ULEVITIKUSI 17

₁USomnini wakhuluma noMosi wathi ₂akakhulume no-Aroni namadodanakhe kanye nawo woke ama-Israyeli athi: “Nakhu uSomnini ayale ngakho: ₃Nangabe umuntu wendlu yakwa-Israyeli uhlaba ikomo, imvu nanyana imbuzi ekampeni namkha ngaphandle kwekampa, ₄angayihlabeli emnyango wetende lokuhlanganela, okutjho ngaphambi kwethaberinakeli lakaSomnini, njengomnikelo kaSomnini, uzakubekwa umlandu wokuthulula iingazi. Iye, uthulule iingazi ngalokho uzakujutjwa ebantwini bekhabo. ₅Lokho kutjho bona imihlabelo yama-Israyeli avane ayihlabele emmangweni, kufuze ayilethe kumphristi emnyango wetende lokuhlanganela njengemihlabelo kaSomnini. Ahlabele uSomnini imihlabelo yetjhebiswano leyo lapho. ₆Nje-ke umphristi uzakufafaza iingazi e-aldarini lakaSomnini emnyango wetende lokuhlanganela bese utjhisa umhlwehlwe bona ube ngowamukeleka kuSomnini. ₇Angeze asahlabela uzinyana onesimo seembuzi adlhemadlheme ngemva kwakhe. Lokho kuzakuba simiso sanini nanini kibo eenzukulwaneni ngeenzukulwana.”

₈USomnini wathi godu akawatjele athi: “Nangabe umuntu wendlu yakwa-Israyeli nanyana osikhonzi phakathi kwenu uletha umhlabelo wokutjhiswa namkha omunye umhlabelo nje, ₉bese angawulethi emnyango wetende lokuhlanganela bona ube mhlabelo kuSomnini, umuntu loyo uzakujutjwa ebantwini bekhabo.”

₁₀Godu uSomnini wathi kuMosi akakhulume nama-Israyeli athi: “Nangabe umuntu wendlu yakwa-Israyeli nanyana osikhonzi phakathi kwenu udla iingazi, ngizakujamelana nomuntu loyo. Ngizamjuba ebantwini bekhabo ₁₁ngombana ukuphila kwenyama kuseengazini. Ngimi oninikele iingazi bona nenze ngazo itethelelo yemiphefumulwenu e-aldarini. Ngebanga lokobana iingazi ziletha itethelelo ngepilo ekizo ₁₂ngalokho nginiyale nina ma-Israyeli ngathi, ‘Kungabi nomuntu phakathi kwenu namkha isikhonzi esihlala nani esidla iingazi’.

₁₃“Nangabe umuntu wakwa-Israyeli nanyana isikhonzi esiphakathi kwenu sikhamba siyokuzuma inyamazana namkha inyoni edliwako, kufuze siyikhuphe iingazi bese sizivala ngehlabathi. ₁₄Ngebanga lokobana ukuphila kwenyama yoke kuseengazini, ngiyale nina ma-Israyeli ngathi, ‘Nakuziingazi, akungabi nomuntu ozidlako ngombana ukuphila kwenyama yoke kuseengazini. Ozidlako uzakujutjwa ebantwini bekhabo.’

₁₅“Woke umuntu odla okuzifeleko namkha okudatjulwe ziimbandana, kungaba ngowendabuko namkha sikhonzi, kufuze ahlanze izambatho zakhe bese adude umzimbakhe. Uzakuhlala angosilapheleko bekuhlwe, emva kwalokho uzakuba ngohlambulukileko. ₁₆Kodwana nangabe akahlanzi izambatho zakhe abe adude umzimbakhe, uzazizwa ngesono sakheso.”