EKSODA 37

₁Yaba Betsaleele o etsa areka ya sefate sa leoka; bolelele ba yona ya eba ditswe tse pedi tse nang le halofo, bophara ba yona ya eba setswe se nang le halofo, bophahamo ba yona ya eba setswe se nang le halofo. ₂Ya manehwa ka kgauta e hlwekileng, kahare le kantle, mme ya etsetswa mofapo wa kgauta o e potolohang. ₃Ya tshollelwa mahwele e mene ya kgauta e bewang dintlheng tse nne tsa yona; mehwele e mmedi ya bewa lehlakoreng le leng la yona, e meng mehwele e mmedi lehlakoreng le leng la yona. ₄Ha etswa mejaro ya sefate sa leoka, ya manehwa ka kgauta; ₅mejaro ya kenngwa mehweleng, mahlakoreng a areka, ho jara areka. ₆Ha etswa le sekwahelo sa kgauta e hlwekileng; bolelele ba sona ya eba tswe tse pedi tse nang le halofo, bophara ba sona ya eba setswe se nang le halofo. ₇Ha etswa dikerubime tse pedi tsa kgauta; tsa etswa ka kgauta e teilweng dintlheng tse pedi tsa sekwahelo; ₈kerubime e nngwe ya bewa ntlheng e ka kwano; kerubime e nngwe ya bewa ntlheng e ka kwana; ha etswa dikerubime hammoho le sekwahelo, dintlheng tse pedi tsa sona. ₉Dikerubime di ne di otlollela dipheo tsa tsona hodimo, di kgurumeditse sekwahelo ka dipheo tsa tsona, difahleho di tadimane; mme difahleho tsa dikerubime di ne di tadimile nqa sekwahelong.

₁₀Ha etswa le tafole ya sefate sa leoka, bolelele ba yona e le ditswe tse pedi, bophara ba yona e le setswe se le seng, bophahamo ba yona e le setswe se nang le halofo. ₁₁Ya menehwa ka kgauta e hlwekileng, mme ya etsetswa mofapo wa kgauta o e potolohang. ₁₂Hape, ya etsetswa moqhaka o bophara ba seatla o e potolohang; ya etsetswa mofapo wa kgauta o potang moqhaka wa yona. ₁₃Ya tshollelwa mehwele e mene ya kgauta; mehwele ya bewa dintlheng tse nne tse maotong a mane a yona. ₁₄Mehwele e ne e le haufi le moqhaka, ho kenya mejaro ya ho jara tafole. ₁₅Ha etswa mejaro ya sefate sa leoka, ya manehwa ka kgauta, ho jara tafole. ₁₆Ha etswa le mesebetsi e bewang tafoleng, e leng mafiso a yona, le mehope ya yona, le dinkgwana tsa yona, le merifi ya yona ya ho etsa ditshelo; tsa etswa ka kgauta e hlwekileng.

₁₇Ha etswa le kandelare ya kgauta e hlwekileng: Kandelare ya etswa ka kgauta e teilweng; leoto la yona, le kutu ya yona, le meritshwana ya yona, le dinoko tsa yona, le dipalesa tsa yona, e ne e le ntho e le nngwe le yona. ₁₈Ho ne ho etswa makala a tsheletseng mahlakoreng a yona; makala a mararo a kandelare a ne a etswa lehlakoreng le leng la yona, a mang makala a mararo a ne a etswa lehlakoreng le leng la yona. ₁₉Ha etswa meritshwana e meraro e kang amanda, le sonoko le palesa lekaleng le leng; ha etswa hape meritshwana e meraro e kang amanda le senoko le palesa lekaleng le leng; ha etswa jwalo makaleng a tsheletseng a tswang kandelareng. ₂₀Ho yona kandelare, ho ne ho ena le meritshwana e mene e kang amanda, le dinoko tsa yona le dipalesa tsa yona; ₂₁senoko se le teng tlasa makala a mabedi a tswang kandelareng, senoko se seng se le teng tlasa makala a mabedi a tswang kandelareng; ho le jwalo makaleng a tsheletseng a tswang kandelareng. ₂₂Dinoko le makala e ne e le ntho e le nngwe le yona, mme yona e le ntho e le nngwe hammoho e entsweng ka kgauta e hlwekileng, e teilweng. ₂₃Ha etswa dilampi tsa yona tse supileng, le matlawana a yona, le dipitsana tsa yona tsa melora tsa kgauta e hlwekileng. ₂₄Hammoho le mesebetsi yohle ya yona, ya etswa ka talenta ya kgauta e hlwekileng.

₂₅Ha etswa le aletare ya dibano ka sefate sa leoka; bolelele ba yona e le setswe se le seng, bophara ba yona e le setswe se le seng; e ne e le mahlakore a mane a lekanang; bophahamo ba yona ya eba ditswe tse pedi; manaka a yona a tswile ho yona. ₂₆Ya manehwa ka kgauta e hlwekileng, kahodimo le kahohle mahlakoreng le manakeng; ya etsetswa mofapo wa kgauta o e potolohang. ₂₇Ya etsetswa le mehwele e mmedi ya kgauta tlasa mofapo, mahlakoreng a yona a mabedi, le mahlakoreng a mang a mabedi, ya ho kenya mejaro, hore e tle e jarwe ka yona. ₂₈Ha etswa mejaro ya sefate sa leoka, mme ya manehwa ka kgauta.

₂₉Hape, ha etswa ole ya setlolo e kgethehileng, le dibano tse hlwekileng tse monko o monate, ka mokgwa wa motswaki wa tse nkgang hamonate.