INGOMA YEENGOMA 8

₁Ngathana batjho bewunjengomfowethu kimi

omunye ebeleni lakamma!

Yeke, bekuzakuthi nangihlangana nawe ngaphandle,

ngikutjhube bengikuncwange,

kungabikhona ongithathela phasi.

₂Bengizakurhola ngikhambe nawe,

ngikuse ekumbeni kamma,

ngikukhelele iwayini elineenungo

kanye nomhluzi wamarharinada

njengombana umma wangifundisa.

₃Kwanga isandla saso sesincele

besingaba ngaphasi kwehlokwami

nesidla saso singigone.

₄Ntombi zeJerusalema, ngithembisani

bona angeze nazamazisa namkha nivuse ithando

lingakakhanuki ukuvuka.

₅Ngubani lo owenyuka avela erhalawumbeni,

oziyame ngesithandwa sakhe na?

Ngakuvusa ngaphasi komuthi wamahabhula;

lapho unyoko akubambela khona,

iye, lapho akubambela khona

nalapho akubelethela khona.

₆Yewungibeke njengesigibo phezu kwehliziywakho,

iye, nanjengesigibo emkhonwenakho.

Ngambala, ithando linamandla njengokufa,

isikhwele sigwame njengendawo yabafileko.

Amalangabi wakhona amlilo orubhako,

iye, amlilo kaSomnini.

₇Amanzi amanengi akakghoni ukucima ithando

nemilambo ayikghoni ukulirhurhula.

Nanyana umuntu bekanganikela

woke umnono wekumbakhe ukwenana ithando

nalokho bewuzakuba kunyefulwa kwaphela.

₈Udadwethu usesemncani,

amabelakhe asaphuhla.

Sizamenzelani nje udadwethu lo,

mhlana azokucelwa na?

₉Nakube useseliboda elibutjhelelezi,

sizamakhelela amarhayisi wesiliva.

Nakube umnyango,

sizamkghabisa ngeengodo zomsedari.

₁₀Mina bengiliboda elibutjhelelezi,

kodwana kwanjesi amabelami anjengemibhotjhongo.

Nje-ke emehlweni wesithandwa sami,

ngizuze umusa.

₁₁USolomoni gade anesidiribe eBhali-Hamona,

wasibeka ngaphasi kwabaqaphi.

Umuntu bekangakhokha ikulungwana yeempaparwana zesiliva

ngeenthelo zaso.

₁₂Isidiribe sami, okungesami, ngesami!

Iimpaparwana eziyikulungwana zingezakho Solomoni

neempaparwana ezimatjhumi amabili

zingaya kubaqaphi besithelo.

₁₃Akhese ngizwe ilizwi lakho,

wena ohlala eemvandeni;

iye, wena olalelwa bangani bakho!

₁₄Sithandwa sami,

ube yitsephe namkha ihlangumatakana

elakutja emibundwini yeenthako.