AMARHUBO 31

₂Kuwe Somnini, ngiyaphephela,

nini nanini ungavumi ngingene ehlazweni

ngisindise ngokulunga kwakho.

₃Beka kimi indlebakho,

ungenyule masinyana.

Yiba lidwala lobuphephelo kimi,

ube yindawo yokukhosela

kobana ngilondeke.

₄Mbala wena ulidwala lami nobuphephelo bami;

yeke ngirhole, ungihlahle ngenca yebizo lakho;

₅ungikhuphe esithiyweni ebesifihlelwe mina

ngombana wena usiphephelo sami.

₆Esandleni sakho ngibeka ummoyami,

uyangihlenga Somnini, Zimu othembekileko.

₇Ngiyabazonda abalotjha abosingazimu abalilize

ngombana mina ngethemba uSomnini.

₈Ekuthembekeni kwakho ngizakuthaba, ngijabule

ngombana ukuhlupheka kwami ukubonile,

wanaka iinhlupheko zomphefumulwami.

₉Akhange unginikele esandleni sesitha,

kunalokho ujamise iinyawo zami endaweni ebanzi.

₁₀Somnini, yiba nomusa kimi

ngombana ngibandezelekile.

Amehlwami avuvukile ngebanga lesizi,

umphefumulwami nomzimbami uyanyefa.

₁₁Mbala, ipilwami ihlala iseenhlungwini

neminyakami inesibibithwana,

amandlami adambile ngebanga lesono sami,

iye, nginyefe ummongo.

₁₂Ngibe siphoqo sawo woke amanabami,

kibomakhelwana bami khona angisakhulumi,

iye, sese ngisisethuso eenhlobeni zami,

abangibona ngaphandle bayangibaleka.

₁₃Nginjengofileko: angisakhumbuleki;

ngaba ngofana nesitja esephukileko.

₁₄Ngizwile abanengi bangihleba,

ukwesaba kungizomba mahlangothi woke,

lokha nabahlala isicathana ngami.

Bahlosa ukungibulala

₁₅kodwana mina ngithemba wena Somnini,

ngithi: “UnguZimami.”

₁₆Esandleni sakho kuneenkhathi zami;

ngitjhaphulule esandleni sezitha zami

nakilabo abangizumako.

₁₇Khanyisa ubuso bakho phezu kwencekwakho;

ngisindise ngokwethembeka kwakho.

₁₈Somnini, ungavumi ngingene ehlazweni

ngombana ngibiza wena.

Yenza iinkhohlakali ziphoqeke,

ziye endaweni yabafileko zithulile.

₁₉Ayithuliswe imilomo ekhuluma amanga,

iye, ekhuluma ngokuzazi ngabalungileko

nangokuzigqaja nokunyaza.

₂₀Maye, kuvamile okuhle okwenzako,

okulondele labo abakwesabako,

okulungisile phambi kwabantu

kilabo abaphephela kuwe.

₂₁Ubafihla ekusithekeni kobukhona bakho,

ekuhlebeni kwabantu.

Ubasitha emtlhatlhanenakho

ekuphikisweni kweenkulumo.

₂₂USomnini akadunyiswe

ngombana ungibonisile ukukhathalela kwakhe okumangalisako,

lokha nangivinjezelwe njengedorobho.

₂₃Mina-ke ngaba namawala ngokuthi:

“Ngiqotjhiwe ebusweni bakho, Somnini.”

Kodwana wezwa isibawo sokuncenga kwami,

lokha nangilila kuwe.

₂₄Thandani uSomnini

noke nina bathembekileko bayo!

USomnini uyabalondoloza abaqotho,

kodwana ozigqajako umbuyiselela kanzima.

₂₅Qinani, ihliziywenu ibe nesibindi

nina noke eniqalelele kuSomnini.