Itethelelo kaZimu iletha ithabo
1Irhubo lakaDavida; iMaskili.
Ubusisiwe othethelelwe isiphambeko,
iye, osono sakhe sisibekelweko.
2Ubusisiwe umuntu uSomnini angambaleli icala
onehliziyo enganakohliso.
3Kwathi nangithulileko,
umzimbami wanyefa
ngokububula kwami ilanga loke
4ngombana ubusuku nemini
isandla sakho besinzima phezu kwami,
amandlami adamba
njengalokha kunomtjhisokazi ehlobo.
5Ngasivuma isono sami kuwe
necala lami akhange ngilifihle.
Ngathi: “Ngizazivuma iimphambeko zami kuSomnini.”
Wena wathethelela icala lesono sami.
6Ngebangelo woke othembekileko uthandaza kuwe.
Ngesikhathi sokugcwala komlambo,
iye, lokha nahlangana nesikhukhula,
amanzi angeze amfikelela.
7Wena uyindawo yokubhaca kimi,
uyangilondoloza eengozini;
ungizombeleza ngokuhlokoma kwetjhaphuluko.
8USomnini wathi:
“Ngizakufundisa,
ngikubonise indlela ozakukhamba ngayo;
ngikweluleke, ngikuphose ilihlo.
9Ungabi njengenjomani
namkha imeyila enganangqondo,
ekufuze ilawulwe ngetomu,
ingafuni ukusondela kuwe.”
10Isikhohlakali sineenhlupheko ezinengi,
kodwana othemba uSomnini
uzakuzombelezwa kukwethembeka.
11Thakasani kuSomnini,
nithabe nina balungileko!
Hlokomani nina baqotho ngehliziyo!
