U-ISAYA 63

₁Ngubani lo ovela e-Edomu,

iye, eBhotsira onezambatho ezitlerebede na?

Ngubani lo ohlobe ngeziphazimako,

ohlabela phambili ngamandla amakhulu na?

“Ngimi engikhuluma ngokulunga,

nenginamandla wokusindisa.”

₂Kubayini izambatho zakho zibomvu

njengezomuntu ogadange

ngebutlhodlhelweni besidiribe na?

₃“Ngigadange ngebutlhodlhelweni ngingedwa,

phakathi kwezizwe akakho noyedwa ogade anami.

Ngazigadanga ngetukuthelwami,

ngazitshidlha ngokufutheka kwami,

umhluzi wazo wachaphazela izambatho zami,

yeke zoke izambatho zami zinindekile.

₄Ilanga lokubuyiselela belisehliziywenami

nomnyaka wokuhlenga kwami sewufikile.

₅Ngaqala, kodwana bekungekho umenyeli,

ngamangala, kodwana akakho owangisekelako.

Yeke ingalwami yaba yisindiswami

netukuthelwami yangisekela.

₆Ngapitliza abantu ngetukuthelwami,

ngokufutheka kwami ngabaqoba,

ngathululela iingazi zabo phasi.”

₇Ngizakwazisa izenzo zokwethembeka kwakaSomnini,

iye, izenzo adunyiswa ngazo,

ukuya ngakho koke uSomnini asenzele khona.

Kwamambala wenze izinto ezinengi ezihle ekumbeni ka-Israyeli,

ukuya ngokuvama kokwethembeka kwakhe.

₈Wathi: “Ngambala bababantu bami,

babantwana abangeze baba mahlongandlebe.”

Ngalokho waba msindisabo.

₉Kiwo woke amatshwenyekwabo naye watshwenyeka,

ngalokho, ingilozi yobukhona bakhe yabasindisa.

Yena ngokwakhe wabahlenga ngethando nangezwelo,

wabenyula bewabathwala yoke imihla yaphambilini.

₁₀Kodwana bona bahlubuka

bebakhubekisa uMoyakhe oCwengileko.

Yena-ke waphenduka isitha sabo,

yena ngokwakhe walwa nabo.

₁₁Nje-ke, abantu bakhe bakhumbula

imihla yaphambilini, imihla kaMosi, bathi:

“Uphi yena owabahlenga elwandle

kanye nabelusi bomhlambakhe na?

Uphi yena owabeka uMoyakhe oCwengileko

phakathi kwabo,

₁₂wathumela ingalwakhe edumileko

kobana ibe ngesigomeni sakaMosi,

owahlukanisa amanzi phambi kwabo

kobana azenzele ibizo lanini nanini

₁₃nowabadabulisa ekuzikeni na?

“Njengenjomani enarheni evulekileko

azange bakhutjwe

₁₄nanjengesilwana esehlela emrhobeni,

lapha uMoya kaSomnini usiphumuza khona,

ngokunjalo warhola abantu bakho Somnini,

kobana uzenzele ibizo elidumileko.

₁₅Yehlisa amehlwakho usezulwini,

ubone usendawenakho ecwengileko nenedumo.

Iphi itjisakalwakho namandlakho na?

Isirhawu sakho nomusakho kugodliwe kithi.

₁₆Ngambala ungubabethu!

U-Abrahama akasazi,

no-Israyeli bekangeze asilemuke,

Somnini, wena ungubabethu;

kwakade ibizo lakho unguMhlengethu.

₁₇Somnini, usidurhiselani eendleleni zakho,

uqinise iinhliziyo zethu kobana zingakwesabi na?

Buya ngenca yeenceku zakho,

iinkoro zelifa lakho.

₁₈Abantu bakho abakhethekileko

bazuze ilifa lakho kwesikhatjhana,

kodwana izitha zethu

zigadangele phasi indawakho ecwengileko.

₁₉Sifana nabantu ongazange khewubabuse,

iye, abangazange babizwe ngebizo lakho.”