jwaloka semumu se sa ahlamiseng molomo wa sona. ₁₄Ke jwaloka motho ya sa utlweng, ya se nang phetolo molomong wa hae.

₁₅Hobane ke itshepetse wena, Jehova! O tla nkarabela, Morena, Modimo wa ka! ₁₆Hobane ke itse: Ba se ke ba thaba ka nna! Ha leoto la ka le kgoptjwa, ba mphahamela ka boikakaso. ₁₇Hobane ke ntse ke batla ho wa, bohloko ba ka bo ntse bo le mona pela ka; ₁₈hobane ke ipolela bokgopo ba ka, mme ke hlora ke sebe sa ka. ₁₉Empa bao e leng dira ho nna ba phela, ba matla; ba ntlhoileng feela ba bangata. ₂₀Ba ntefela botle ka bobe, ba ntwantsha, hobane ke phehella botle.

₂₁O se ke wa ntlohela, Jehova, Modimo wa ka! O se ke wa emela hole le nna! ₂₂Phakisa ho tla nthusa, wena Morena, Mmoloki wa ka!