UNARHUME 3

₁Lizazizwa idorobho leengazi,

lizele ngamala;

lizele ngobumarhamaru,

alitlhogi elikuthumbileko!

₂Lenza lokhu ngokuthuthumbisa iimbebhu,

kutswiririze amavili;

ligijimise iinjomani,

kukhehlezele iinkoloyana!

₃Abakhweli beenjomani bahlabela phambili,

kumanyazela iinsabula,

kumekeza imikhonto!

Latjhiya iinkubela ezinengi,

kwaba sidumbu phezu kwesidumbu –

zaba zinengi zarareja umuntu.

₄Koke lokhu kungebanga lobungwadla

bengwadla,

enejamo elilulubezako,

umtjhotjhozeli wobuloyi,

okhaphela izizwe ukuze azuze,

akhaphele abantu ngobuloyi bakhe.

₅USomnini uMninimandlawoke uthi:

“Ngijamelene nawe poro.

Ngizakubhenula iinthimba zakho,

izizwe zoke zikubonele;

nemibuso ibone ukurhubutjheka kwakho.

₆Ngizakujikijela ngamanyala, ngikunyazise,

ngenze ngawe isibonelo.

₇Boke abakubonako bazakubaleka bathi:

‘INiniva igirikile!

Akunamuntu ozayililela,

kungabikho noyedwa oyiduduzako.’ ”

₈Kghani ungcono kuneThebhesi,

esemlanjeni iNayili,

ezombelezwe mamanzi?

Umlambo begade kusiviko sayo,

amanzi aliboda lakhona.

₉IKutjhe bekusidindi sayo,

neGibhide ngobunengi bayo.

iPhuthi neLibhiya kusidzimelelo sayo.

₁₀Ngitjho neThebhesi beyibekelwe

bonyana idingiswe,

isiwe ekuthunjweni.

Ngitjho namasanayo aphihlizelwa

emasangweni wazo zoke iindlela.

Iinkhulu zakhona zenzelwa ifumbe,

kwathi boke abarholi bakhona

babotjhwa ngeenketani.

₁₁Nawe-ke Niniva

uzakurhamula ikapho yomhlonyani;

uzakubaleka uyokubhaca

bese ubawa ukukhoseliswa

zizitha zakho.

₁₂Woke amarholwakho afana

nemithi yamakhiwani;

amajonakho anjengamakhiwani avuthweko:

lokha imithi nayisikinywako,

amakhiwani awela emlonyeni wogomako.

₁₃Khusuthi uyaqala amajonakho:

Woke bafazi!

Amasango wesifunda sakho

avuleke petle,

avulekele izitha zakho;

umlilo utjhise thokgho

iinqabo zamasangwakho.

₁₄Yikha amanzi ngombana uragelelwe,

uqinise amarholwakho!

Khamba uye edongeni

ubhice idaka wenze iintina!

₁₅Umlilo uzakutjhisela khonapho

nesabula izakukghedlha;

ikuqothule njengokuqothula kwesikhonyani

esimini.

₁₆Ungezelele isibalo sabarhwebi bakho

bebadlula iinkwekwezi zesibhakabhaka.

Kodwana bazakwenza seentethe:

badle bazikhambele.

₁₇Nabalindi bakho bafana nesikhonyani,

iinkhulu zakho zifana newoma leentethe,

ezikakarela emabodeni nakumakhaza.

Kuthi nakuhlaba ilanga zitlharuluke ziphaphe,

ziye lapha kungazi muntu khona.

₁₈Maye, kosi ye-Asiriya!

Abarholi bakho bafile buthongo;

amabuthwakho akhethekileko arabhalele.

Amajonakho arhatjheke neentaba,

atlhoge nomuntu ongawabuthelela.

₁₉Akunamuntu ongelapha amancebakho;

awuzukusinda ngeduma lakho.

Woke umuntu ozwa iindaba zakho,

uwahla izandla ngokuwa kwakho.

Ngombana akunamuntu ongazange khewumhlunguphaze;

ngobukhohlakali bakho obungapheliko.