URHABAKHUKHU 1

₂Kunini ngibiza, Somnini, ngifunana nesizo,

kodwana soloko awuphenduli?

Ngakurhuwelela ngathi, “Umguruguru!”

kodwana kubayini ungasindisi?

₃Kubayini ungibonisa ukungalungi,

ubekezelela ubumbi?

Ukurhayila nomguruguru kuphambi kwami,

kwande ukunghunanghunana nerawurawu.

₄Yeke umthetho uyabogaboga,

ukugweba ngeqiniso akusekho.

Iinkhohlakali ziqaqada phezu kwabalungileko,

nje-ke kuhlanakelwa iingwebo.

₅“Qalani izizwe,

nizitjhejisise nikakamale benikhungatheke

ngombana kunento engizayenza emihleni yenu;

eningazukuyikholwa nanyana sele niyitjelwa.

₆Iye, ngizakuvusa amaBhabheli,

abantu abamarhamaru nabanganasisa,

abatjharhatha iphasi loke,

bakhambe bahluthula izindlu okungasi ngezabo.

₇Bababantu abasatjwako nabatatazelelwako

nomthetho usezandleni zabo,

bazidumisa bona ngokwabo.

₈Iinjomani zabo zigijima ukudlula izingwe,

zidlhaduma ukudlula iimpisi ebusuku.

Abakhweli bakhona beza bafuthekile;

abakhweli bakhona bavela kude.

Batheleka njengedlanga nalibhudungela ukudla kwalo;

₉boke beze ngokurhayila.

Amabutho wakhona atheleka njengommoya werhalawumbeni;

abuthelela iimbotjhwa njengetjhwabatjhwaba.

₁₀Banyaza amakhosi,

bahlekisa ngababusi.

Bahleka woke amadorobho anemithangala;

badindela ihlabathi emithangaleni yakhona;

bawasahlele bawathumbe.

₁₁Bese barhurhula badlulele phambili njengommoya;

abantwaba benza amandlabo uzimabo.”

₁₂AwusinguSomnini kusukela nini nanini na?

AwusinguZimu wesivumelwano,

oCwengileko nophila nini nanini na?

Somnini, ukhethe amaBhabheli bona agwebe,

Dwala, ubazese bona bahlunguphaze.

₁₃Amehlwakho acwenge khulu kobana angaqalana

nobukhohlakali;

angeze wabekezelela ubumbi.

Alo-ke kubayini ubekezelela

izephulamthethwezi na?

Uthuleleni ubona iinkhohlakali

zirhiribidela abalunge khulu kinazo?

₁₄Wenze umuntu waba njengehlambi,

waba njengeenrhurhubi zelwandle

zona ezinganambusi.

₁₅AmaBhabheli la, abamba abantu boke;

abadose ngeenkghopholahlambi,

abagolela ngenedenawo,

abarhurhulela ngesirhurhulanedeni sawo.

Ngebangelo ayathokoza ajabule.

₁₆Enzela isirhurhulanede sawo umhlatjelo,

atjhisela nesirhobelanede sawo itjhwalo.

Yeke, ngeenede zawezo abetha esimonyongwana,

agoma iinkhanakhana zokudla.

₁₇Azakusolo athulula iinede zawo,

arhayile izizwe ngesihlungu na?