KWEBEROMA 8

₁Yeke akusekho ukulahlwa kilabo abakuKrestu Jesu ₂ngombana umthetho kaMoya wokuphila okuKrestu Jesu, ukukhululile emthethweni wesono newokufa.

₃Lokho umthetho ogade unganamandla wokukwenza ngebanga lokwenziwa buthakathaka yimvelo yesono, uZimu wakwenza ngokuthumela iNdodanakhe ngobujamo bomuntu wokona kobana ibe mhlabelo wehlambululo ₄ukuze okulungileko okufunwa mthetho kuzaliseke kithi, thina esingakhambi ngokwenyama kodwana ngokoMoya. ₅Labo abaphila ngokwenyama babeka imikhumbulwabo ezintweni zenyama, kodwana abaphila ngokukaMoya babeka imikhumbulwabo kokukaMoya. ₆Ukubeka umkhumbulo kokwenyama kukukufa, kodwana ukubeka umkhumbulo kokukaMoya kukuphila kanye nokuthula. ₇Ngesizathweso-ke umkhumbulo osenyameni ulinaba kuZimu; awuthobeli umthetho kaZimu, ngambala angekhe wakghona ukuwuthobela. ₈Labo ababuswa yinyama angekhe bamthokozisa uZimu.

₉Kodwana nina anisisenyameni, nikuMoya ngombana uMoya kaZimu uhlala ngaphakathi kwenu. Umuntu onganaye uMoya kaKrestu akasuye wakaKrestu. ₁₀Kodwana nangabe uKrestu ungaphakathi kwenu, nanyana umzimba wenu ufile ngebanga lesono, ummoya wenu unokuphila ngebanga lokulunga. ₁₁Nangabe uMoya waloyo owavusa uJesu ekufeni, uphila ngaphakathi kwenu, loyo owavusa uKrestu ekufeni uzokunikela imizimba yenu ebhubhako ukuphila, ngaye uMoya ohlala ngaphakathi kwenu.

₁₂Nje-ke bazalwana, sinesibopho kodwana ingasi enyameni kobana singabe siphile ngokufuna kwayo. ₁₃Ngitjho ngombana naniphila ngokwenyama, nizokufa; kodwana naniphila ngokoMoya, nibulala izenzo ezimbi zomzimba, nizokuphila ₁₄ngombana labo abarholwa nguMoya kaZimu, babantwana bakaZimu. ₁₅Azange namukeliswe ummoya onenza bona nibe makhoboka godu benesabe, kodwana namukele uMoya onenza nibe bantwana bakaZimu. Yeke ngaye siyabiza sithi: “Aba, Baba!” ₁₆UMoya ngokwakhe ufakazela ummoya wethu bonyana sibantwana bakaZimu. ₁₇Nje-ke nakube sibantwana, kutjho bona siziindlalifa, iye, iindlalifa zakaZimu begodu siziindlalifa kanye noKrestu nakube ngambala sihlanganyela eenhluphekweni zakhe ukuze sihlanganyele naye ephazimulwenakhe.

₁₈Ngiyaqinisa bonyana iinhlupheko zesikhathesi azisililitho nazilinganiswa nephazimulo esizokwambulelwa yona. ₁₉Indalo ilindele ngetjisakalo yokulabalabela bona abantwana bakaZimu babonakaliswe. ₂₀Yeke indalo yenziwa into enganamsebenzi, ingasi ngokwentando yayo, kodwana ngokwentando yaloyo oyenze yaba njalo, ngethemba ₂₁lokobana indalo leyo ngokwayo izokutjhatjhululwa ekubotjhweni kwayo, ibole bese ilethwa ekululekweni ephazimulako yabantwana bakaZimu. ₂₂Siyazi bona yoke indalo beyiquma inemirhelo bekube kunjesi; ₂₃begodu ingasi indalo kwaphela, kodwana nathi ngokwethu, thina esineenthelo zokuthoma zakaMoya, sibubulela ngaphakathi khibe silindele ngetjisakalo ukwenziwa abantwana bakaZimu, okukuhlengwa kwemizimba yethu. ₂₄Ngitjho ngombana sasindiswa ethembeni. Kodwana ithemba elibonwako akusilo ithemba ngombana ngubani onethemba ngento asele anayo na? ₂₅Kodwana nasinethemba ngalokho esingakakuboni, sikulindela ngokunyamezela.

₂₆Ngokunjalo uMoya uyasisiza ebuthakathakeni bethu ngombana asikwazi ekumele sikuthandazele. Kodwana uMoya ngokwakhe usithandazela ngokububula okungekhe kwahlathululwa ngamezwi. ₂₇UZimu ohlola iinhliziyo, uyakwazi okusemkhumbulweni kaMoya ngombana uMoya uthandazela abacwengileko ngokwentando kaZimu.

₂₈Siyazi bonyana kilabo abathanda uZimu, wenza bona koke kuhlangane bekubakhambele kuhle, iye, labo ababizwe ngokweminqopho yakhe. ₂₉Labo uZimu abazi ngaphambilini, wabakhethela bona bafane nesibumbeko seNdodanakhe ukuze ibe lizibulo emndenini omkhulu. ₃₀Labo abakhetha ngaphambilini, godu wababiza, nalabo ababizileko godu wabalungisisa, nalabo abalungisisako godu wabaphazimulisa.

₃₁Alo sizakuthini ngezintwezi na? Nakube uZimu ujame ngakithi, ngubani-ke ongajamelana nathi na? ₃₂Yena ongazange agodle iNdodanakhe, kodwana wayinikela ngebanga lethu soke, akazukusinikela koke ngayo na? ₃₃Ngubani ongamangalela abakhethiweko bakaZimu na? NguZimu olungisisako. ₃₄Ngubani olahla ngomlandu na? NguKrestu Jesu owafako, iye, owavuswa ekufeni, ohlezi ngesigomeni sakaZimu nosincengelako. ₃₅Ngubani ongasihlukanisa nethando lakaKrestu na? Kghani ingaba kutlhaga, ziinkathazo, kuzunywa, yindlala, kutlhoga izambatho, yingozi namkha yisabula na? ₃₆Njengombana kutloliwe kwathiwa:

₃₇Kodwana kikho koke lokho singaphezu kwabahluli ngaye owasithandako. ₃₈Nje-ke ngineqiniso lokobana akunalitho, nanyana kungaba kukufa, kuphila, ziingilozi, babusi, zizinto ezikhona, zizinto ezizakubakhona, mibuso, ₃₉kuphakama, kuzika, nanyana kungaba yini edaliweko ezasihlukanisa nethando lakaZimu kuKrestu Jesu iKosethu.