PESALEME YA 37

₁O se ke wa hlora ha o bona ba bolotsana, o se ke wa honohela ba etsang ho hobe! ₂Hobane, jwaloka jwang, ba ya phakisa ba helwe, ba se ba ya pona jwaloka motalane.

₃O be le tshepo ho Jehova, o etse ho hotle; o ahe lefatsheng, o ikgorisetse nneteng. ₄O ikgahlisetse ho Jehova, mme o tla o nea se batlwang ke pelo ya hao.

₅O laeletse tsela ya hao ho Jehova, o mo tshepe; ho tla sebetsa yena. ₆O tla bonahatsa tokelo ya hao jwaloka lesedi, le ho loka ha hao jwaloka ho ela ha motshehare.

₇O lebelle Jehova o ikgutseditse, o itshepise ka yena. O se ke wa hlora ka baka la ya atlehang tseleng ya hae, ka baka la motho ya leseho bolotsaneng ba hae.

₈O kokobetse bohale ba hao, o tele kgalefo, o se ke wa hlora; ebe etlaba o etsa bobe. ₉Hobane ba bolotsana ba tla fediswa, athe ba itshepetseng Jehova ba tla rua lefatshe.

₁₀Ho se ho se hokae, mme molotsana o tla ba siyo; o tla qamaka tulo tsa hae, empa o tla be a setse a le siyo; ₁₁empa ba bonolo ba tla rua lefatshe ba iketle kgotsong e kgolo.

₁₂Molotsana o rera ya lokileng, o mo tsikitlanyetsa meno. ₁₃Morena o tsheha ka yena, hobane o bona hoba letsatsi la hae le a tla.

₁₄Ba bolotsana ba tsomotse marumo, ba tjhehile diqha ho diha mohlomohi le mofumanehi, ho bolaya ba metsamao e lokileng; ₁₅marumo a bona a tla fohla dipelong tsa bona, diqha tsa bona di robehe.

₁₆Se senyenyane se ruilweng ke ya lokileng se fetisa nala ya ba babe ba bangata; ₁₇hobane matsoho a ba babe a tla robeha, empa Jehova o tiisa ba lokileng.

₁₈Jehova o tseba matsatsi a ba lokileng, ba tiiseditswe lefa la bona ka ho sa feleng; ₁₉ba ke ke ba swaba matsatsing a mabe, ba ya nne ba kgore ka matsatsi a tlala.

₂₀Ba bolotsana ba ya fela, bao e leng dira ho Jehova ba tla timela jwaloka makgulo a matle, ba timele jwaloka mosi.

₂₁E mobe o a adima, mme ha a buse; empa ya lokileng o na le mohau, o a fana; ₂₂hobane ba hlohonolofatswang ke Jehova ba tla ja lefa la lefatshe, empa bao a ba rohakang ba tla fediswa.

₂₃Jehova o tiisa metsamao ya ya lokileng, o kgahliswa ke tsela ya hae; ₂₄leha a ka wa, ha a welle ruri, hobane Jehova o mo nenesa ka letsoho.

₂₅Nkile ka ba motjha, mme jwale ke tsofetse; empa ha ke eso ho bone ya lokileng a tlohelwa, leha e le ditloholo tsa hae di sikila bohobe; ₂₆o fana kamehla, o bile o a adima, mme hlohonolofatso e dutse hodima ditloholo tsa hae.

₂₇Sesefa bobe, o etse botle, ke moo o tla dula o iketlile ka ho sa yeng kae. ₂₈Hobane Jehova o rata ho loka, mme ha a tlohele bakgethwa ba hae; ba bolokwa kamehla; empa lesika la ba babe le tla fediswa.

₂₉Ba lokileng ba tla ja lefa la lefatshe, mme ba tla hlola ho lona ka ho sa feleng.

₃₀Molomo wa ya lokileng o ntsha mantswe a hlalefileng, leleme la hae le bolela ho loka; ₃₁pelong ya hae o na le molao wa Modimo wa hae, maoto a hae a ke ke a thella.

₃₂E mobe o lalla ya lokileng, o batla a ka mmolaya; ₃₃empa Jehova a ke ke a mo tlohella matsohong a hae, a ke ke a mo tswa ha a ahlolwa.

₃₄O itshepise ka Jehova, o tiye ditseleng tsa hae, mme o tla o hodisa, o tle o je lefa la lefatshe; o tla bona le tshenyeho ya ba babe.

₃₅Ke bone e mobe a iphile matla, a phahamile jwaloka sefate se fupuhang naheng ya sona; ₃₆o fetile; jo! o se a le siyo; ka mmatla, a se ke a fumanwa.

₃₇Lemoha ya lokileng, o tadime motho wa toka; hobane motho wa kgotso o sa tla bona ditloholo, ₃₈empa ba bolotsana ba timela, mme ditloholo tsa ba babe di a fediswa.

₃₉Poloko ya ba lokileng e tswa ho Jehova; ke yena qhobosheane ya bona letsatsing la matswalo; ₄₀Jehova o a ba thusa, o a ba boloka; o ba namolela ho ba babe, o a ba pholosa, kahobane ba beile tshepo ya bona ho yena.