U-ISAYA 64

₁Kwanga bewungavula amazulu, wehlele phasi,

iintaba bezizakuthuthumela phambi kwakho

₂kube njengokuthungelwa kwamaqwabatjhi

enze bonyana amanzi abile.

Yewehle ukuze wenze ibizo lakho

laziwe zizitha zakho

nezizwe zithuthumele phambi kwakho!

₃Wehla phambilini wenza okwesabekako ebesingakakulindeli,

iintaba zathuthumela phambi kwakho.

₄Ukusukela ekadeni, akakho owezwako,

iye, akunandlebe eyalalela

namkha ilihlo elabona uZimu onjengawe

osiza labo abamqalelelako.

₅Uhlangabeza labo

abathokozela ukwenza okulungileko,

labo abakukhumbulako

balandele iindlela zakho.

Qala, wena uthukuthela ngombana sonile.

Nangathana besisese seendleleni zakho

besizakufumana isizo,

₆kodwana soke sesifana nosilapheleko;

zoke izenzo zethu zokulunga

sezifana nomtjhubelo.

Soke sese sitjhwabe njengekari,

siphetjhulwa licala lethu njengommoya.

₇Akakho obiza ibizo lakho

namkha olubalubela ukukakarela kuwe.

Ngambala usifihlele ubuso bakho,

wasinikelela emandleni wecala lethu.

₈Nokho Somnini, ungubabethu.

Thina simdaka, wena umbumbi wethu

simsebenzi wezandla zakho soke nje.

₉Ungathukutheli ngokweqileko Somnini,

ungakhumbuli icala lethu mlibe.

Yewusitjheje, siyakuncenga!

Kazi sibabantu bakho soke nje.

₁₀Imizakho ecwengileko

sele iphenduke irhalawumba,

ngitjho neZiyoni sese ilirhalawumba,

iJerusalema ilirubhi.

₁₁Ithempeli lethu elicwengileko nelidumileko,

lapha abobaba bebakudumisa khona,

litjhiswe thokgho ngomlilo,

koke ebesinegugu ngakho sekonakele.

₁₂Ngemva kwakho koke lokhu Somnini,

uzase uhlale uzibuthelele na?

Uzakuthula usithobise ngokudluleleko na?