IZAGA 15

₁Ipendulo ethobekileko idambisa itukuthelo,

kodwana ilizwi elihlabako livusa ilaka.

₂Ilimu labahlakaniphileko liphakamisa ilwazi,

kodwana umlomo weendlhadlha

uphuphuma ubudlhadlha.

₃Amehlo kaSomnini akoke,

aqaphele abakhohlakeleko nabalungileko.

₄Ilimu elithambileko limumuthi wokuphila,

kodwana elinobuqili liqoba umphefumulo.

₅Isidlhadlha sidelela ukusolwa nguyise,

kodwana olalela ukukhalinywa uvuthiwe.

₆Umuzi wolungileko unomnono omkhulu,

kodwana inzuzo yokhohlakeleko ilibibi.

₇Iimbhena zabahlakaniphileko zifafaza ilwazi,

kodwana akusinjalo ngengqondo yeendlhadlha.

₈Umhlabelo weenkhohlakali usinyenyiso kuSomnini,

kodwana uthokoziswa mthandazo wabaqotho.

₉Indlela yokhohlakeleko isinyenyiso kuSomnini

kodwana uthanda orhuluphela ukulunga.

₁₀Ukuyelelisa okuqinileko

kubekelwe otjhiya indlela elungileko;

ozonda ukukhalinywa uzokufa.

₁₁Indawo yabafileko nendawo yokubhujiswa

zisemtarini phambi kwakaSomnini;

kangangani-ke imizindlo yomuntu!

₁₂Isinyefuli asithandi ukukhalinywa;

yeke asiyi kabahlakaniphileko.

₁₃Ihliziyo enamileko yenza ubuso busuleke;

iinkathazo zehliziyo ziqoba umphefumulo.

₁₄Ihliziyo ehlolisisako ifuna ilwazi,

kodwana umlomo weendlhadlha uphila ngobudlhadlha.

₁₅Woke amalanga wesichaka mambi,

kodwana odlhudlhekako uzizwela umgidi njalo.

₁₆Kungcono ukuba nokuncani,

khibe nokho wesaba uSomnini,

kunokobana ube nomnono omnengi,

kodwana uneenkathazo.

₁₇Singcono isabelo semirorho

lapha kunethando khona,

kunesekunzana enonisiweko,

khibe kunezondo.

₁₈Umuntu onehliziywana uvusa ukucabana,

kodwana obuthaka ekusilingekeni urhobhisa ukulwa.

₁₉Indlela yevila ifana nomqoqo wameva,

kodwana umzila wabaqotho ulelezekile.

₂₀Umntwana ohlakaniphileko ulethela uyise itokozo,

kodwana osidlhadlha unyaza unina.

₂₁Onganangqondo ukarwa budlhadlha,

kodwana onengqondo ukhamba ngokunqomba.

₂₂Lapha kunganakubonisana khona,

amaqhinga ayatjhabalala;

kodwana ngabeluleki abanengi ayaphumelela.

₂₃Umuntu ufumana itokozo lokha naphendule kuhle.

Maye lihle kangangani ilizwi elifike ngesikhathi!

₂₄Indlela yokuphila irholela ekuphakameni,

ukuze umuntu adede endaweni ephasi yabafileko.

₂₅USomnini ubhuruza ikumba yabazitjhayako,

kodwana uqinisa imikhawulo yomhlolokazi.

₂₆Amaqhinga wokukhohlakala asinyenyiso kuSomnini,

kodwana amezwi amahle ahlambulukile kuye.

₂₇Omarhamaru uletha imiraro emzinakhe,

kodwana ozonda ukufunjathiswa uzakuphila.

₂₈Ihliziyo yolungileko ihlolisisa iimpendulo zayo,

kodwana umlomo wabakhohlakeleko uphafuza ubumbi.

₂₉USomnini ukude nabakhohlakeleko,

kodwana uphendula umthandazo wabalungileko.

₃₀Ubuso obuthokozileko buthabisa ihliziyo

neendaba ezimnandi zinepilo emathanjeni.

₃₁Umuntu onendlebe elalela ukukhalinywa okunepilo

uzakuba sekhaya hlangana nabahlakaniphileko.

₃₂Odela ukusolwa uzinyaza yena,

kodwana olalela ukukhalinywa uzuza ingqondo.

₃₃Ukwesaba uSomnini

kufundisa umuntu ukuhlakanipha,

nokuzehlisa kulandelwa lidumo.