U-ISAYA 1

₂Lalelani nina mazulu!

Ubeke indlebe nawe phasi

ngombana uSomnini ukhulumile wathi:

“Ngikhulise abantwana ngabondla,

kodwana bangihlubukile.

₃Ikomo iyamazi umniniyo,

nodumbana igebhezi lomnikazalo,

kodwana u-Israyeli akazi ilitho,

abantu bami abazwisisi.

₄Sizazizwa isizwe esonako,

abantu abadisibezwa licala,

inzalo yeenkhohlakali,

abantwana bokonakala!

Bamtjhiyile uSomnini;

badelele oCwengileko ka-Israyeli, bamfulathela.

₅Khona nisazakubethwa kuphi nje?

Nisaragela phambili ngokuhlubuka,

khisibe yoke ihloko ilimele

ihliziywenu idanile.

₆Kusukela efokothweni ukuya ezwanini akasenabubono,

kunalokho maduma, manceba nemivuvu kwaphela

ekungazange kukghanywe,

kubotjhwe bekuthanjiswe ngamafutha.

₇Inarhenu idududu,

amadorobhenu aqothuliwe,

amasimenu adliwa miqhamuka niqalile;

iye, inarhenu ayisenalitho

ibhujiswe miqhamuka.

₈Indodakazi yeZiyoni seyisele njengomtlhatlhana esidiribeni,

njengehlahla lomtlhatlhana esimini yamakomukomu

nanjengedorobho elivinjezelweko.

₉Ukube uSomnini uMninimandlawoke

akhange asitjhiyele abambalwa abaphunyurhileko

besizokuba njengeSodoma, sifane neGomora.

₁₀Yizwani amezwi kaSomnini, nina babusi beSodoma;

nilalele ifundiso kaZimenu, nina bantu beGomora!”

“Ubunengi bemihlabelwenu buyini kimi na?

Ngidinekile ngemihlabelo yokutjhiswa

yamaqama namafutha weembandana!

Angithokozi ngeengazi zeenkunzi,

zeemvana nezeempongo!

₁₂Lokha naningena ebukhoneni bami

iinlwana zenu zigidizela ngesirhodlweni sami.

Ngubani obawe lokho ezandleni zenu?

₁₃Ningasayilethi iminikelo engazisiko!

Ukutjhiswa kwetjhwalo kusinyenyiso kimi!

Angeze ngisamukela imikhosenu nakube kunokonakala,

iye, ukwethwasa kwenyanga,

amaSabatha kanye nemihlanganwenu.

₁₄Ngiyayizonda imigidenu yokuthwasa kwenyanga

neminyanyenu yeenkhathi enizijamisileko.

Kumthwalo phezu kwami

begodu sengidiniwe kuyithwala.

₁₅Lokha nanelula izandla zenu nithandaza,

Ngizokuvala amehlwami kini

nanyana ningenza imithandazo eminengi kangangani

angekhe ngiyilalele.

Izandla zenu zizele iingazi.

₁₆Hlambani, nizihlambulule!

Susani izenzo zenu ezimbi phambi kwamehlwami!

Lisani okumbi!

₁₇Nifunde ukwenza okulungileko;

funani ukulunga,

nikhuthaze abagandelelweko,

jamelani indaba yeentandani,

nivikele abahlolokazi.

₁₈“Seningeza-ke, sikhulumisane”, kutjho uSomnini,

“Nanyana izono zenu zitlerebede,

zizaba mhlophe njengesithwathwa,

nanyana zibomvu be,

zizakuba mhlophe twa.

₁₉Nakube niyavuma begodu niyalalela,

nizakudla okuhle kwenarha,

₂₀kodwana naninghanghabalako nihlubuka,

nizakudliwa yisabula.”

Iye, umlomo kaSomnini ukhulumile.

₂₁Maye, idorobho ebelithembekile

selibe yingwadla!

Beligcwele ubulungiswa

nokulunga bekungaphakathi kwalo,

kodwana kwanjesi, ligcwele ababulali!

₂₂Isiliva lakho, Jerusalema,

seliphenduke amanyela,

utjwala bakho sebuqarhwe ngamanzi.

₂₃Ababusi bakho bamahlubuka

begodu babangani bamasela.

Omunye nomunye uthanda ukufunjathiswa,

ugijima ngemva kwezipho.

Abasajameli iintandani

nendaba yabahlolokazi ayisafiki kibo.

₂₄Yeke, isigwebo sakaSomnini uMninimandlawoke,

ongonamandla ka-Israyeli ngilesi:

“Maye kibo!

Ngizozanelisa ngezitha zami;

ngizibuyiselele emanabenami.

₂₅Ngizokuphendulela isandla sami kuwe, Jerusalema;

ngicwengise amanyelakho kube njengesoda

bengisuse loke ibibi lakho.

₂₆Ngizakubuyisela abagwebi bakho

kube njengemihleni yaphambilini,

abeluleki bakho njengekuthomeni.

Emva kwalokho uzakubizwa

bona ulidorobho lokulunga,

iye, idorobho elithembekileko.

₂₇IZiyoni lizakuhlengwa ngokufanelekileko

nabaphendukako balo ngokulunga,

₂₈kodwana abahlubukako nezoni

bazakwephulwa bokanyana njalo

nalabo abafulathela uSomnini bazakubhubha.

₂₉Bazakuba neenhloni

ngebanga lemithi yama-owuku

egade senizithabise ngayo.

Nizakudana ngebanga leemvande enizikhethileko.

₃₀Nizakufana ne-owuku elitjhwabelwe makari

nanjengesivande esinganamanzi.

₃₁Onamandla uzakuba njengamaqobetjhwana

nomsebenzakhe ube ngowehlasi;

iye, uzakutjha ndawonye nomsebenzakhe

kungabi nomcimi.”