EKSODA 38

₁Ha ntoo etswa aletare ya ditjheso ka sefate sa leoka; bolelele ba yona ya eba ditswe tse hlano, bophara ya eba ditswe tse hlano; e ne e le mahlakore a mane a lekanang, bophahamo bona e le tswe tse tharo. ₂Ya etsetswa dinaka dintlheng tse nne; dinaka tsa yona di ne di tswa ho yona, mme ya manehwa ka koporo. ₃Hape, ha etswa mesebetsi ya aletare, dipitsana tsa molora, le dikgarafu, le mehope, le difereko, le dipitsa tsa dibano; mesebetsi yohle ya yona ya etswa ka koporo. ₄Aletare ya etsetswa rostere ya koporo, e bewang tlasa mophetho wa yona, mahareng a yona. ₅Ya tshollelwa mehwele e mene ya koporo, dintlheng tse nne tsa rostere, ho kenya mejaro. ₆Mejaro yona ya etswa ka sefate sa leoka, mme ya manehwa ka koporo; ₇mejaro ya kenngwa mehweleng, mahlakoreng a aletare, hore e jarwe ka yona; ya etswa ka dipolanka, e le sekoti kahare.

₈Yaba ho etswa morifi wa koporo, le sedulwana sa wona sa etswa ka koporo, ho nkilwe diipone tsa ho ipona tsa basadi ba sebetsang, ba neng ba etla tshebeletsong ka dihlopha, monyako wa tente ya pokano.

₉Ha ntoo etswa lebala; ka nqa borwa, ha etswa masela a lepeletseng a lebala a lene e ntle e lohilweng a ditswe tse lekgolo; ₁₀ha etswa le ditshiya tse mashome a mabedi, le didulwana tsa tsona tse mashome a mabedi tsa koporo, le dipekere tsa ditshiya le dithupa tsa tsona tsa silefera. ₁₁Ka nqa leboya, ha etswa masela a ditswe tse lekgolo, le ditshiya tsa wona tse mashome a mabedi, le didulwana tsa tsona tse mashome a mabedi tsa koporo; le dipekere tsa ditshiya le dithupa tsa tsona tsa silefera. ₁₂Ka nqa bophirimela, ha etswa masela a lepeletseng a ditswe tse mashome a mahlano, le ditshiya tsa wona tse leshome le didulwana tsa tsona tse leshome le dipekere tsa ditshiya le dithupa tsa tsona tsa silifera. ₁₃Ka nqa botjhabela, ha etswa masela a ditswe tse mashome a mahlano; ₁₄ka nqa e nngwe ho monyako, ha etswa masela a lepeletseng a ditswe tse leshome le metso e mehlano, le ditshiya tsa wona tse tharo le didulwana tsa tsona tse tharo; ₁₅ka nqa e nngwe, ka ho re ho lekane ka nqa tse pedi ho monyako wa lebala, ha etswa masela a lepeletseng a tswe tse leshome le metso e mehlano, le ditshiya tsa wona tse tharo le didulwana tsa tsona tse tharo. ₁₆Masela wohle a lepeletseng a lebala a ka nqa tsohle a etswa ka lene e ntle e lohilweng; ₁₇didulwana tsa ditshiya tsa etswa ka koporo; dipekere tsa ditshiya le dithupa tsa tsona ka silefera; dihlooho tsa tsona tsa manehwa ka silefera; mme ditshiya tsohle tsa lebala tsa kgabiswa ka dithupa tsa silefera. ₁₈Lesela le lepeletseng la monyako wa lebala la etswa le homilwe ka purepera, le sekarelata, le krimsone, le lene e ntle e lohilweng, le ena le bolelele ba ditswe tse mashome a mabedi, le boholo ba tswe tse hlano, bo lekanang le bophara ba masela a lepeletseng a lebala; ₁₉ditshiya tsa wona tse nne le didulwana tsa tsona tse nne tsa etswa ka koporo; dipekere tsa tsona tsa etswa ka silefera, mme dihlooho tsa tsona le dithupa tsa tsona tsa etswa ka silefera. ₂₀Haele dithakgisa tsa tabernakele le tsa lebala lohle, tsa etswa ka koporo.

₂₁Ke yona palo ya mesebetsi ya tabernakele, e leng tabernakele ya bopaki, e entsweng ka taelo ya Moshe; ya eba mosebetsi wa Balevi, ba laelwa ke Ithamare, mora Aarone, moprista. ₂₂Haele Betsaleele, mora Uri, mora Hure, wa leloko la Juda, a etsa tsohle tseo Jehova a di laetseng Moshe, ₂₃a ena le Oholiabe, mora Akisamake, wa leloko la Dane, e le sebetli, le seqapi, le sehomi se homang ka purepera, le sekarelata, le krimsone, le lene e ntle. ₂₄Haele kgauta kaofela e keneng mosebetsing, e leng mosebetsi wohle wa sehalalelo, ke ena: Kgauta ya kabelo e tsokoditsweng ya eba talenta tse mashome a mabedi a metso e robileng mono o le mong tse nang le dishekele tse makgolo a supileng a mashome a mararo, ha ho uwa ka shekele ya sehalalelo. ₂₅Haele silefera ya bohle ba phutheho ba badilweng, ya eba ditalenta tse lekgolo le nang le dishekele tse sekete se nang le makgolo a supileng a mashome a supileng a metso e mehlano, ha ho uwa ka shekele ya sehalalelo; ₂₆ya eba beka bakeng sa e mong le e mong, halofo ya shekele, ha ho uwa ka shekele ya sehalalelo, bakeng sa bohle ba badilweng, ho tloha ho ba dilemo tse mashome a mabedi le ho ya pele, ba etsa dikete tse makgolo a tsheletseng a metso e meraro tse nang le makgolo a mahlano a mashome a mahlano. ₂₇Ka ditalenta tsa silefera tse lekgolo, ha tshollwa didulwana tsa sehalalelo le didulwana tsa lesira: Ha etswa didulwana tse lekgolo ka ditalenta tse lekgolo, sedulwana se seng ka talenta e le nngwe. ₂₈Ka dishekele tse sekete se nang le makgolo a supileng a mashome a supileng a metso e mehlano, ha etswa dipekere tsa ditshiya, ha manehwa dihlooho tsa tsona, mme ditshiya tsa kgabiswa ka dithupa. ₂₉Haele koporo ya kabelo e tsokoditsweng, ya eba talenta tse mashome a supileng a nang le dishekele tse kete tse pedi tse nang le makgolo a mane. ₃₀Ka yona ha etswa didulwana tsa monyako wa tente ya pokano, le aletare ya koporo, le rostere ya yona ya koporo, le mesebetsi yohle ya aletare; ₃₁ha etswa le didulwana tsa lebala lohle, le didulwana tsa monyako wa lebala, le dithakgisa tsa tabernakele, le dithakgisa tsa lebala lohle.