IZAGA 16

₁Umuntu angahlela amasu engqondweni,

kodwana ilizwi lokugcina livela kuSomnini.

₂Zoke iindlela zomuntu zimsulwa emehlwenakhe,

kodwana uSomnini uhlola iinhloso.

₃Nawunikela okwenzako kuSomnini,

amasu wakho azakuphumelela.

₄USomnini wenze koke kwaba nomnqopho,

iye, nokhohlakeleko umenzele ilanga lehlekelele.

₅Woke onehliziyo ezikhukhumezako usinyenyiso kuSomnini.

Nakanjani onjalo uzakuhlunguphazwa.

₆Ngokwethembeka nangeqiniso icala liyahlawuleka,

ngokwesaba uSomnini umuntu ugegeda okumbi.

₇Lokha iindlela zomuntu nazithokozisa uSomnini,

wenza nezitha zakhe ziphile ngokuthula naye.

₈Kungcono ukuba nokuncani,

khibe nokho kunokulunga,

kunokobana ube nesivuno esinengi,

kodwana kungekho ukulunga.

₉Ehliziywenakhe umuntu utlama indlelakhe,

kodwana uSomnini uhlosa amagadangwakhe.

₁₀Lokha isigwebo nasiseembheneni zekosi,

umlomayo awuphambanisi isiqunto.

₁₁Isilinganiso namatje wokulinganisa afaneleko

abuya kuSomnini;

iye, woke amatje wokulinganisa angemgodleni ngewakhe.

₁₂Amakhosi ayasinyenya isenzo esimbi

ngombana ubukhosi bakhelwe phezu kokulunga.

₁₃Amakhosi athatjiswa ziimbhena ezithembekileko,

anegugu ngomuntu okhuluma iqiniso.

₁₄Itukuthelo yekosi iziinthunywa zokufa,

kodwana umuntu ohlakaniphileko uyayidambisa.

₁₅Ukuhlambuluka kobuso bekosi kutjho ukuphila,

ukwamukela kwayo kufana nelifu lezulu ngesilimela.

₁₆Kungcono khulu ukufumana ukuhlakanipha kunegolide

nokufumana ukuzwisisa kungcono kunokukhetha isiliva.

₁₇Indlela ekulu yabaqotho igegeda ubumbi,

owelusa indlelakhe ubulunga ipilwakhe.

₁₈Ukuzikhukhumeza kulandelwa kubhujiswa

nokuwa kulandela umphefumulo oziphakamisako.

₁₉Kungcono ukuzehlisa hlangana nabazithobileko,

kunokuhlanganyela ipango nabazikhukhumezako.

₂₀Ozwisisa okuthileko uyaphumelela,

kodwana othembela kuSomnini ubusisiwe.

₂₁Onehloko waziwa bona unengqondo

namezwi amnandi angezelela ukuzwisisa.

₂₂Ukuzwisisa kumthombo wokuphila kilabo abanakho,

kodwana ifundiso yeendlhadlha ibudlhayela.

₂₃Ingqondo yohlakaniphileko iphumelelisa ikulumakhe

neembhena zakhe zingezelela ukuzwisisa.

₂₄Amezwi amnandi aliliju,

anandipha emphinjeni,

asihlahla emathanjeni.

₂₅Kunendlela ebonakala ilungile emuntwini,

kodwana isiphetho sayo sikukufa.

₂₆Iphango lesisebenzi liyasisebenzela,

indlala yaso iyasiqhuba.

₂₇Isibhidlamnyanya sifunana nobumbi,

nekulumaso ifana nomlilo oqothulako.

₂₈Isigilamkhuba sivusa inturhu,

nokuhleba kwahlukanisa abangani.

₂₉Umuntu onenturhu uyenga wekhabo,

amrholele endleleni embi.

₃₀Oncinza ilihlo ngobukhohlakali ugila umkhuba,

noluma umlomakhe ufukamele ubumbi.

₃₁Iinhluthu ezimhlophe zisihlohlo sedumo,

zifumaneka endleleni yokulunga.

₃₂Kungcono obuthaka ekusilingekeni kunengorho,

nokwazi ukuzibamba kunofuna ukuthumba idorobho.

₃₃Ifumbe iphoselwa ngembadaneni yeporiyana,

kodwana soke isiqunto sayo sivela kuSomnini.