U-ISAYA 53

“Ngubani owakholwa ngesikuzwileko na?

Ingalo kaSomnini yembulelwe bani na?

₂Inceku yazikhulela ngokuhluma,

iye, njengehlumela emrajini

equlwanini eyomileko.

Gade inganasibumbeko begodu ingakhangi

kobana singabeze siyinake;

beyinganabuhle obungasenza siyithande.

₃Yanyazeka beyalahlwa babantu,

yaba mumuntu weensizi, yazi ukugula,

njengomuntu osithezelwa ubuso.

Iye, yanyazeka begodu azange siyihloniphe,

₄khonapho yathwala ukugula kwethu,

yatjatha iinsizi zethu.

Thina sathatha bona ihlunguphaziwe,

yabethwa nguZimu beyathotjiswa,

₅kodwana yalinyazwa ngebanga leemphambeko zethu,

yaphihlizwa ngenca yamacalethu.

Isibetho esasilethela ukuthula saba phezu kwayo

nangamancebayo saphiliswa.

₆Thina soke sidurhe njengezimvu,

ngiloyo naloyo uphendukele eendleleni zakhe,

kodwana uSomnini wehlisela icala lethu

phezu kwayo.

₇“Yagandelelwa, kodwana yona yathoba.

Azange ivule umlomayo

njengemvana esiwa ekuhlatjweni

nanjengemvukazi ethulileko phambi komrhunayo;

iye, azange ivule umlomayo.

₈Emva kokugandelelwa ngomlandu, yasuswa;

akakho noyedwa owanghonghoyila ngokwayehlelako.

Mbala, yajutjwa enarheni yabaphilako;

yalinyazwa ngenca yesiphambeko sabantu bayo.

₉Yanikelwa ithuna hlangana neenkhohlakali,

yaba neenjinga ekufeni kwayo,

nanyana ingazange ibange inturhu,

namkha ibe nekohliso emlonyenayo.

₁₀“Bekuyintando kaSomnini kobana iqhobozwe:

Wayibangela ukugula;

mbala, wenza ipilwayo umhlabelo wehlawulo.

Izakubona umphumela wembewu;

izakuphila isikhathi eside

nentando kaSomnini izakuphumelela

ngesandla sayo.”

“Iye, ngemva kokuhlupheka kwepilwayo

incekwami izakubona,

izanelise ngelwazi layo.

Izazibonakalisa ingelungileko kabanengi,

yona izakuthwala iimphambeko zabo.

₁₂Ngalokho ngizayinikela isabelo hlangana nabanengi,

izakwabelana ipango nabanamandla,

ngokunikela kwayo ipilo ekufeni

nangokubalelwa nabaphambekako.

Yona yathwala izono zabanengi,

yazikhuba ngebanga labaneemphambeko.”