UJOBHO 39

₁Uyazi bona iimbuzi zeentaba zizala nini na?

Utjhejile ukuzala kweenhlangukazimataka?

₂Vane uzibalele iinyanga bezizale,

uhlose isikhathi sokuzala kwazo na?

₃Ziyakoropana bese abantwabazo bayaphundluka,

okubanga imirhelwazo kuyawuluka.

₄Abantwabazo baqine,

bakhule baziphe inarha,

bangasabuya kizo.

₅“Ngubani otjhaphulule udumbana wommango;

iye, omvulele ummango wokuziphilela?

₆Ngimi owahlosa bona irhalawumba libe likhaya lakhe

nenarha enetswayi kube yindawakhe yokuhlala.

₇Akakhathali ngetjhada ledorobheni,

akezwa ukurhuwelela komtjhayeli.

₈Ukhamba eentabeni athalaza amadlelo,

afunafune nanyana yini elihlaza.

₉“Inyathi ingavuma ukukusebenzela na?

Ihlale eqadi kwekerebhakho ebusuku?

₁₀Ungayibophela bona ilime,

uyibambe emseleni ngentambo na?

Ingavuma ukulalisa amasoyi

emva kwakho?

₁₁Ungayirhuluphela ngebanga lamandlayo amakhulu,

uliselele umsebenzakho obudisi kiyo na?

₁₂Ungayithemba bona ingabuya

ikulethele amabelakho eselelweni na?

₁₃“Amaphiko wenciliba abhakuza ngethabo,

kodwana amaphikwayo afana newakadoyi

namkha wakapekwa na?

₁₄Ngebangelo ibekela amaqandayo ehlabathini,

iwafuthumeze ngetjhwabatjhwaba.

₁₅Iyakhohlwa bonyana angapitlizwa linyawo,

iye, angagadangwa ziinyamazana.

₁₆Iphatha amadzinyanayo makghwakghwa,

kwanga akusiwo wayo;

ayikhathali bonyana isebenzela ilize.

₁₇Mbala uZimu uyidime ukuhlakanipha,

azange ayiphe isabelo ekwazini,

₁₈kodwana nayiphakamisa ihlokwayo

kobana igijime,

ihleka injomani nomkhwelayo.

₁₉“Uyayinikela injomani amandlayo

namkha wembathise intamayo ngomdlwenga na?

₂₀Uyenza bona ithiyelele njengewoma leentethe na?

Ukuduma kokuthimula kwayo kuyayethusa,

₂₁igige phasi ngeenqatha, ijabule,

isuke ngamandla ihlangabezane nepi.

₂₂Ayikhathali ngengozi,

ayinavalo ngalitho,

ayidedi ngebanga lesabula,

₂₃lokha imisubela nayivuruza ngehla kwayo,

nalokha kumekeza umkhonto nezenjana.

₂₄Ngokuduma kweenqatha zayo

iphasi liyadengezela.

Ayijiki lokha ipalapala nayijamisa ipi.

₂₅Nakulila ipalapala, iyathimula ithi, ‘Nakho-ke!’

Ithi isese khatjhana izwelele ipi

nokurhuwelela kweenduna

kanye nomkhosi wepi.

₂₆“Ngelwazi lakho ukholo uyathiyelela,

anabululele amaphikwakhe ngesewula na?

₂₇Kungomyalwakho bona idlanga liphaphe phezulu,

lakhe isidleke salo ekuphakameni na?

₂₈Lihlala empharwini,

lilale emaweni wamadwala

kube buphephelo balo.

₂₉Khonapho lithalaza ukudla kwalo,

amehlwalo akubona likude.

₃₀Amadzinyanalo arhubula iingazi,

nakunokubuleweko, nalo liba lapho.”