U-ISAYA 52

₁Vuka, vuka wena Ziyoni,

zembathise amandla.

Yembatha izambatho zakho zakanokutjho,

wena Jerusalema, dorobho elicwengileko

ngombana abatjhili nabangahlambulukiko

angeze basangena kuwe godu.

₂Zithintithe ithuli,

sikima wena sibotjhwa, Jerusalema.

Zithukulule iinketani entanyenakho,

wena sibotjhwa, ndodakazi yeZiyoni.

₃Mbala, nakhu okutjhiwo nguSomnini:

“Wathengiswa simahla,

nje-ke awuzukuhlengwa ngesiliva.”

₄Mbala, nakhu okutjhiwo nguSomnini uSomandla:

“Ekuthomeni abantu bami

behlela eGibhide bayokhonza khona;

i-Asiriya ibagandelele ngaphandle kwesizathu.

₅Manje-ke kubayini kumele ngivumele lokhu na?

Abantu bami ngambala bathathwa

basiwa ekuthunjweni ngaphandle kwesizathu

nabarholi beBhabheli bazikhukhumeza.”

Watjho njalo-ke uSomnini.

“Ibizo lami lahlala linyazwa

imihla ngemihla.

₆Kodwana abantu bami

bazakwazi amandla webizo lami;

iye, mhlokho bazakulemuka

bonyana ngimi okhulumako,

ngithi sengikhona!”

₇Maye zithandeka kangangani eentabeni

iinyawo zaloyo oletha iindaba ezimnandi;

omemezela ukuthula,

iye, oletha iindaba ezimnandi,

ngokumemezela isindiso,

athi eZiyoni: “UZimakho uyabusa!”

₈Lalela wena Jerusalema!

Abalindi bakho bayarhuwelela,

iye, bahlokoma bathi:

“Ngamehlwabo abantu bazakubona

ukubuya kwakaSomnini eZiyoni!”

₉Zwakalani, iye, hlokomani

nina marubhi weJerusalema

ngombana uSomnini ududuze abantu bakhe,

wahlenga iJerusalema.

₁₀USomnini wembule ingalwakhe ecwengileko

emehlweni wezizwe zoke;

imikhawulo yoke yephasi

ibona isindiso kaZimethu.

₁₁Fulathelani, fulathelani, phumani lapho!

Ningathinti okungakahlambuluki!

Phumani phakathi kwalo!

Nizihlambulule nina

eniphethe izitja zakaSomnini.

₁₂Nokho anizukuphuma nirhabile

nanyana nibe njengababalekako

ngombana okhamba phambi kwenu

nguSomnini

begodu nonelusileko ngemva kwenu

nguZimu ka-Israyeli.

“Qalani, incekwami izakuphumelela ngokuhlakanipha,

izakuphakama, ikhutjhulwe,

ibe phezulu khulu.

₁₄Njengombana abantu abanengi

gade bakhuza ngayo,

– iye, beyinganabubono, ingafaniseki,

inganajamo lomuntu –

₁₅ngokunjalo izakurara izizwe ezinengi

begodu amakhosi akakamale ngayo.

Mbala, abangazange batjelwe, bayabona

nabangazange bezwe, bayalemuka.”