AMARHUBO 123

₁Ingoma yekhambo lokuya ethempelini.

Ngiphakamisela amehlwami kuwe,

wena onesihlalo sobukhosi ezulwini.

₂Iye, njengamehlo weenceku

aqalelele esandleni sekosazo

nanjengamehlo wencekukazi

aqalelele esandleni sekosikazi,

ngokunjalo amehlwethu

aqalelele uSomnini uZimethu,

kufikela lapha asirhawukela khona.

₃Sirhawukele Somnini, sirhawukele,

ngombana sesanele ngokudelelwa.

₄Umphefumulwethu wanele ngokunyefulwa

ngabazikhukhumezako,

iye, nokudelelwa ngabazaziko.