KWEBEROMA 7

₁Bazalwana, ngikhuluma nalabo abazi umthetho; kghani anazi bonyana umthetho uba sibopho phezu komuntu, kwaphela umuntu loyo nasaphilako na? ₂Ngaleyondlela umfazi ngokomthetho ubopheleleke endodenakhe qobana isaphila; kodwana yahlongakala, uyatjhatjhululwa emthethweni omayelana nendodakhe. ₃Ekhabo lakhona, uzakubizwa bona sihlobongi nakube wenda kenye indoda khisibe yakhe isaphila. Kodwana nasele indodakhe ihlongakele, utjhaphulukile emthethweni lowo, nje-ke nakube wenda kenye indoda, akabi sihlobongi. ₄Nakini-ke kunjalo, bazalwana; nafa emthethweni ngomzimba kaKrestu ukuze nibe ngewomunye, loyo owavuswa ekufeni ukuze sithelele uZimu iinthelo. ₅Lokha nabesisaphila enyameni, iinkanuko zethu zokona, ebezivuswa mthetho, bezisebenza ezithweni zethu kobana sithele iinthelo zokufa. ₆Kodwana kwanjesi sitjhatjhululiwe emthethweni, safa kilokho ebekusibophile ukuze sibe makhoboka angasi ngaphasi komthetho wakade otloliweko kodwana angaphasi kwepilo etja yakaMoya.

₇Alo-ke sizakuthini na? Kghani sizakuthi umthetho usisono? Awa, nakanye! Nokho nagade kungasi ngebanga lomthetho, bengingekhe ngasazi isono. Bengingekhe ngazi bona kuyini ukukhanuka nabethana umthetho akhange uthi: “Ungakhanuki.” ₈Kodwana isono safunyana ithuba ngomyalo, saveza kimi yoke imihlobo yekanuko. Ngaphandle komthetho, isono sife ukufa. ₉Ngakhe ngaphila ngaphandle komthetho. Kodwana kwathi nakufika umyalo, isono savuka, ₁₀yeke ngafa. Kwathi wona umyalo lowo obewufanele ungilethele ukuphila, wabonakala ukukufa kimi ₁₁ngombana isono safunyana ithuba ngomyalo, sangilutha, bekwathi ngawo sangibulala.

₁₂Nje-ke umthetho ucwengile nomyalo ucwengile, ulungile begodu muhle. ₁₃Alo, kutjho bona lokho okuhle kwaletha ukufa kimi na? Awa, nakanye! Kwaba sisono esangena nokufa kimi ngokusebenzisa okuhle ukuze isono sibonakaliswe sisisono, begodu kuthi ngomyalo sibe sisono sakosono.

₁₄Siyazi bona umthetho ungewokommoya, kodwana mina ngingowenyama, ngathengiselwa ebukhobokeni ngaphasi kwesono. ₁₅Angizipheleli ngombana angenzi lokho engikuthandako, kodwana ngenza kanye lokho engingakufuniko. ₁₆Nje-ke, nakube ngenza lokho engingakufuniko, kutjho bona ngiyavuma bonyana umthetho muhle. ₁₇Emanyeni akusesengimi owenza lokho, kodwana ngikwenziswa sisono esikimi ₁₈ngombana ngiyazi bona akunalitho elilungileko elihlala ngaphakathi kwami, lokho kusemvelwenami yenyama. Ngingathanda ukwenza okuhle kodwana ngiyabhalelwa bona ngikwenze ₁₉ngombana angenzi okuhle engithanda ukukwenza, kodwana okumbi engingafuni ukukwenza, ngiyakwenza. ₂₀Nangabe ngenza lokho engingathandi ukukwenza, khona-ke angizipheleli, ngenziswa sisono esihlala ngaphakathi kwami.

₂₁Ngalokho-ke ngikufunyana kumthetho ongibusako wokobana nangifuna ukwenza okuhle, ubumbi bungilalele eduze. ₂₂Emanyeni ngithatjiswa mthetho kaZimu ngaphakathi kwami, ₂₃kodwana ngibona ezithweni zami kunomthetho omunye olwisana nomthetho womkhumbulwami, ungenza ngibe likhoboka lomthetho wesono ohlala ngaphakathi kwezitho zami. ₂₄Maye mina ngilisizi! Ngubani ozongikhulula kilomzimba wokufa na? ₂₅Akathokozwe uZimu ngoJesu Krestu iKosethu!

Nje-ke ngomkhumbulwami ngilikhoboka emthethweni kaZimu, kodwana ngenyama yami ngilikhoboka emthethweni wesono.