AMARHUBO 98

Vumani ingoma etja kuSomnini

ngombana wenze iimangaliso.

Isidla sakhe nengalwakhe ecwengileko

kumlethele ukuhlula.

₂USomnini uzwakalise ukuhlula kwakhe,

wembule isigwebo sakhe phambi kwezizwe.

₃Wakhumbula ukwethembeka nobuqotho bakhe

endlini ka-Israyeli.

Imikhawulo yoke yephasi

yabona ukuhlula kwakaSomnini.

₄Hlokomelani uSomnini nina bephasi loke!

Thabani nihlokome begodu nirhube!

₅Rhubelani uSomnini ngeharibhana,

iye, ngeharibha nomvumo.

₆Hlokomani phambi kwakaSomnini umbusi

ngeemporompita nomdumo wepalapala.

₇Ilwandle alirhube nokugcwala kwalo,

iphasi lidume nabahlali balo,

₈iinkhukhula ziphorome,

iintaba zihlokome kanyekanye

₉phambi kwakaSomnini

ngombana uyeza uzokugweba iphasi;

iye, agwebe ilizwe ngokulunga

nezizwe ngokufaneleko.