KWEBEKOLOSE 4

₂Zinikeleni ngokupheleleko emthandazweni, nilinde kiwo ngokuthokoza. ₃Sithandazelani nathi kobana uZimu asivulele ithuba lokutjhumayela ukuze sizwakalise ifihlakalo kaKrestu, engingesikhungweni ngebanga layo. ₄Thandazani bona ngiyibonakalise kuhle njengombana ngifanele.

₅Ziphatheni ngokuhlakanipha ebantwini abatjhili, nisebenzise kuhle loke ithuba eninalo. ₆Ikulumo yenu ayibe nomusa njalo, inungwe ngetswayi ukuze nazi bona niphendule njani woke umuntu.

₇UTirhikosi uzanitjela zoke iindaba ngami, ungumfowethu othandekako, isikhonzi esithembekileko nenceku kanye nami eKosini. ₈Kungebangelo ngimthumela kini ukuze nazi bona siphile njani nokobana akhuthaze iinhliziyo zenu. ₉Uzabe akhambisana no-Onesimusi, umfowethu othembekileko nothandekako, ongomunye wenu. Bazanitjela ngakho koke okwenzekako lapha.

₁₀U-Aristarirhusi osibotjhwa kanye nami uthe nginivuse, iye yena noMarkosi umzawakhe kaBharinabhasi enayalwa ngaye bona nafikako nimamukele. ₁₁UJesu okuthiwa nguJustosi naye uthe nginivuse. Laba-ke ngibo bodwa abangebokusoka hlangana nabasebenza kanye nami embusweni kaZimu, begodu bayinduduzo kimi njalo.

₁₂No-Ephafrasi ongomunye wenu noyinceku kaJesu Krestu uthe nginivuse. Njalo emthandazwenakhe uhlala anilwela ukuze niqine nidzimelele begodu niqinisekisiwe kikho koke okusentandweni kaZimu. ₁₃Nami ngiyamfakazela bona unisebenzele nzima kanye nalabo abaseLawodikeya kanye nabaseHerapholisi. ₁₄ULukasi, udorhodera othandekako, noDemasi bayanilotjhisa.

₁₅Yeningilotjhisele kubazalwana abaseLawodikeya nakuNimfasi kanye nebandla elihlanganela kwakhe. ₁₆Nasele incwadi le ifundiwe phakathi kwenu, idluliseleni nebandleni lamaLawodikeya kobana ifundwe nakhona, nani qinisekisani bona niyayifunda evela eLawodikiya. ₁₇Yithini ku-Arirhipusi: “Qinisekisa bona uqeda umsebenzi owawamukela eKosini.”