UJOBHO 38

₂“Ungubani yena lo,

ofiphaza ihlelo

ngamezwi abe anganalwazi na?

₃Zilungiselele njengendoda:

Ngizakufaka imibuzo

bese uyangiphendula.

₄Wawukuphi lokha nangendlala isisekelo sephasi?

Khuluma nakube unelwazi.

₅Ngubani owahlosa ubukhulu bakhona?

Ngiyethemba bonyana uyazi!

Ngubani owelula intambo yokulinganisa

lapha kufuze usekeleke khona?

₆Wanzinziswa phezu kwani na?

Ngubani owabeka ilitje lawo elisisekelo,

₇lokha iinkwekwezi zokusa nazibhina ndawonye,

namadodana woke kaZimu narhuwelela ngethabo?

₈Ngubani owavalela ilwandle ngamasango amabili,

lokha nalithumbuka esibelethweni na?

₉Bewukuphi nangenza amafu abe sisambatho salo,

nangilisonga ngamafu anzima,

₁₀nangibeka iinkhonkhwani zalo,

ngilivalela ngeminyango emibili nesiqabo na?

₁₁Ngathi kilo, ‘Nakhu lapha uzakuphelela khona, ungayi phambili.

Lapha ngibeka umkhawulo wamadlambakho azigqajako.’

₁₂“Wakhe wayala itathakusa bona ivele,

namkha ukhombise ukusa indawo yakhona,

₁₃kobana kubambe umhlaba ngomphetho,

kuthintithe kiwo abakhohlakeleko na?

₁₄Umhlaba utjhugululwa ube njengomdaka nawugitjiweko,

uba nemibala njengesambatho nasitjhugululwe umbala.

₁₅Abakhohlakeleko baselwe,

amandlabo adanjiswa kukusa.

₁₆“Ukhe wangena esiyalwini selwandle,

namkha wakhamba ekuzikeni kwamanzi amanengi na?

₁₇Amasango wokufa akhe embulwa kuwe,

wabona abalindisango bobumnyama obunzima tshu?

₁₈Uyalemuka bonyana kwenzakalani phezu kwephasi na?

Yitjho nakube unelwazi ngawo woke!

₁₉Iphi indlela eya ekhabo lomkhanyo

begodu unelwazi bona ubumnyama buhlalaphi,

₂₀ukuze ububeke endawenabo

bese ukhombisa ukukhanya indlela yekhabo na?

₂₁Ngambala uyazi, angithi besele ubelethiwe!

Iye, namalanga wokuphila kwakho manengi!

₂₂“Ukhe wangena eenlulwini zeliqhwa,

namkha wabona ububulungelo besinanja

₂₃engibubekele iinkhathi zamatshwenyeko

okumalanga wepi nokulwa na?

₂₄Ngiyiphi indlela eya endaweni

lapha umkhanyo uhlakazwa khona

kube mibani,

nalapha ummoya wepumalanga

uhlakazeka khona ephasini na?

₂₅Ngubani owemba umsele weenkhukhula zezulu

nendlela yamafu anzima,

₂₆alethe izulu enarheni engahlalwa mumuntu,

ekulirhalawumba elinganabantu,

₂₇anelise inarha eligagadu nelibhudu,

nokuyimilisa utjani na?

₂₈Ngubani uyise wezulu,

amathosi wombethe abelethwe ngubani na?

₂₉Irhwaba liphuma esibelethweni sakabani,

isithwathwa esivela emkayini

sibelethwa ngubani na?

₃₀Amanzi aqina njengelitje,

ilingaphezulu lamanzi amanengi liyarhwaba.

₃₁“Ungabophela iinkwekwezi zesiLimela,

namkha utjhaphulule iintambo zesiRuthwana na?

₃₂Ungakhupha iinkwekwezi ezinguFezela ngesikhathi sazo,

namkha urhole eziliBhere nabantwabalo na?

₃₃Uyazazi iimiso zobujamo beenkwekwezi na?

Ungajamisa umlawuli wesibhakabhaka na?

₃₄Ungayala amafu ngelizwi elidumako,

ukuze iinkhukhula zamanzi zikwembese na?

₃₅Ungayithuma imibani bona ikhambe

bese ithi, ‘Sisemsenakho’ na?

₃₆Ngubani obeke ukuhlakanipha emafini amhlophe,

wawanikela ilwazi kobana athaye njengeenthayamanzi na?

₃₇Ngubani onobuhlakani bokukhupha isibalo samafu,

atjhikamise imijeka yezulu leyo,

₃₈ukuze ithuli liphenduke idaka

namagade ahlangane na?

₃₉“Ungazumela ibhubezi inyamazana,

wanelise iphango lamabhubezana,

₄₀lokha nabadalala endawenawo,

azilungiselela ukubhudungela

asemthunzini kobana akhukhuthele na?

₄₁Ngubani onikela igubulu ukudla

nalizulazula liswele okugonywako

namadzinyanalo atsiyozela uZimu na?