ULEVITIKUSI 18

₁USomnini wakhuluma noMosi wathi ₂akakhulume nama-Israyeli athi: “Mina nginguSomnini uZimenu. ₃Ningenzi njengombana kwenza amaGibhide lapha benihlala khona begodu ningenzi njengombana kwenza abantu benarha yeKanana enginisa kiyo. Ningakhambi ngemikhubabo ₄kodwana yenzani imithethwami, nilonde neemiso zami, niphile ngazo. NginguSomnini uZimenu. ₅Iye, londani iimiso zami nemithethwami ngombana umuntu owenza njalo uzakuphila ngayo. NginguSomnini.

₆“Akungabi khona owambula ubuze bomuntu wekhabo ngokwamabhayi. NginguSomnini. ₇Ungambuli ubuze bakanyoko ngombana bungebakayihlo; ngunyoko, ungambuli ubuze bakhe. ₈Ungambuli ubuze bomkayihlo ngombana bungebakayihlo.

₉“Ungambuli ubuze bakadadwenu, kungaba mntwana kayihlo namkha kanyoko okhulele ekhaya namkha ngaphandle. ₁₀Ungambuli ubuze bomntwana womntwanakho ngombana ubuze bakhe bububuze bakho. ₁₁Ungambuli ubuze bendodakazi kayihlo ebelethwe ngomunye umfazi ngombana ingudadwenu. ₁₂Ungambuli ubuze bakakghariyakho ngombana uziingazi zakayihlo. ₁₃Ungambuli ubuze bakadadwabo lakanyoko ngombana uziingazi zakanyoko. ₁₄Ungambuli ubuze bomfazi wakamfowabo lakayihlo ngombana bungebakayihlo begodu ngunyoko. ₁₅Ungambuli ubuze bomalukazanakho ngombana mfazi wendodanakho, ungabumbuli ubuze bakhe. ₁₆Ungambuli ubuze bomfazi womfowenu ngombana bungebomfowenu.

₁₇“Ungambuli ubuze bomfazi kanye nomntwanakhe omntazana begodu ungalali nanomntwana womntwana womfazi loyo ngombana batjhidelene khulu nawe; lokho kubuhlola. ₁₈Ungathathi umlamu wakho njengehlanzi wambule ubuze bakhe umkakho asaphila.

₁₉“Ungatjhideli emfazini bona wambule ubuze bakhe lokha nasasilapheleko ngebanga lokobana asesikhathini. ₂₀Ungalali nomfazi womuntu womphakathi uzisilaphaze ngalokho.

₂₁“Unganikeli ngananyana ngimuphi wabantwana bakho bona bahlukaniselwe uMoleki njengeengwadla, ngombana akukafaneli ulirhubutjhe ibizo lakaZimakho. NginguSomnini. ₂₂Ungalalani nenye indoda njenganyana ulala wesifazana. Lokho kuyanyenyisa. ₂₃Ungalingi ulale isilwana uzisilaphaze ngalokho. Godu akungabi khona umfazi ozinikela esilwaneni bona simlale. Lokho kubuhlola.

₂₄“Ungazisilaphazi nangasinye sezintwezo ngombana izizwe engiziqotjha phambi kwenu zazisilaphaza ngazo ₂₅nenarha yasilaphala. Yeke ngakhambela ukonakala kwayo. Ngebangelo inarha yabaphalaza abahlali bayo. ₂₆Kodwana nina londani iimiso zami nemithethwami. Iye, tjhejani nina bantu bendabuko neenkhonzi eziphakathi kwenu bona ningenzi neyodwa yezinto ezinyenyisakwezo ₂₇ngombana abantu bendawo le ebebahlala lapho phambilini benza zoke iinyenyiswezo, yeke inarha yasilaphala. ₂₈Nanisilaphaza inarha, nayo izoniphalaza njengombana kwenzeka ezizweni ebezihlala enarheni ngaphambi kwenu. ₂₉Iye, boke abenza nanyana ngiziphi iinyenyiswezo, bazakujutjwa ebantwini bekhabo.

₃₀“Yeke londani imiyalwami, ningalingi nenze nayinye yemikhuba enyenyisako leyo eyayenziwa phambilini. Ningazisilaphazi ngayo. NginguSomnini uZimenu.”