1 KWEBETHESALONIKA 1

₂Sihlala simthokoza njalo uZimu ngani noke; siyanikhumbula nemithandazweni yethu. ₃Sikhumbula njalo phambi koZimethu nonguBaba, umsebenzenu weenthelo zokukholwa, ukutjhabatjheka kwenu okuvezwa lithando kanye nokubekezela kwenu ngebanga lethemba eninalo eKosinethu uJesu Krestu. ₄Siyazi bazalwana abathandwa nguZimu bona unikhethile ₅ngombana ivangeli lethu leza kini ingasi ngamezwi nje kwaphela kodwana ngamandla kaMoya oCwengileko nangokukholwa okukhulu. Niyazi bona besiphila njani phakathi kwenu ngebanga lenu. ₆Nani naba balingisi bethu nebeKosi; phezu kobana beniqalene neenhlupheko ezikulu, namukela ilizwi ngethabo enalinikelwa nguMoya oCwengileko. ₇Ngaleyondlela nibe sibonelo kiwo woke amakholwa eMasedoniya ne-Arhaya ₈ngombana ukuzwakala kwelizwi kwavela kini, ingasi eMasedoniya ne-Arhaya kwaphela. Ukukholwa kwenu kuZimu sekwazeka yoke indawo, yeke akusatlhogeki bona sitjho ilitho ngakho ₉ngombana bona ngokwabo ngibo abasibikelako bona nasamukela njani. Bayafakaza ngendlela enatjhugulukela ngayo kuZimu, nafulathela ukulotjha abozinyana kobana nilotjhe uZimu weqiniso nophilako. ₁₀Noke nihlala nilindele ukubuya kweNdodana yakhe ezulwini, ayivusa kabafileko, iNdodana leyo nguJesu osisindisa elakeni elizako.